EZEKIA 40:6 - Mara Bible RV (BSI)

⁶ Chatawhcha nochhi lâ a heihpa chhikao lâ vawh ta, kahmi kiah ta, chhikao châkeih thlie ta, chôchahrei do kha a kawh.

EZEKIA 40:6 ပူးပေါင်းရင်းမြစ်များ

1 ABEIZY 6:8

A ry chai chhâh chhikao cha Achhyna o chho lâchhâh ta y ta, cha tawhta a liah chhâh lâ kiana nata a liah chhâh tawhta chhâh thôhna lâ kiana kahmizy a y.

1 THÂTIHZYRONA 9:18

Kha hlâta cha Livai mo riehmozy liata chhikao vaituhpa châ ei ta, nochhi lâta abei chhikao vaituhpazy ama châ.

1 THÂTIHZYRONA 9:24

Chhikao vaituhpazy cha nochhi, notla, maw nata chho, kao palih liata ama y tyh.

NEHEMIAH 3:29

Âmo a pazipa cha, Ime sawchapawpa Zadô ta ano o dady liata taopathi ta. Ano pazipa ta nochhi chhikao vaituhpa Sekaniah sawchapawpa Semiah ta taopathi ta.

HLAZY 84:10

Na dôhpachhôh tlyhmia liata noh kha ypa cha, Su hropa liata noh sâh kha ypa hlâta a pha via. Moleipa poh o liata pahrâpa hlâta cha, Ei Khazohpa o chhikao vaituhpa châ awpa ei khoh via.

ZEREMIAH 19:2

Hârâsi Chhikao angiana kiah liata Hinô Sawchapawpa Saikao lâ sie la, cha liata na hnohta bie ei cha chhopa he kei phuah mah y.

EZEKIA 10:18

Chatawhcha Abeipa rônahna cha Achhyna o chhikao tawhta pua ta, cherubizy chô liata a kei duah ta.

EZEKIA 11:1

Chatawhcha Thlahpa ta na chalo ta, nochhi lâ a heihpa Abeipa o chhikao lâ nâ chhi ta. Chhikao angiana kiapâh liata chyhsa pakih nata papangawh hmô ei na ta, ama hry liata phopi beimachâzy, Azu sawchapawpa Zazeniah nata Benai sawchapawpa Pelatiah zy chhao hmô ei na ta.

EZEKIA 40:20

Dôhpachhôh khôtho lâta a ypa, maw lâ a heihpa chhikao doh nata hâ thlie ta.

EZEKIA 40:22

A opyzy, a aikahzy nata a thiahrâ kôzy cha, nochhi lâ a heihpa chhikao o liatapazy nata amâ kho khai. Kahmi chhâhchabi miasari kiapa ta, chyhsazy ta a su lâ khy aw ei ta, a aikah ama hmô tua chai aw.

EZEKIA 40:24

Chatawhcha chho lâ nâ chhi ta, moh teh u, chho lâ liata chhao chhikao vaw y ta. A pâhchhô chatipazy nata a aikah thlie ta, ahropazy nata amâ kho.

EZEKIA 40:26

A kia nawpa ta kahmi chhâhchabi miasari y ta, a aikah vaw y tua ta, chavei chachâh ta thiahrâ kôzy nata pâhchhô chatipazy miakha chyu a y.

EZEKIA 40:5

Achhyna o khôtho liata, Achhyna o chadôpa ta thokhy y ta, chyhsa chata dy seihpa ta dy charu seihpa thliena chôchahrei chaba ta, dy kha cha dy kha nata pazah tie chyu a seih. Thokhy chhana zie cha thlie ta, chôchahrei do kha châ ta, â sâhna lâ chhao chôchahrei do kha a châ hra.

EZEKIA 40:7

Vaituhpa chhôhpadâhpazy y ta, a doh la chôchahrei do kha, a hâ lâ chôchahrei do kha chyu a châ. Vaituhpa chhôhpadâhpazy likawh cha dy pangawh chyu kawh ta, Achhyna o chhôh lâ angiana chhikao aikah kiapâh liata a ypa chhikao châkeih cha chôchahrei do kha a châ.

EZEKIA 41:16

ochhi châkeihzy, opy buahpazy nata pâhchhô liata atyunazy cha, a chhâh thôh ta, siphiah tawhta a opyzy taihta a zydua ta thophia ta pathopa a châ. Opyzy chhao pathopa a châ.

EZEKIA 42:15

Achhyna o pipa chhôh lâ a thlie khai tawhta, nochhi lâ a heihpa chhikao lâ nâ chhi ta, Achhyna o chheipâh zydua thlie ta.

EZEKIA 43:1

Cha khai tawhta, chyhsa chata nochhi lâ a heihpa chhikao lâ nâ chhi ta.

EZEKIA 43:17

Tlâhkhai chhao a doh nata a hâ â khopa châ aw ta, a doh lâ dy hrawh hleipalih, a hâ lâ dy hrawh hleipalih châ aw ta, a tlâh dy khophie a châ aw. A patyuna cha dy kha ta padôpa châ aw ta, maisâh kahmi cha nochhi lâ â heih awpa a châ,” tah ta.

EZEKIA 43:8

Ama châkeih cha ei châkeih kiapâh ta taopa ta, ama chhikao tôh chhao ei chhikao tôh kiapâh ta bôpa châ aw ta, âmo nata keima likawh liata pâhchhô deita paysapa ta, ei moh pathaihpa cha papuapalei khao aw veih ei. Ama hmotaopa pasichhihpazy ta ei moh pathaihpa papuapalei ei ta, chavâta ei hiehâhna ta âmo cha ei pahleipadia ha ei.

EZEKIA 44:1

Chatawhcha nochhi lâ a heihpa supathaihpa khôtho chhikao lâ nâ chhi ta. Chhikao cha a vaw khaw ha ta.

EZEKIA 46:12

Abei ta Abeipa lâta lôhthai hmohlâpa châta raopa hlâna tlyma, aryhna hlâna tlyma a hlâ tita, nochhi lâ a heihpa chhikao cha ano châta pahypa châ aw ta, Pahânoh ta a taopa hawhta, raopa hlânazy nata aryhna hlânazy cha a hlâ aw. Cha khai tawhta pua aw ta, a pua khai tawhta chhikao cha khawpa a châ aw.

EZEKIA 47:1

Chatawhcha Achhyna o ochhi lâ na kuakhei ta, Achhyna o châkeih ry tawhta nochhi lâta ti a lohpa hmô na ta. Achhyna o cha nochhi lâ a heihpa a châ. Ti cha maisâh chho lâta a ypa Achhyna o chachâh lâta châkeih ry tawhta vaw loh ta.

EZEKIA 8:16

Chatawhcha Abeipa o chhôh tlyhmia lâ nâ chhi ta. Abeipa Achhyna o lâ angiana, aikah nata maisâh likawh liata, chyhsa pakih nata papangawh rachhôh â tyuhpa hmô ei na ta. Abeipa Achhyna o hnôhchhypa ta a tyuh ei ta, nochhi lâ hmiachhypa ta, nochhi lâ tawhta noh a kaw chhipa cha a chhy ei ta.