EZEKIA 4:2 - Mara Bible RV (BSI)

² khihpi cha dôh hapa a châna palâsa la, khihpi dôhna diahsua nothlahpazy tao la, khihpi la thei nawpa ta khihpi thokhy leizaih pathlu thlupa nothlahpa zy tao mah y. Khihpi chadôpa ta pheisaihzy riehmo ama paryhpa palâsa la, thokhy chhuh pathlah nawpa nothlahpazy ta khihpi thokhy cha chadôsa mah y.

EZEKIA 4:2 ပူးပေါင်းရင်းမြစ်များ

2 SAMUELA 20:15

Zôabâ nata a pheisaihzy ta Sebâ cha Abela Bemâkâ khihpi liata dôh ei ta, a khih cha alei pacho thlu ei ta, alei cha khôtho thokhy liata kaw pacho ei ta. Zôabâ hnohta chyhsa a ypa zydua ta, thokhy cha papao awpa ta thata a chô ei ta.

ISAI 22:7

Na saikao pha chaipazy cha talailihzy ta bie ta, Thokhy chhikaozy liata arâ pheisaihzy amâ paziah.

ZEREMIAH 32:24

Moh tua, khihpi la awpa ta dôhna alei pathlupazy â kaw sâh kaw bâ hih. Zaozi nata chakâhna nata potlana zy vâta khihpi he a dyuhtuhpa Kaldia mo ku liata piepa a châ ha hih. Na reipa kha vaw tlô ha ta, moh tua, na hmô hih.

ZEREMIAH 33:4

Abeipa, Izarei Khazohpa ta, khihpi dôhna alei ama pathlupazy tawhta nata zaozi tawhta avaina tao nawpa ta, khihpi ozy nata Zudâh beizy ozy phiepa ta a yna kyh liata hetana heta a tah:

ZEREMIAH 52:4

Zedekia â beina kô chakina, thla hrawhna, noh hrawhna noh liata, Babylaw bei Nebukaneza cha a pheisaih zydua chhaota Zerusale siehnao ta. Khihpi cha dôh ei ta, khihpi dôhna diasuazy tao ei ta.

ZEREMIAH 6:6

Pheisaihzy Abeipa ta hetana heta a tah: “Zerusale thozy thlu u la, Khihpi dôh awpa ta, A thokhyzy alei pacho thlu teh u. Tlybaina ta a biepa khihpi châ ta, Hrie tlâhpa khihpi a châ.

EZEKIA 21:22

Zerusale châta pachaona cha a chachâh lâta vaw tlô ta, thokhy paraona tao awpa zy, thie awpa ta biepie awpa zy, adyuhna hladyuh pathluah awpa zy, thokhy chhikao paraona tao awpa zy, thokhy parao nawpa ta alei pathlu thlupa ta, khihpi dôhna diahsua chhôh awpa kyh zy a vaw tlô.

EZEKIA 21:27

Raona, raona, raona ei tao aw. Châhrasala paraotuhpa a vaw tlô hlâlei cha, paraopa châ mâh aw vei. A vaw tlô tita paraotuhpa hnohta ei hlâ aw.

EZEKIA 5:2

Su kha cha khihpi dôhna nohzy a chhâ tita, khihpi liah liata mei ta na rao aw. Su kha hropa cha, la aw chi ta, khihpi chheipâh zydua liata zaozi ta na chhawh aw. Su kha hropa heih cha, ziza liata hiepatla aw chi ta, ei zaozi phia aw na ta, ei chadaisa aw ei.

DÂNIAH 11:15

Maw bei a zu aw ta, khihpi dôh aw ta, thokhy alei pacho thlu aw ta, chatanachata thokhy ta a phapa ta dôhpa khihpi cha a la aw. Chho pheisaihzy ta toh thei aw veih ei, a pheisaih pha chaipazy chhao ta toh theina thatlôna hnei aw veih ei.