Hy Abeipa, ei Khazohpa, Na hmotao noâhpazy he thata châ ta, Miah na pachânazy he thata a châ kaw dia! Nâma nata pakho tlâh y tlâ veih ei. Chazy cha phuahpa ta ei chhopa chhao ta, Chho khai tiah awpa châ vei.
Viahchhâ la ta, alyna bie a rei khai nahta, eichheih ta, ama hnohta pie ta, “He he ei sapa, nama châta piepa a châ, einâ thei thlâh nawpa ei chi ta, he he tao tyh muh vy,” tah ta.
Hlâno daihti liata nohzy kha a thei u la, Chhâ hluhpi liata kôzy kha pachâ tua u; Nama pawzy hiahri u la, Ama cha pahmô aw; Machâzy hiahri u la, Ama cha chho aw.
A biepiepazy nama zyh ma, zyh vei ma tahpa nama palôh pahno nawpa ta, cha panawh ta, cha pasia awpa ta, Abeipa nama Khazohpa ta kô sypalih dua râhchawhpa liata a châ chhipa ei namâ thei thlâh awpa a châ.
A pachiana a do ta a sia; A sihryhna ta leilô a papuapa âzuahnô rônahpa cha, Khazohpa ta pachia ta; A chakaotuhpazy thisaih phuh cha, Âzuahnô chô liata a la haw,” tah ei ta.