EZEKIA 39:17 - Mara Bible RV (BSI)

¹⁷ “Hy chyhsa sawchapawpa y, Abeipa Zehôvâh ta hetana heta a tah: Pavaw chi to nata râhsa chi to hnohta bie reih la, ‘A pahmaoh u la, a vy teh u. Nâmo châta atheihna kyhchhi ei chhuanohpa lâ a vy awpa ta, su to tawhta a pahmaoh u la, Izarei tlâhpizy liata atheihna kyhchhi rônahpa ei taopa lâ a vypa ta, sa nie u la, thisaih doh teh u.

EZEKIA 39:17 ပူးပေါင်းရင်းမြစ်များ

ZEPHANIA 1:7

Zehôvâh Khazohpa hmiakô liata a chalih teh u, Abeipa noh â hnia haw; Abeipa ta atheihna a chhuanoh ha ta, A hruapazy a pathaisa haw.

EZEKIA 39:4

Izarei tlâhpizy chô liata pao aw chi ta, nâ nata na pheisaih zydua nata na hnohta a ypa phopizy nama pao khai aw. Nama rizy cha sa hei a niepa pavaw to nata râh sahrâhpa to nie awpa ta ei pie aw.

ZEREMIAH 12:9

Ei ryuto cha kei châta Changie hawhta châ ta ma, Sa hei niepa pavawzy ta ama chadô tly? Sie la, sahrâhpa zydua kei pakhy la, Ano palâ awpa ta a vaw chhi mah y.

ISAI 34:6

Abeipa ta Bôzrâ khihpi liata atheihna hlâ awpa hnei ta, Edômâ râh liata thietuna rarôh ypa tao awpa a hneipa vâta, Abeipa zaozi cha thisaih ta bie ta, Thaw ta a khu; Mietakutawzy nata miezy thisaih ta bie ta, Mietaku tôhpazy lôpo thaw ta a khu.

ISAI 56:9

Râh sa zydua saih u, Nie awpa ta a vy u la, Râhmâhpa sa zydua saih u, Nie awpa ta a vy teh u.

ZEREMIAH 46:10

“Cha noh cha Pheisaihzy Abeipa Zehôvâh noh châ ta, Phuh a lana noh a châ; A khakhaipazy chô liata phuh â lana noh a châ. Pheisaihzy Abeipa Zehôvâh ta Maw lâ râh Ufrâti chavah kiah liata atheihna hlâ ha ta, Chavâta zaozi ta Izi mo cha, Lôhrâtlôna taihta palâ aw ta, Dâhphi paina taihta ama thisaih a doh aw.

ISAI 18:6

Kre zôh zydua cha tlâh pavaw rikawhpazy châta siesaipa châ aw ei ta, Lei sahrâhpazy châta siesaipa ama châ aw. Cha liana cha pahmôhzy ta nopi daihti hmâh tyh aw ei ta, Lei sahrâhpa zydua ta chasipaw daihti ama hmâh tyh aw.

1 SAMUELA 17:46

Tanoh he Abeipa ta nâma kha ei ku liata eina pie aw. Cha thie aw na ta, na luh cha tai aw na ta, Philistinâ pheisaih rizy cha tanoh he vâ pavawzy nata râhsazy ei pie aw ei. Chatanachata khizaw zydua ta Izarei liata Khazohpa a y tahpa ama pahno aw.

1 SAMUELA 16:3

Atheihna hlâna liata Zese cha aw aw chi ta, na tao awpa ei cha chho aw. A moh ei cha chho awpa cha sathaw eina thupa aw chi,” tah ta.

1 SAMUELA 9:13

Khihpi namâ ngiapa nahta, su sâhpa liata pati nie awpa ta a khy hlâta, ano cha thlai nama hmô aw. Atheihna châta byhnâ a aw ha tua awpa a byuhpa vâta, ano a tlô hlâlei cha zawpi ta pati nie aw veih ei. Cha khai tawhta hrua eihpazy ama nie tyh. Chavâta khy para u la, thlai nama hmô aw,” tah ei ta.

ÂTHAONA 31:54

Zakaw cha tlâh râh liata atheihna hlâ ta, a chiheihzy pati nie hrua ta. Pati ama nie khai tawhta, tlâh râh liana cha a rie ei ta.

MATHAI 24:28

Sawhsawpa yna liata vâkhiehzy amâ hmaoh tyh.

ISAI 34:7

Chaoliah tôhpazy Môabâ mo hnohta pao aw ei ta, Viahchaotaw chapawpazy chhao, Viahchao tôhpa thatlôpazy chhaota ama pao aw. Ama râh cha thisaih liata pachiepa châ aw ta, Ama dohlei cha thaw ta a khu aw.

ZEREMIAH 25:33

“Cha noh liata Abeipa ta a thiepa chyhsazy cha, alei chhâna hiakha lâ tawhta alei chhâna hiakha lâ taihta amâ zawh aw. Mâchhiesapa leipa aw ei ta, ama ri lapa châ leipa aw ta, pabupa châ hra aw veih ei. Alei chô liata ie hawhta ama châ aw.

EZEKIA 39:16

Khihpi moh cha Hamônâ tahpa a châ hra. Cha hawhna chata râh cha ama pathai aw.

ISAI 29:2

Zerusale cha a nô papo aw na ta, Mâchhiesana nata chaphôhtuna y aw ta, Ei châta chakoh maisâh hawhta a châ aw.

EZEKIA 29:5

Râhchawhpa liata cha thy aw na ta, Na chavah nga zydua chhaota ei cha thy aw. Lyurâhpa liata tla aw chi ta, Na ri lapa châ leipa aw ta, Pabupa châ hra aw va chi. Nama rizy cha, Lei sahrâhpa nata vâ pavawzy hnohta, Nie awpa ta ei pie aw ei.”