DÂNIAH 9:26 - Mara Bible RV (BSI)

²⁶ Hâta ei sycharu nata ei no khai tawhta Mesia cha chhawh pathlahpa châ aw ta, khâpa hmah hnei khao aw vei. Abei a vy awpa chyhsazy ta khihpi nata su pathaihpa cha ama parao aw. A chhâ nawpa cha tisaih chhao ta vaw tlô aw ta, a chhâna taihta adyuhna a y aw. Roryhranazy cha vaw tlô awpa ta rao chhielie hapa a châ.

DÂNIAH 9:26 ပူးပေါင်းရင်းမြစ်များ

2 SAMUELA 21:5

Kibiô mo ta abei hnohta, “Miah a palâ khai hapa nata Izarei râh liata eima y hra lei nawpa ta miah pamua a chhuahpa chyhsa kha,

HLAZY 22:15

Ei thatlôna beihkao hawhta hi karâpa ta, Ei paleih ei dâh lâta a bai ta, Thina dohlei liata eina soh chi.

ISAI 28:2

Moh tua u, Abeipa ta chyhsa thatlôpa hnei ta, Hmotaotheipa a hnei; Ano cha pareih thlihpipa hawhta pathli ta, Chothyu hawhta a chanaohpa a châ; Vâkatlâ hawhta suah ta, Tisaih hawhta a lohpa a châ; A ku ta alei lâ a za pazaw aw.

ISAI 28:22

Chavâta chyhsa pahneisao khao khuh vy, Chataleipatala nama bâliazy pa-ipa a châ pathlei aw na; Pheisaihzy Abeipa Zehôvâh tawhta, Râh pôhpalôhpa parao nawpa biepiepa ei thei haw.

ISAI 53:8

Tlybaipa nata thailei pachâsapa ta a chhi ei ta, Châhrasala ano chhâ liata chyhsazy ta pachâ hlei veih ei. Ahrohpazy râh tawhta chhawh pathlahpa châ ta, Ei phopi paraona vâta hriepa a châ.

ISAI 8:7

pachâ teh u, Abeipa ta Ufrâti Chavah hawhta a laipa nata thatlôpa Asuria bei nata a rônahna zydua ama chô liata a palo thlu aw. A kao zydua bie aw ta, a ngiahkâ zydua taihta a bie khai aw.

ZEREMIAH 46:7

“Nile chavah hawhta lai ta, Chavah ti laipa hawhta â chatlaopa cha, Ahy ma a châ tly?

ZEREMIAH 51:42

Babylaw cha tilaipi ta vao ta, Tichatlaopa a aoh ngâpa ta a vao haw.

DÂNIAH 11:10

“Maw bei sawchapawzy ta a dyuh awpa ta a pachhuahpanoh aw ei ta, pheisaih hri hluh ngaitapa awpakhy aw ei ta, tisaih toh thei leipa hawhta vaw pua via ngâ thlâh ha aw ei ta, chho bei thokhy tlôna taihta amâ dyuh laih lymâ aw.

DÂNIAH 11:17

Chatawhcha maw bei cha a khinarâh pôhpalôhpa thatlôna chhaota chho lâ a heihpa ta zu aw ta, chho bei nata azaona a tao aw. Chho khinarâh a parao thei nawpa ta, chanôzy sawchanô pakha a lapinô châta a pie aw. Châhrasala â chhuahnazy a hlaotloh leipa aw ta, ano châta phahnai aw vei.

DÂNIAH 11:22

Pheisaih hluhpi a hmiakô liata tlokhuh chadai paipa ta y aw ei ta, pachhaih pazaoh khaipa ama châ aw, biehrai hyutuhpa chhao taih ta.

DÂNIAH 11:36

“Chatawhcha abei cha a khopa hawhta tao aw ta, anosasyh ta a pasâhsapa ta, khazoh to hlâta rônah viapa ta a tao aw ta, khazohzy Khazohpa a dyuhpa ta hmo anano ngaitapazy reih aw ta, hiehâhna daihti pakipa a châ hlâlei cha hmotaotheina a hnei aw, rao chiehpa hmo cha a tlô tlai awpa a châpa vâta.

DÂNIAH 9:27

Abei ta hâta ei kha chhôh chyhsa hluhpi hnohta biehrai a ipa tao aw ta, hâta khophie chhôh atheihna nata hmohlâpazy a pachhâsa aw. Chatawhcha roryhrana patlôsatuhpa chô liata chhâna daihti rao chhielie hapa patlai thlupa a châ hlâlei cha, roryhrana patlôsatuhpa cha pasichhihpa mathlaw chô liata a chohpa ta â vy aw,” tah ta.

HÔSIA 1:9

Abeipa ta a hnohta, “A moh ta Lôami bi teh. Ei phopi châ khao leipa ei chi ta, nama Khazohpa chhao châ khao va na” tah ta.

AMÔSÂ 8:8

He vâna heta râh a chalyu aw ta, A chhôh liata a pahrâpa zydua mâchhiesapa ta ama y aw. Râh pôhpalôhpa cha, Nile Chavah hawhta a kaw sâhpa ta, Izi Chavah hawhta pathluahpa châ aw ta, Pasysa heihpa a châ aw,” tah ta.

AMÔSÂ 9:5

Pheisaihzy Abeipa Zehôvâh cha, Alei hria ta a patisa theipa châ ta, Cha liata a pahrâpa zydua mâchhie ama sa; Nile chavah hawhta alei pôhpalôhpa pasâh thei ta, Izi Nile hawhta a pasysa heih theipa a châ.

NÂHU 1:8

Châhrasala tisaih patlôsa aw ta, A khakhaipazy a pahleipadia khai aw; A chariahpazy chhao, Zohna lâ a chadaipai khai aw ei.

MATHAI 22:2

“Vârâh khinarâh cha abei ta a sawchapawpa châta ahneina kyhchhi a taopa nata pakho theipa a châ.

MATHAI 22:7

Abei cha a hiehâh ngaita ta, a pheisaihzy tuah ta, cha liany cheituhpazy cha pahleipadia ei ta, ama khih chhao rao ei ta.

MATHAI 23:38

Moh tua u, nama o cha roryhrapa ta siesaipa a châ ha hih.

MATHAI 24:2

Âmo cha a chhy ta, “He zydua he nama hmô ma? Hmeiseihta ta ei cha chho ei, he liata alô pachopazy he lô kha hmah pahlôh leipa ta pacho pathlah khaipa a châ aw,” tah ta.

MÂKA 13:2

Zisu ta a hnohta, “He o rônahpazy he na hmô bao ma cha? Alô pachopazy he parao leipa ta miakha hmahta y aw vei,” tah ta.

MÂKA 13:7

Adyuhnazy nata adyuhna bie pathâhpazy nama thei tita, nôpopa ta y khuh vy. Chazy cha a vaw tlô awpa rai a châ, châhrasala chhâna la châ mâh vei.

MÂKA 9:12

Zisu ta ama hnohta, “Hmo to zydua tao pathi awpa ta Elaizâh cha â vy tuapa tlai a châ. Cha khiahta la, Chyhsa Sawchapawpa cha pasana hluhpi tao aw ta, mohnaopa ta a y awpa kyh cha, khâpa vâta ropa ma a châ?

LUKA 21:24

Zaozi ta thi aw ei ta, phopi zydua sei ta a chhipa ama châ aw. Zenitaizy noh â ki hlâlei cha, Zerusale cha Zenitaizy tlypâpa ta a y aw.

LUKA 21:6

“He alô â pachopa nama hmôpazy he, a zydua ta parao khaipa ta a y nawpa nohzy a vaw tlô aw,” tah ta.

LUKA 24:26

Mesia cha, cha hmozy cha pasa taopa ta a rônahna liata â ngia awpa châ vei ma?” tah ta.

LUKA 24:46

ama hnohta, “Hetana heta ropa a châ: ‘Mesia cha riethei tao aw ta, a noh thôhna noh ta athihpa hry tawhta thyu heih aw ta,

ZAWHÂNA 14:30

He tawhta la nama hnohta bie reih hluh thei khao aw va na, khizaw ryureituhpa a vy tlôh aw ta. Ei chô liata biehnei taraw vei,

2 KAWRINI 5:21

Krista zawhzi ta Khazohpa siana eimâ hly thei nawpa ta, moleina rai a hnei leipa cha, Khazohpa ta keimo vâta moleipa ta a tao.

KALATIA 3:13

“Tho liata bangiehpa maih cha chhiesapa ama châ,” tahpa ropa hawhta, Krista cha keimo châta chhiesapa ta y ta, ryhpa chhiesana tawhta miah a pachha haw.

1 PITY 2:21

Krista kha nâmo châta pasa a taopa vâta, nâmo chhao pasa tao awpa ta awpa châ ei chi ta, a pheihnie nama pazi thei nawpa ta a mopâ awpa a cha sopa ei.

1 PITY 2:24

Moleina thisaipa ta siana lâta eima hroh thei nawpa ta, eima moleinazy cha ano ta a pôhpa tlai ta tho liata phaoh ta, Krista hmahzy ta patlâhpa ta nama y haw.

1 PITY 3:18

Khazohpa lâ miah â chhi thei nawpa ta, Krista cha moleinazy châta chhâzaw châta ei kha thi ta, mosiapa cha moleipa vyuhpa ta thi ta, sapa liata thiepa ta y ta, thlahpa liata deikua pahropa ta a y.