HLAZY 20:6 - Mara Bible RV (BSI)

⁶ Tahmâ Abeipa ta a sathawthupa a pachha tahpa ei pahno haw; A vâ pathaihpa tawhta a zâ chhy aw ta, A ku chachâh lâta pachhana thatlôna ta a zâ chhy aw.

HLAZY 20:6 ပူးပေါင်းရင်းမြစ်များ

1 ABEIZY 8:30

Châ chakaotuhpa nata na phopi Izarei sawzy ta he su lâ a heihpa ta thlah ama chhâ tita, ama hianazy vaw nathlie tyh mah y. Na pahrâna su vârâh tawhta vaw nathlie la, na thei tita, a ngiahthai tyh mah y.

1 ABEIZY 8:43

na pahrâna su vârâh liata vaw nathlie la, chihropa ta a cha hiapa cha taopa mah y. Chatanachata khizaw phopi zydua ta na moh pahno aw ei ta, Izarei sawzy ta eima cha chipa hawhta, âmo chhao ta cha chi aw ei ta, o ei sapa he na moh a phaohpa a châ tahpa ama pahno aw.

HLAZY 17:7

Hy nâma châ chhaipazy pachhatuhpa y, Na ngâchhihna cha na hmotao noâhpazy liata palâsa la, Na ku chachâh lâta ama chariahpazy tawhta pachha mah y.

HLAZY 18:35

Na pachhana vyhphao na pie chi ta, Na ku chachâh lâta na cha-ao chi ta, Na nôphana ta eina parônahsa chi.

HLAZY 18:50

Abeipa cha ano paduapa bei hnohta pachhana rônahpa pie ta, A sathawthupa Dâvi nata a pathlazy chô liata, Zawngiahna chhâzaw ta a palâsa.

HLAZY 2:2

Lei beizy amâ duana su liata a duah ei ta, Ryureituhpazy a hmaohpakhypa ta, Abeipa a dyuh awpa ta ryhrao khoh ei ta, A sathawthupa a dyuh awpa ta amâ paraoh.

HLAZY 28:8

Abeipa cha a chyhsazy thatlôna châ ta, A sathawthupa châta pachhana thokhy a châ.

HLAZY 41:11

Cha liana chata ei chô liata nâ ly tahpa pahno aw na ta, Ei chariahpazy ta pahniena hladyuh na pathluah chie aw veih ei.

HLAZY 9:15

Phopizy âmo khaohtlô chaopa liata tla ei ta, Â nyupa ta sao ama paraipa liata Ama phei â ao tyh.

ISAI 57:15

Moh chônôpa nata cheihchalopa ta hetana heta tah ta, Tlyzaw ta a ypa, a moh Pathaihpa bipa ta hetana heta a tah: “Areisipazy thlahpa pahra ta, Angiapachhipazy palôh pahra awpa ta, Kei he su sâhpa nata su pathaihpa liata pahrâ na ta, Angiapachhipa nata areisipazy hnohta ei pahrâ.

ISAI 58:9

Cha tina cha Abeipa pado aw chi ta, A cha chyh-ei aw; Abeipa lâ awh aw chi ta, ‘He liata ei y,’ a cha tah aw. Nama hry tawhta raopaky la la, Kudy ta dypâpa hmâh khao leipa la, Bie chhiepa reih khao khah y.

ISAI 63:15

Vârâh tawhta za sai la, moh tua, Na pathaihna su tawhta za sai la, Na rônahna su tawhta za sai tua. Na phahnai ngiahna kha khataih liata y ta, Na thatlôna khataih liata a y haw? Na palôh pathyuna nata na thapasana zy kha, Eima châta pakhâpa a châ ha he zaw.

MIKÂ 4:5

Phopi to ama khazoh moh chyu ta charei ei ta, Keimo deikua cha, Abeipa eima Khazohpa moh ta, Chhâzaw nata tlyzaw ta eima charei aw.

MATHAI 6:9

Chavâta nâmo la hetana heta thlahchhâ tyh muh vy: “‘Eima Paw vârâh liatapa, Na moh zachhih mawh sy.

HMOTAOPAZY 2:33

Khazohpa ku chachâh lâta palyupalihpa ta y ta, Thlahpa Pathaihpa pie awpa bietai Paw tawhta hmô ta, nama hmôpa nata nama theipa hawhna heta, Thlahpa Pathaihpa hrypa a châ hih.

HMOTAOPAZY 2:36

Chavâta Zisu nama khaipâpa tlai kha, Khazohpa ta Abeipa nata Mesia ta a taopa a châ tahpa cha, Izarei phopi zydua ta pahno tlai mawh ei sy,” tah ta.

HMOTAOPAZY 4:10

nama zydua ta pahno u la, Izarei saw zydua ta pahno mawh ei sy. Nâzari Zisu Krista nama khaipâpa, Khazohpa ta athihpa hry tawhta a pathyu heihpa moh ta, he chyhsa he nama hmiakô liata a tlâhpa ta â duahpa a châ hih.

HMOTAOPAZY 5:31

Izarei parosa ta, moleinazy a ngiahthai awpa ta, Khazohpa ta ano cha a chachâh lâta patyusa ta, Hyutuhpa nata Pachhatuhpa ta y awpa ta a cheihchalo haw.