EZEKIA 12:19 - Mara Bible RV (BSI)

¹⁹ Chatawhcha râhsawzy hnohta, ‘Abeipa Zehôvâh ta Izarei râh Zerusale khihsawzy kyh liata hetana heta a tah: Zerusale liata a pahrâpazy nôchhiena vâta, Izarei râh cha a chhôh liata hmo a ypa zydua tawhta roryhrapa ta paysapa châ aw ta, nôpopa ta ama pati nie aw ei ta, pachârôhpa ta ama ti ama doh aw.

EZEKIA 12:19 ပူးပေါင်းရင်းမြစ်များ

ZEKARIA 7:14

Khisô paipa hawhta, ama pahno leipa phopizy lâta ei papai ha ei. Chavâta ama siesaipa râh cha roryhrapa ta y ta, a ngiapa nata a puapa y khao veih ei. Râh khochhih ngaitapa cha roryhrapa râh lâta ama pachâsa haw,” Pheisaihzy Abeipa ta a tah.

MIKÂ 7:13

Râh deikua cha a chhôh liata a pahrâpazy vâta, Roryhrapa ta y aw ta; Ama hmotao theilâpazy vâta, Roryhrapa ta a y aw.

EZEKIA 6:14

Ama chô liata ei ku pazawh aw na ta, ama pahrâna su zydua, râhchawhpa tawhta Riblâ taihta, râh cha roryhrapa nata arypa ta ei tao aw. Chatanachata kei he Abeipa ei châ tahpa ama pahno aw.”

1 KAWRINI 10:28

Chyhsa ta, “He he atheihna châta hlâpa a châ,” tahpa ta a cha chho khiah ei ta deikua cha, châ chhotuhpa vâta nata chhie nata pha pahnona vâta, nama nie awpa châ vei.

EZEKIA 7:23

“Bâlia daih teh! Râh he thisaih palona moleina ta bie ta, khihpi chhao atudaina ta a bie ha hih.

ZEREMIAH 10:22

Nathlie tua u, bie pathâhpa vaw tlô ta, Maw lâ râh tawhta tyhreihna rarôh ypa a vaw pathâh hai. Zudâh khihpizy roryhrapa ta paysapa ta, Savaizy pahrâna ta tao awpa ta a vaw pathâh.

1 KAWRINI 10:26

“Alei he Abeipa eih châ ta, a chhôh liata hmo zydua chhao Abeipa eih a châ.”

EZEKIA 36:3

hrohsona bie phuah la, hetana heta reih teh. Abeipa Zehôvâh ta hetana heta a tah: Roryhrapa ta cha tao ei ta, su to tawhta cha chanaohpa ta, phopi hropazy eih vaw châ ha ei chi ta, chyhsazy ta ama rei awpa nata reipachhie awpa ta ama cha tao hapa vâta,

EZEKIA 4:16

Chatawhcha Abeipa ta ei hnohta, “Chyhsa sawchapawpa y, pachâ teh, Zerusale niedo hnawh chhie pachhô aw na ta, ama pati nie awpa tichho beihchho sapa ta, pachârôhpa ta nie aw ei ta, ama do awpa ti chhao panuapa ta, thlazohpa ta ti ama doh aw.

ZEREMIAH 33:12

“Pheisaihzy Abeipa ta hetana heta a tah: Chyhsapa nata râhsa y leina, he roryhrana su nata a khihpi zydua liana heta, mietaku vaituhpazy pahrâna suzy y heih aw ta, ama mietaku zawzy ama pabyusa heih aw.

ZEREMIAH 33:10

“Abeipa ta hetana heta a tah: ‘He he chyhsapa nata râhsa y leina roryhrana su a châ’ nama tahpa su, chyhsapa tlyma, a chhôh liata a pahrâpa tlyma, râhsa tlyma y leina Zudâh khihpizy nata Zerusale khiliahzy liana heta aozy thei heihpa a châ aw.

ZEREMIAH 32:28

Chavâta Abeipa ta hetana heta a tah: Pachâ teh, he khihpi he Kaldia mo ku liata nata Babylaw bei Nebukaneza ku liata pie aw na ta, ano ta khihpi he a la aw.

ZEREMIAH 18:16

Ama râh cha roryhrapa ta paysa ei ta, Chhâzaw ta hmaotô chie awpa ta ama tao. A chapiapa maihta noâh tah ei ta, Ama luh ama chahuah.

ZEREMIAH 6:7

Tikhaoh ta ti khâ a papuapa hawhta, A moleina khâ a papua. Atudaina nata raona pyu a chhôh liata theipa châ ta, Pasana nata hmahphaona zy ei hmiakô liata khâ ama y.

ZEREMIAH 4:27

Abeipa ta hetana heta a tah: “Râh pôhpalôhpa roryhrapa ta y aw ta, Chatahrasala chhâ pathlahna patlôsa aw va na.

ISAI 6:11

Chatawhcha kei ta, “Hy ei Zibeipa, khati taih ma a châ aw?” tah na ta. Abeipa ta hetana heta einâ chhy: “Khihpizy rao khaipa ta, Khihsawzy y khao leipa ta a y hlâlei; Ozy rua khaipa ta, Râh roryhrapa ta a y hlâlei;

HLAZY 107:34

Râh phapa chhao râh chhiepa a pachâsa haw, A chhôh liata a pahrâpazy paraona vâta.

HLAZY 24:1

Alei nata a chhôh liata a ypa zydua he Abeipa eih châ ta, Khizaw nata a chhôh liata a pahrâpa zydua chhao Abeipa eih a châ.

ZEREMIAH 25:11

“He râh zydua he râh rypa nata roryhrapa vaw châ aw ta, he phopizy heta Babylaw bei cha kô sysari ama chakao aw.