EZEKIA 3:12 - Mara Bible RV (BSI)

¹² Chatawhcha Thlahpa ta na chalo ta, ei hnôh lâ tawhta losihpa ru ngaitapa pyu thei na ta, “Abeipa rônahna cha a pahrâna su tawhta reithaipa ta y mawh sy!” tahpa ta ao vaw pua ta.

EZEKIA 3:12 ပူးပေါင်းရင်းမြစ်များ

1 ABEIZY 18:12

Ei cha puasaipa nahta, Abeipa Thlahpa ta ei pahno leina lâ châ chhi aw ta, Ahabâ cha kei chho aw na ta, a cha hmô thei tlôh vei khiahta cha, kei châ chakaotuhpa he ei thyutlia no tawhta Abeipa a chipa ei châpa chhao ta, eina thie thlâh ha aw mâh tâh.

2 ABEIZY 2:16

A hnohta, “Tahmâ pachâ teh, châ chakaotuhpazy hnohna heta chyhsa thatlôpa sypangawh ama y. Na zibeipa tlua awpa ta âmo cha pasiesa ei suh u. Abeipa Thlahpa ta khykhei aw ta, khataih tlâh liata tlyma, khataih saikao liata tlyma, a pathla thei ngyu mâh tâh,” tah ei ta. Elaisâh ta, “Nama pasiesa awpa châ vei,” tah ta.

HLAZY 148:2

A vâlyuhchâpa zydua saih u, Ano cha reithai u la; A vâ pheisaih zydua saih u, Ano cha reithai teh u!

HLAZY 26:8

Hy Abeipa, na yna o tlaichhai kaw na ta, Na rônahna pahrâna su ei tlaichhai ngaita.

ISAI 6:3

Chatawhcha serâfi pakha ta serâfi hropa hnohta, “Pheisaihzy Abeipa cha, A pathaih na, a pathaih na, a pathaih na; Leilô zydua a rônahna ta a bie,” tahpa ta a awsao raihrie ei ta.

EZEKIA 10:4

Abeipa rônahna cha cherubizy tawhta thyu ta, Achhyna o chhikao lâ a kaw pasie ta. Achhyna o cha meihdo ta bie ha ta, dôhpachhôh tlyhmia cha Abeipa rônahna khaihna ta a bie haw.

EZEKIA 11:1

Chatawhcha Thlahpa ta na chalo ta, nochhi lâ a heihpa Abeipa o chhikao lâ nâ chhi ta. Chhikao angiana kiapâh liata chyhsa pakih nata papangawh hmô ei na ta, ama hry liata phopi beimachâzy, Azu sawchapawpa Zazeniah nata Benai sawchapawpa Pelatiah zy chhao hmô ei na ta.

EZEKIA 2:2

Ei hnohta bie a rei hai nota, Thlahpa ei chhôh liata a ngia ta, ei phei ta na paduasa ta, ei hnohta bie a reipazy cha ei thei.

EZEKIA 3:11

Seichâna liata a ypa na phopi sawzy lâ sie la, ama nathlie tlyma, nathlie vei tlyma, ama hnohta, ‘Abeipa Zehôvâh ta hetana heta a tah,’ tahpa ta âmo cha kei chho mah y,” tah ta.

EZEKIA 3:14

Thlahpa ta na chalo ta, na siekhei ha ta. Abeipa ku thatlôpa ei chô liata a y thlâh hana chôta, palôh pasa ngaitapa nata hiehâh ngaitapa ta sie na ta.

EZEKIA 43:4

Abeipa rônahna cha nochhi lâ a heihpa chhikao lâ tawhta Achhyna o lâ a vaw ngia ta.

EZEKIA 43:5

Thlahpa ta na chalo ta, dôhpachhôh tlyhmia chhôh lâ nâ chhi ta. Abeipa rônahna ta Achhyna o cha pabie khai ha ta.

EZEKIA 8:3

A ku a lyupa vaw pazawh ta, ei sâ tô ta na vaw patu ta. Thlahpa ta na chalo ta, alei nata avâ likawh liata na soh ta. Thlahpa chata Khazohpa aluahna ta Zerusale lâ nâ chhi ta. Dôhpachhôh tlyhmia lâ angiana maw thokhy chhikao liata na soh ta. Hia patliasatuhpa, hiatliana khazoh nothlahpa dyuchhai cha, cha su liata a y.

EZEKIA 9:3

Izarei Khazohpa rônahna cha, a yna cherubizy tawhta thyupa ta, Achhyna o chhikao thaby lâ khy ta. Pala rih dipa chysia a tobi ta, a chai liata châsôh byh a vaopa kha aw ta.

HMOTAOPAZY 2:2

Eikhapi ta vârâh tawhta thlihpipa pathlipa pyu hawhta za tlô ta, cha chata amâ tyuna o cha pabie khai ha ta.

HMOTAOPAZY 8:39

Ti tawhta ama kaw pua nahta, Abeipa Thlahpa ta Phili cha a chhi ha ta, hrilyupa ta ano cha hmô khao leipa ta, thapha ngaitapa ta sie ha ta.

BIEPHUAH 1:10

Abeipa noh liata Thlahpa ta vaw y na ta, chatawhcha ei hnôhky lâta chiahmie pyu hawhta ao paro ngaitapa thei na ta, ao chata,

BIEPHUAH 1:15

A pheizy cha patisana mei liata pathaisapa dawh patliepa lyu ta, a ao cha tisaozy paropa pyu hawhta a châ.

BIEPHUAH 19:6

Chatawhcha zawpi hluhpi ao a lyupa thei na ta. Ti hluhpi pyu hawhta nata tôkalôhpa thata a thuapa pyu hawhta châ ta, ao chata, “Haleluia! Abeipa eima Khazohpa, Atotaotheipa ta ryu a reih.