HEBRAI 12:2 - Mara Bible RV (BSI)

² Eimâ ngiapâna apahniehna nata pakituhpa Zisu lâ moh lymâ ei suh u. Ano cha a hmiakô liata alyna sopa cha a to thei nawpa ta, maophyuhna chhao papeisa leipa ta, kraws liata pasa tao ta, Khazohpa beidyuchhai chachâh lâta a kaw tyuh ha ta.

HEBRAI 12:2 ပူးပေါင်းရင်းမြစ်များ

HLAZY 110:1

Abeipa ta ei Beipa hnohta, “Na chariahpazy ei phei tlyna ta ei tao hlâlei cha, Ei chachâh lâta a tyuh mah y,” tah ta.

HLAZY 138:8

Abeipa ta ei châta â chhuahpa cha a patlô aw; Hy Abeipa, na kyhpachâna cha tlyzaw châta châ ta, Nâma ku tlai ta na taopazy he a heihsai khah y.

ISAI 31:1

Baona hia awpa ta Izi râh lâ zu ta, Arâzy liata a pahniehpazy cha, Ama hu a po na! Izarei Mo Pathaihpa lâ moh leipa ei ta, Abeipa a saohiah hra veih ei; Talailih hluhpi hneina liata ama ngâna tlao pahnieh ei ta, Arâ pheisaih thatlôpazy liata tlao amâ pahnieh.

ISAI 45:22

“Khizaw kaokih liata a ypa zydua saih u, Kei lâ a vaw heih u la, Pachhapa ta y teh u! Kei he Khazohpa cha châ na ta, Khazoh hropa y veih ei.

ISAI 53:3

Ano cha chyhsazy ta mohnaopa ta dytha ei ta, Pachârôhnazy a hneipa chyhsa châ ta, Pachâchhienazy a pahnopa a châ. Chyhsazy ta ama hmia ama nyusaipa chyhsa hawhta, Mohnaopa ta y ta; Keimo chhao ta, Ano cha pasâhsa hlei hra ma pi.

ISAI 8:17

Chavâta Zakaw pathlazy tawhta a hmia a nyu hapa Abeipa cha hâ aw na ta, ei mokhâh aw.

MIKÂ 7:7

Kei deikua cha Abeipa lâ ei moh aw; Ei pachhana Khazohpa hâ aw na ta, Ei Khazohpa ta einâ thei aw.

ZEKARIA 12:10

“Chatawhcha Dâvi pathlazy chô liata nata Zerusale liata a pahrâpazy chô liata ngiachhiena nata zawngiahna thlahpa ei hry aw. Chatanachata ama hriechheih hapa kei he na moh aw ei ta, sawchapaw matlupa mâchhie sapa hawhta keima châta mâchhiesa aw ei ta, sawchapaw uhtheipa pahleipa hawhta thata ama vâ â sâh aw.

MALUHREINA 21:9

Cha hawhna chata Mawsi ta dawh parih tao ta, atôh liata chaluah ta. Parih pachupa maihta dawh parih cha ama moh nahta, hroh lymâ ei ta.

MATHAI 16:21

Cha rakha tawhta cha Zisu ta a pachupazy hnohta Zerusale lâ a khy awpa nata machâzy, theihthai beizy nata ryhpa pachutuhpazy ta pasa thata ama pataosa awpa kyh nata, ama thie awpa nata noh thôh noh ta pathyupa ta a y awpa kyh zy reih pathao ta.

MATHAI 20:28

Chyhsa Sawchapawpa tlai chhao he, chyhsa ta ama chakaopa châ awpa ta a zupa châ leipa ta, chakaotuhpa châ awpa nata chyhsa hluhpi chatlai nawpa ta a hrona pie awpa ta a zupa a châ,” tah ta.

MÂKA 14:36

“Abâ, ei Paw, nâma châta la, ato tao theipa a châ. He nyu he kei tawhta pasie ha mah y. Châhrasala keima rei châ leipa sala, nâma rei tlao châ mawh sy,” tah ta.

MÂKA 15:28

Chatanachata, “Moleipazy hry liata rei pâpa a châ,” tahpa Biehrai bie a vaw tlô paki haw.

MÂKA 16:19

Chatanachata Abeipa Zisu cha ama hnohta bie a reih khai nahta, vârâh lâ a chhipa ta y ta, Khazohpa chachâh lâta a kaw tyuh ha ta.

MÂKA 9:12

Zisu ta ama hnohta, “Hmo to zydua tao pathi awpa ta Elaizâh cha â vy tuapa tlai a châ. Cha khiahta la, Chyhsa Sawchapawpa cha pasana hluhpi tao aw ta, mohnaopa ta a y awpa kyh cha, khâpa vâta ropa ma a châ?

MÂKA 9:24

Hawtipa paw cha thlai awh ta, “Ei ngiâpâ na, ei ngiapâleina liata na bao mah y,” tah ta.

LUKA 17:5

Lyuhchâpazy ta Abeipa hnohta, “Eimâ ngiapâna papôhsa mah y,” tah ei ta.

LUKA 23:11

Herawda nata a pheisaihzy ta Zisu cha mohnao kawpa ta pasipasawh ei ta. Poh rônahpa pabupa ta, Pilâ lâ hlâ pakhua ha ta.

LUKA 24:26

Mesia cha, cha hmozy cha pasa taopa ta a rônahna liata â ngia awpa châ vei ma?” tah ta.

ZAWHÂNA 1:29

A mylâ ta Zawhâna cha Zisu ta a vaw pangai haipa hmô ta, “Moh teh u, Khazoh Mietakutaw, khizaw moleina a siekheituhpa huh!

ZAWHÂNA 12:24

Hmeiseihta ta, hmeiseihta ta ei cha chho ei, sâh hmô cha alei liata tla leipa sala, a thi leipa khiahta cha, ano dei ta y ta, a thi khiahta deikua cha, thei hluhpi a pathei tyh.

ZAWHÂNA 12:32

Kei he alei tawhta chaluahpa ei châ tita, chyhsa zydua kei lâta ei sy aw ei,” tah ta.

ZAWHÂNA 13:3

Zisu cha Paw ta a ku liata hmo to a pavaosapa kyh nata Khazohpa tawhta a vaw puapa a châpa nata Khazohpa lâta a sie heih awpa a châpazy pahno thlâh ha ta.

ZAWHÂNA 6:40

He he ei Paw khopa cha a châ, ahy rai Sawchapawpa hmô ta a ngiapâpa maih cha chhâzaw hrona hnei aw ei ta, noh chhâna noh liata ei pathyu aw ei,” tah ta.

ZAWHÂNA 8:56

Nâmo châ pathlatuhpa Abarahâ kha, keima noh hmô awpa hnabeiseihpa ta, a thapha ngaita tyh. Ei noh cha hmô tlai ta, â ly ngaita,” tah ta.

HMOTAOPAZY 2:36

Chavâta Zisu nama khaipâpa tlai kha, Khazohpa ta Abeipa nata Mesia ta a taopa a châ tahpa cha, Izarei phopi zydua ta pahno tlai mawh ei sy,” tah ta.

HMOTAOPAZY 3:15

Hrona pietuhpa cha thie ei chi ta, châhrasala Khazohpa ta ano cha athihpa hry tawhta a pathyu haw. Cha cha a pahnotuhpazy eima châ.

HMOTAOPAZY 5:31

Izarei parosa ta, moleinazy a ngiahthai awpa ta, Khazohpa ta ano cha a chachâh lâta patyusa ta, Hyutuhpa nata Pachhatuhpa ta y awpa ta a cheihchalo haw.

HMOTAOPAZY 5:41

Lyuhchâpazy cha ryureina tawhta pua ei ta, cha moh vâta maophyuhna a tao tlâhpa ta raopa ama châpa cha a ly ngaita ei ta.

1 KAWRINI 1:18

Kraws bie cha leidia haipazy châta hruna châ ta, keimo, pachha haipazy châta deikua cha, Khazohpa hmotaotheina a châ.

1 KAWRINI 1:23

Keimo deikua cha, Krista khaipâpa thâtih eima chho. Cha cha Zuzy châta achapiana châ ta, Zenitaizy châta hruna a châ.

EPHESI 2:16

Kraws zawhzi ta panozy cha pôhpa miakha châpa ta, Khazohpa nata miah paryhsa ta, chatanachata akhakhaina cha a thie haw.

EPHESI 5:2

Krista ta kyh miah pachâ ta, ropahâhpa châta Khazohpa lâta hmohlâpa ta nata atheihna ta keimo châta â piepa hawhna khata, kyhpachâna hro ta nâmo chhao hroh teh u.

PHILIPI 1:6

Nâmo liata raihria phapa a pathaotuhpa khata, Zisu Krista noh liata a pangoh aw tahpa ei ngiapâ.

PHILIPI 3:20

Keimo khihsana deikua cha vârâh liata y ta, vârâh tawhta Pachhatuh Abeipa Zisu Krista a zu awpa cha ngiatiah leipa ta eima hâ.

2 TIMAWTHY 4:8

Tahmâ cha siana lakho ei châta sopa châ ha ta, cha cha Abeipa, pachiatuhpa sia ngaitapa ta, cha noh liata eina pie aw. Kei dei châ leipa ta, â vaw luahna a mokhâhtuhpa zydua hnohta chhao a pie aw ei.

HEBRAI 1:13

Vâlyuhchâpa ahy hnohta hmah, “Na chariahzy na phei tlyna ta ei tao hlâlei cha, Ei chachâh lâta a tyuh mah y,” tah beih hra vei.

HEBRAI 1:3

Ano cha Khazohpa rônahna khaihpaliepa nata Khazohpa chhichâna a hneipa châ ta, a bie hmotaotheina bie ta ato a pabohsa. Moleinazy a pathaisa khai tawhta, chô lâ Beichaipa chachâh lâta a tyuh ha ta.

HEBRAI 10:14

Ei kha â hlâna ta a pathaisa hapazy cha, chhâzaw châta a pakipa ha ei.

HEBRAI 10:33

A châh ta vâtlâh mohmô ta pasipasawhpa nata taolapa ta y ei chi ta, a châh ta pasipasawhna nata taolana a taopazy namâ duakhei tyh.

HEBRAI 11:36

Mohropazy chhao pasipasawhna nata tuna zy vâta pasa tao ei ta, bâlia nata patâhna zy amâ tyh.

HEBRAI 12:3

Nama palôh thazei leipa ta, nama tha a chhâ lei nawpa ta, moleipazy ta amâ dyuhna vâta pasa a taopa Zisu thâtih pachâ tyh muh vy.

HEBRAI 13:13

Chavâta riehmo khôtho liata ano yna lâ pua sih la, reipachhiena a phaopazy cha phaokhei suh u.

HEBRAI 5:9

chavâta pakipa ta taopa vaw châ ta, a rei a ngiahpa zydua châta chhâzaw pachhana hnawh a vaw châ haw.

HEBRAI 7:19

Ryhpa bie ta khâpa hmah pakisa thei vei. Hnabeiseihna pha viapa vaw tlô ta, cha hnabeiseihna vâna chata Khazohpa eimâ hnia thei haw.

HEBRAI 8:1

Rei eimâ chhuahpa cha he he a châ: Cha hawhpa theihthai beichaipa cha hnei pi ta, ano cha vârâh liata Beichaipa beidyuchhai chachâh lâta a tyuhpa châ ta,

HEBRAI 9:28

Cha hawhna chata Krista chhao chyhsa hluhpi moleinazy siekhei awpa ta ei kha hlâpa ta y ta, a einona ta â vaw luah tita deikua cha, moleina siekhei awpa châ khao leipa aw ta, ngiatiah lei ta ano hâtuhpazy pachha awpa ta â vaw luah aw.

ZÂMIE 2:1

Unawh saih u, eima Beipa Zisu Krista, rônahna Beipa ngiapâtuhpa nama châpa hawhta, khokhei viapa hnei khuh vy.

1 PITY 1:11

âmo liata a ypa Krista Thlahpa ta Krista pasa tao awpa nata cha khai tawhta palyupalihna a vaw pazi awpazy kyh ama rei chhielie nona khata, khati ta ma vaw tlô aw ta, kheihawh ta a vaw tlô awpa ma a châ tahpa zy amâ laichadai tyh.

1 PITY 3:18

Khazohpa lâ miah â chhi thei nawpa ta, Krista cha moleinazy châta chhâzaw châta ei kha thi ta, mosiapa cha moleipa vyuhpa ta thi ta, sapa liata thiepa ta y ta, thlahpa liata deikua pahropa ta a y.

1 PITY 3:22

Zisu Krista cha vârâh lâ kiah ta, Khazohpa chachâh lâta y ta, vâlyuhchâpazy, biehneinazy nata hmotaotheinazy cha ano rei sai ta y awpa ta taopa ama châ.

ZUDÂH 1:21

Khazohpa kyhpachâna liata a pabohsa u la, eima Beipa Zisu Krista ngiachhiena, chhâzaw hrona lâ a chhi theipa cha hâ muh vy.

BIEPHUAH 1:11

“Kei he Alphâ nata Ômekâ, âthaona nata achhâna ei châ. Na hmo hmôpa kha châbu liata roh la, Awnanopa hlao sarizy, Ephesi, Smynâ, Pekamu, Thiatirâ, Sadisâ, Philadelphia nata Laodisi Awnanopazy lâ paphao mah y,” a tahpa thei na ta.

BIEPHUAH 1:17

Ano cha ei hmô nahta, athihpa hawhta a phei thaby liata pao na ta. Châhrasala ano ta a ku chachâh lâ ei chô liata vaw pahnieh ta, ei hnohta, “Chi khah y, kei he âthaona nata achhâna châ na ta,

BIEPHUAH 1:8

Abeipa Khazohpa ta, “Kei he Alphâ nata Ômekâ châ na ta, a y haipa, a y hapa nata a vaw y awpa, Atotaotheipa ei châ,” a tah.

BIEPHUAH 2:8

“Smynâ Awnanopa vâlyuhchâpa hnohta hetana heta roh teh: ‘Âthaona nata achhâna, thi ha ta, a vaw hroh heihpa khata he biezy he a reih.