EZRÂ 6:14 - Mara Bible RV (BSI)

¹⁴ Hrohsopa Hâkai nata Idô sawchapawpa Zekaria zy hrohsona bie phuahpa hawhta, Zu machâzy ta o cha sa ei ta, ama hmasie lymâ ta. Izarei Khazohpa biepiepa hawhta nata Persia beizy, Kôresâ, Dâria nata Âtazezia zy biepiepa hawhta, Achhyna o cha sa ei ta, ama paloh haw.

EZRÂ 6:14 ပူးပေါင်းရင်းမြစ်များ

EZRÂ 3:8

Zerusale liata Khazohpa o ama tlô tawhta kô nona, thla nona liata, Siati sawchapawpa Zerubâbe nata Zôzadâ sawchapawpa Zesua nata ama heinawh theihthaipazy, Livai pathlazy nata seichâna tawhta Zerusale lâ a vaw liepa zydua ta Achhyna o paduapathina rai hria pathao ei ta. Kô kih tawhta chô lâ Livai pathlazy cha Abeipa o sana raihria hyutuhpazy ta ama rao.

EZRÂ 4:24

Chatanachata Zerusale liata Khazohpa o raihria cha a chalih ha ta, Persia bei Dâria â beina kô nona taihta â chalih haw.

EZRÂ 4:3

Châhrasala Zerubâbe nata Zesua nata Izarei pho pawhrâhpa hropazy ta ama hnohta, “Eima Kha­zohpa o sana liata namâ hlao hra nawpa kyh y vei. Persia bei Kôresâ ta bie miah a piepa hawhta, keimo tlai ta Abeipa, Izarei Khazohpa o cha eima sa aw,” tah ei ta.

EZRÂ 5:1

Cha daihti liata, hrohsopa Hâkai nata Idô sawchapawpa Zekaria ta Zudâh nata Zerusale liata Zu chyhsa a ypazy hnohta ama chô liata a ypa Izarei Khazohpa moh ta hrohsona bie phuah ei ta.

EZRÂ 5:13

Châhrasala Babylaw bei Kôresâ â beina kô khana liata, Bei Kôresâ ta he Khazohpa o he paduapathi awpa ta biepie ta.

EZRÂ 5:2

Siati sawchapawpa Zerubâbe nata Zôzadâ sawchapawpa Zesua cha thyu ei ta, Zerusale liata Khazohpa o paduapathina rai cha hria pathao heih ei ta. Khazohpa hrohsopazy chhao, âmo bao awpa ta ama hnohta y ei ta.

EZRÂ 6:3

“Biepapuapa: Bei Kôresâ â beina kô khana liata, Bei Kôresâ ta hetana heta bie a papua: Zerusale liata Khazohpa o kyh liata, atheihna hlâna o cha paduapathipa châ sala, â bônazy pa-ipa châ mawh sy. O cha dy sycharu a sâh aw ta, dy sycharu a kawh aw.

EZRÂ 6:8

Cha dei châ vei, Khazohpa Achhyna o paduapathina kyh liata, Zu machâzy châta nama tao awpa biepiepa ei tao. Hryuhna zydua pahawhpasâh leipa ta, Zu machâzy hnohta pie lymâ awpa châ ta, Chavah Haosâ râh tawhta râhpawzy tawhta piepa a châ aw.

EZRÂ 7:1

Cha hnôhlâ ta, Persia bei Âtazezia â bei nota, Ezrâ cha Babylaw tawhta Zerusale lâ khy ta. Ezrâ cha Seriah sawchapawpa châ ta, Seriah cha Azariah sawchapawpa châ ta, Azariah cha Hikia sawchapawpa châ ta,

EZRÂ 9:9

Seizy châ pi ta, châhrasala eima Khazohpa cha eima seichâna liata miah a heihsai vei. Persia beizy hmiakô liata eima chô liata a zawngiahna a palâsa. Eima Khazohpa o padua ta, a raonazy taopathi awpa ta, eima seichâna tawhta miah pahua ta, Zudâh nata Zerusale liata abohna thokhyzy miah a taopa.

NEHEMIAH 6:15

Chatanachata thokhy cha, noh sypangawh nata noh no chhôh sapa châ ta, Elul thla, noh kih nata noh pangawhna noh ta palohpa a châ.

ISAI 44:28

Kôresâ kyh liata, ‘Ano cha ei mietaku vaituhpa châ ta, Ano ta ei chhuahna zydua pi a patloh aw,’ A tahtuhpa ei châ. Zerusale kyh liata, ‘Paduapathipa a châ aw,’ tah na ta, Achhyna o kyh liata, ‘Nâ bôna lôbô bôpa a châ aw,’ A tahtuhpa ei châ.”

HÂKAI 1:1

Bei Dâria abeina kô nona, thla charuna, noh khana noh ta, hrohsopa Hâkai hmâpa ta Siati sawchapawpa Zudâh râh ryureituhpa Zerubâbe nata Zehôzadâ sawchapawpa theihthai beichaipa Zawsua hnohta Abeipa bie vaw tlô ta.

HÂKAI 1:8

Tlâh lâ kiah u la, tho za phaoh u la, o cha sa teh u. Cha cha a ly aw na ta, palyupalihpa ta ei y aw,” Abeipa ta a tah.

ZEKARIA 1:1

Dâria abeina kô nona, thla chariena liata, Idô sawchapawpa Berekiah, Berekiah sawchapawpa hrohsopa Zekaria hnohta Abeipa bie vaw tlô ta:

ZEKARIA 1:16

Chavâta Abeipa ta hetana heta a tah: Zawngiahpa ta Zerusale lâ kua heih aw na ta, cha liata ei o sapa châ aw ta, Zerusale chô liata thliena ri parai heihpa a châ aw,’ Pheisaihzy Abeipa ta a tah.

ZEKARIA 4:9

“He o pathaona lôbô he Zerubâbe ku ta bôpa châ ta, ano ku ta a patlô aw. Chatanachata Pheisaihzy Abeipa ta nama hnohta eina tuah tahpa nama pahno aw.

ZEKARIA 8:9

Pheisaihzy Abeipa ta hetana heta a tah: “Nâmo, tahmâ nota hrohsopazy pakah tawhta a puapa biezy a thei tyhpazy saih u, nama ku thapatlô teh u. He hrohsopazy he Achhyna o, Pheisaihzy Abeipa o lôbô bô nota a y hrapazy ama châ.