HEBRAI 11:6 - Mara Bible RV (BSI)

⁶ Ngiapâna leipa ta cha Khazohpa palysa thei rimâ awpa châ vei. Khazohpa a pangaipa maihta, Khazohpa a y tahpa amâ ngiapâ awpa châ ta, ano a tluatuhpa cha Khazohpa ta lymâ a pie tyh tahpa amâ ngiapâ awpa a châ.

HEBRAI 11:6 ပူးပေါင်းရင်းမြစ်များ

ÂTHAONA 15:1

Cha khai tawhta Abeipa bie cha aluahna ta Abarâ hnohta vaw tlô ta, “Abarâ, chi khah y, Na vyhphao châ na ta, Na lymâ rônah ngaitapa ei châ,” tah ta.

1 THÂTIHZYRONA 28:9

“Nâ, Sawlawmaw, ei sawchapawpa y, na paw Khazohpa he pahno la, pathipalôh tlokhuh ta nata tao khona palôh hneipa ta ano cha chakao mah y. Abeipa cha palôh zydua mohtuhpa châ ta, achhuahna nata pachâna zydua pahnotuhpa a châ. Ano cha na tlua khiahta cha, hmô awh chi ta, nâ heihsai khiah deikua cha, chhâzaw ta a cha thy aw.

ZAWBÂ 21:14

Khazohpa hnohta, ‘Miah siesai teh! Na lâpizy pahno khoh ma pi.

HLAZY 106:24

Râh khochhihpa dytha ei ta, A bietai zo khao veih ei.

HLAZY 119:10

Ei palôh zydua ta cha tlua na ta, Na biepiepazy tleisai awpa na pasaih khah y!

HLAZY 58:11

Chatanachata chyhsapa ta, “Mosiapa châta lymâ y tlai ta, Khizaw ryureihtuh Khazohpa a y tlai na,” a tah awh.

HLAZY 73:28

Kei châta deikua cha, Khazohpa a hniapa he a pha na; Abeipa Zehôvâh cha ei chhaina ta hmâh na ta, Na raihria kyh zydua ei chho lymâ aw.

HLAZY 78:22

Khazohpa a ngiapâ leipa ei ta, A pachhana ama ngâ leipa vâta, Cha hmo cha ama chô liata a tlôpa a châ.

HLAZY 78:32

Cha zydua cha amâ tyhpa chhao ta, Molei ngâ thlâh chy ei ta; Hmonoâhpazy a taopa chhao ta, Zo hlei veih ei.

BIESOZY 11:18

Moleipa cha dôveina hmâpa ta hlao tyh ta, Siana chi a tupa deikua cha lymâ dopa a hmô tyh.

BIESOZY 8:17

Kyh nâ pachâtuhpazy cha ama kyh pachâ na ta, Palôh hmeiseihpa ta nâ tluapazy ta eina hmô ei.

ISAI 55:3

Nama nah pachôhpa ta kei lâ a vy u la, Nama hro thei nawpa ta ei bie nathlie teh u, Nama hnohta tlyzaw biehrai ei tao aw; Dâvi hnohta bie ei taihpa kha pa-i aw na ta, Ei kyhpachâna ngâchhihpa ei pa-i aw.

ISAI 7:9

Epharai luh cha Samâri châ ta, Samâri luh cha Remâliah sawchapaw­pa a châ. Namâ ngiapâna â i vei khiahta la, Â ipa ta a duah thei aw veih ei chi,’ a tah,” tah ta.

ZEREMIAH 2:31

Hy Nâmo, he chhâ sawzy saih u, Abeipa bie nathlie teh u. Izarei sawzy châta râhchawhpa hawhta ei châ beih ma? Râh zoh kaluhpa hawhta ei châ beih ma? Cha ta a châ tlôh khiahta cha, Khazia ei phopi ta, ‘Khotalaina eima hmô haw, Nâ lâ a vy khao aw ma pi,’ ama tah tly?

MALUHREINA 14:11

Abeipa ta Mawsi hnohta, “He chyhsazy heta khachâ ma eina mohnao aw ei? Ama hry liata ngiana hmonoâhpazy ei taona chôta khachâ ma na ngâ leipa ta ama y aw?

MALUHREINA 20:12

Châhrasala Abeipa ta Mawsi nata Arawna hnohta, “Na ngâ leipa ei chi ta, ei pathaihna hawhta Izarei sawzy mohmô liata eina palyupalih leipa vâ ei chi ta, he zawpizy he âmo ei piepa râh tlôkhei aw veih ei chi,” tah ta.

MATHAI 11:26

A châ na, ei Paw, cha hawhpa cha na khopa châ tlôh ta.

MATHAI 5:12

A ly u la, thaphapa ta y teh u, vârâh liata nama lymâ hluhpi a y. Cha hawhna chata, nâmo hlâta a vaw y tuapa hrohsopazy chhao ama vaw taola tyh.

MATHAI 6:16

“Kâhvileipa ta nama y tita, phapakheipazy hawhta thachhâna hmia phaoh khuh vy. Âmo cha kâhvileipa ta ama ypa chyhsazy ta ama pahno thei nawpa ta, thachhâna hmia ama palâsa tyh. Hmeiseihta ta ei cha chho ei, ama lymâ ama hmô haw.

MATHAI 6:33

Khazohpa khinarâh nata a siana tlua tua u la, cha hmo zydua cha baichhapa nama châ aw.

MATHAI 6:5

“Thlah nama chhâ tita, phapakheipazy hawhta tao khuh vy. Âmo cha chyhsa ta ama hmô thei nawpa ta, pakhyna ozy liata nata khiliah suzy liata a duahpa ta thlah ama chhâ tyh. Hmeiseihta ta ei cha chho ei, ama lymâ ama hmô haw.

MÂKA 16:17

He ngianazy heta ngiapâtuhpazy cha a zi lymâ aw: Ei moh ta ahripazy papua aw ei ta, reih thiehpa ta reih aw ei ta,

LUKA 12:31

A khinarâh tlao tlua u la, cha hmozy cha baichhapa nama châ aw.

LUKA 6:35

Nama khakhaipazy kyh pachâ u la, ama phana awpa tao u la, a vaw kua heih awpa hnabeiseih leipa ta dyu pacheisa teh u. Chatanachata nama lymâ hluh aw ta, Chônôchaipa sawzy nama châ aw. Ano cha alyna châh pahno leipazy nata moleipazy chhao a ngiachhie theipa a châ.

ZAWHÂNA 14:6

Zisu ta a hnohta, “Kei he lâpi nata biehmeiseihpa nata hrona ei châ. Kei liata a sie leipa cha ahy hmah Paw kô tlô thei aw vei.

ZAWHÂNA 8:24

Chavâta nama moleina liata nama thi aw, ei cha tahpa ei a châ. Kei he Mesia ei châ tahpa nama zo leipa khiahta la, nama moleina liata nama thi aw,” tah ta.

RAWMA 10:14

Cha khiahta la, amâ ngiapâ leipa cha kheihta ama pado thei aw? Ama thei beih leipa cha kheihta amâ ngiapâ thei aw? Biechhotuhpa y leipa ta kheihta ama thei thei aw.

KALATIA 5:6

Krista Zisu liata la, chopawtaipa tlyma, chopawtaileipa tlyma, phahnaina hnei veih ei. Kyhpachâna ta rai a hriapa ngiapâna dei he a phahnai.

HEBRAI 11:26

Lymâ to awpa a saipa vâta, Krista vâta reipachhiena a tyhpa cha Izi râh ryuzy hlâta ryu sôh viapa ta a rao.

HEBRAI 3:12

Unawh saih u, a sohsi teh u. Chataleipatala nama hry liata ahy chhôh liata tlyma ngiapâleina palôh moleina vaw y aw ta, Khazoh hrohpa nama paosai pathlei aw na.

HEBRAI 4:2

Ama hnohta thâtihpha chhopa a châpa hawhta, keimo hnohta chhao chhopa châ ta, châhrasala bie ama theipa cha ngiapâna ta a pa-i leipa vâta, âmo châta phahnaina hnei vei.

HEBRAI 4:6

Thokha cha apahâna liata a ngia aw ei ta, thâtihpha a dao tuapa thokhazy deikua cha, ama reingiah leina vâta a ngia thei aw veih ei.

HEBRAI 7:19

Ryhpa bie ta khâpa hmah pakisa thei vei. Hnabeiseihna pha viapa vaw tlô ta, cha hnabeiseihna vâna chata Khazohpa eimâ hnia thei haw.

HEBRAI 7:25

Zisu cha chyhsazy châta thlahchhâ awpa ta chhâzaw ta a hroh thlâhpa a châpa vâta, ano siepahliepa ta Khazohpa a pangaipazy cha, khatino rai ta a pachha thei ei.

2 PITY 1:10

Chavâta unawh saih u, a cha awna ei nata a châ tlyhna ei cha, pa-i awpa ta tiama papua rili teh u. Chazy nama tao khiahta cha pao beih aw veih ei chi.

2 PITY 1:5

Cha vâna tlai chata nama theina zydua papua u la, namâ ngiapâna liata adona a hlao sala, adona liata pahnona a hlao sala,

2 PITY 3:14

Chavâta kho ngaitapa saih u, cha hmozy a hâtuhpa nama châpa vâta, apuapa a bai leipa nata seina hnei leipa ta, thlalôhpa ta nama ypa a cha hmô thei nawpa ei ta, tiama papua teh u.

BIEPHUAH 21:8

Riahchhiepazy, ngiapâleipazy, pasichhihpazy, lianycheihpazy, sihryhpazy, dyuthaipazy, nothlahpa achhypazy nata haiphiahpa zydua to awpa deikua cha, mei nata kaih ta a kâ ngâpa tipo châ aw ta, cha cha thina einona a châ,” tah ta.

RUTHI 2:12

Na hmotaopazy cha Abeipa ta cha thô sala, nâ boh nawpa ta a mathlaw ry liata nâ vaw ngiapa Abeipa Izarei Khazohpa ta lymâ kipa cha pie mawh sy!” tah ta.