EPHESI 3:7 - Mara Bible RV (BSI)

⁷ Khazohpa ngiachhiena hmosaipiepa vâta, cha thâtihpha chakaotuhpa ta taopa châ na ta, cha chakaona rai cha a hmotaotheina hmâpa ta ei hnohta eina pie.

EPHESI 3:7 ပူးပေါင်းရင်းမြစ်များ

ISAI 43:13

“Tlyzaw tawhta Khazohpa vaw châ ha na ta, Ei ku tawhta a pachha thei awpa ahy hmah y veih ei. Hmo ei tao hapa cha, Ahy ma a panano thei aw?” Abeipa ta a tah.

HMOTAOPAZY 9:15

Châhrasala Abeipa ta a hnohta, “Vawh thlâh teh, ano cha Zenitaizy, abeizy nata Izarei sawzy lâta ei moh a ngiakheituhpa châ awpa ta, ei chhaichhi châta raopa a châ.

RAWMA 1:5

Ano vâta nata ano moh ta phopi to pangiapâsa ta, a bie pazyhsa awpa ta, ngiachhiena nata lyuhchâpa châna eima hmô.

RAWMA 12:3

Nama hry liata chyhsa ahy hmahta a châna dopa hlâta a sâh viapa ta a pachâ leipa sala, Khazohpa ta chyhsa to hnohta ngiapâna a piepa rakhapa lymâ hawhta, a châna dopa a pahno thai awpa ta, Khazohpa ta ngiachhiena eina piepa zawhzi ta ei cha chho ei.

RAWMA 15:16

Khazohpa thâtihpha châta theihthaina chakaona raihria liata, Zenitaizy hry liata Krista Zisu chakaotuhpa châta raopa ei châ. Chatanachata Zenitaizy hmohlâpa cha Thlahpa Pathaihpa ta pathaisa aw ta, a pyh tlâh a châ aw.

1 KAWRINI 15:10

Châhrasala Khazohpa ngiachhiena vâ deita ta, he ei châna he a to theipa ei châ. A ngiachhiena eina piepa cha hraoleipa châ vei. Cha dei châ leipa ta, lyuhchâpa zydua hlâta hriapasa via na ta, cha chhao cha keima hriapa châ leipa ta, Khazohpa ngiachhiena ei hnohta a ypa ta a hriapa tlao a châ.

1 KAWRINI 3:5

Apawlôsâ cha khâpa ma a châ? Pawla chhao cha khâpa ma a châ? Chakaotuhpa, nâmo châ pangiapâsatuhpa deita ama châ. Cha chhao cha Abeipa ta a piepa lymâ hawhta ama hria chyupa a châ.

2 KAWRINI 3:6

Khazohpa ta biehrai thiehpa chakaotuhpazy châ awpa ta miah patlohsa ta, ryhpa vâta châ leipa ta, Thlahpa vâta a châ. Ryhpa ta thie ta, Thlahpa deikua ta a pahro tyh.

2 KAWRINI 4:1

Cha chakaona cha Khazohpa zawngiahna vâta eima hnei theipa a châpa vâta, eima palôh chhâ vei.

KALATIA 2:8

Chopawtaipazy lyuhchâpa Pity chakaona liata rai a hriapa Khazohpa ta, kei, Zenitaizy lyuhchâpa chakaona liata chhao a hria hra.

EPHESI 1:19

Chatanachata a thatlôna rônahpa raihriazie hawhta, keimo ngiapâtuhpazy chô liata a hmotaotheina rônah ngaitapa cha, khâpa ma a châ tahpa nama pahno thei aw.

EPHESI 3:2

Khazohpa ta nâmo châta ngiachhie chakaona raihria eina piepa kyh nama vaw pahno ha aw.

EPHESI 3:20

Tahmâ keimo liata a hria tyhpa hmotaotheina lymâ hawhta, eima hiapa nata pachâpa zydua hlâta tha via syulyu ta a tao theituhpa Khazohpa hnohta,

EPHESI 3:8

Mopathaihpa chyh chaipa hlâta chyh viapa châ hraw sah la, pahno khai thei leipa Krista hneirôna cha, Zenitaizy hnohta chho awpa ta, cha ngiachhiena cha piepa ei châ.

EPHESI 4:16

Ano liana chata pôhpa pachiahpa to a pazaopakhypa ta, pachiahpa to ta ama raihria chyu a phapa ta ama hria nahta, pôhpa cha kyhpachâna liata a laiseih tyh.

KAOLAOSÂ 1:29

Cha châna chata hriapasa na ta, kei liata thatlô ngaitapa ta a hriatuhpa thatlôna zydua hmâpa ta ei tei lymâ.

1 THYSALAWNIKA 2:13

Keimo tawhta nama theipa Khazohpa bie namâ pyh nona kha, chyhsapa bie a pyhpa hawhta a pyh leipa ei chi ta, a châna dopa, Khazohpa bie hawhta namâ pyhpa vâta, Khazohpa hnohta alyna bie khâ eima reih tyh. Cha Khazohpa bie cha nâmo, ngiapâtuhpazy chô liata a hriapa cha a châ.

HEBRAI 13:21

a khopa nama tao thei nawpa ta hmo pha to ta cha tobi ei sala, a mohmô liata â lynazie ta nama y lymâ thei nawpa ta, Zisu Krista zawhzi ta nâmo liata hria lymâ sala, Zisu Krista hnohta chhâzaw nata tlyzaw ta rônahna y mawh sy. Amen.