DÂNIAH 5:11 - Mara Bible RV (BSI)

¹¹ Na khinarâh liana heta chyhsa pakha, ano liata khazoh pathaihpazy thlahpa a ypa a y mâh tâh. Na paw daihti liana kha, khaihna nata pahnona nata khazohzy sona hawhpa sona ano liata hmôpa a châ. Chavâta na paw Bei Nebukaneza, na paw abei kha ta, ano cha moliethaipazy, dyuthaipazy, awhsithaipazy nata pachaothaipazy hyutuh chaipa ta a tao.

DÂNIAH 5:11 ပူးပေါင်းရင်းမြစ်များ

ÂTHAONA 41:38

Phiraoh ta a chakaotuhpazy hnohta, “He hawhta Khazohpa Thlahpa ta a ypâpa chyhsa he eima hmô thei aw mâ?” tah ta.

2 SAMUELA 14:17

Abei, nâ ei zibeipa chi cha, Khazohpa vâlyuhchâpa hawhta, a chhiepa nata a phapa a pahrua thaipa na châpa vâta, na seichanô heta, ‘Ei zibeipa abei bie ta thlah eina palôh aw,’ tahpa ta ei pachâ. Abeipa na Khazohpa cha na hnohta y maw sy!” tah ta.

EZEKIA 28:3

Dâniah hlâta so via tlai chi ta, Nâ tawhta nyupa rai y vei.

EZEKIA 28:4

Na sona nata novâhna ta hneirôh chi ta, Na ryubyhzy liata ngôh nata tâkâ na pachô.

DÂNIAH 1:4

Âmo cha pizie liata seina hnei leipa satlia, hmiphapa, sona zydua a chu thei awpa duahmo liata â duahpa, hmo a pahno thaipa, pachâna pasohpa a hmâh thaipa nata abei o liata rai hria awpa ta a tlâh a châpazy ama châ awpa a châ. Aspenâza ta âmo cha Kaldia reih nata thainazy a pachu aw ei.

DÂNIAH 2:11

Abei hmo a hnawpa he a ru tu ha na; khazohzy na tah leipa ta cha ahy hmahta he hmo he abei a chhopasia thei awpa y aw veih ei, khazohzy hra cha chyhsazy hry liata pahrâ tlôh ei vâ,” tah ei ta.

DÂNIAH 2:22

Hmo a thupa nata a nyupazy palâhâh ta, Zohna liata a ypa pahno ta, A hnohta khaihna a pahrâ.

DÂNIAH 4:18

He mâ he, kei, Bei Nebukaneza ta sa na ta, nâ, Hy Beltesâza y, a chhopasiana cha phuah teh. Ei beinarâh liata chyhsa sopa zydua ta a chhopasiana na chho thei veih ei. Nâ deikua cha na tao thei aw, khazoh pathaihpazy thlahpa nâma liata a ypa vâta,” tah na ta.

DÂNIAH 4:5

Mâ sa na ta, cha chata na pachisa ngaita ta. Ei rakhô liata ei zia thlâh ha nota, ei pachâhpadypa nata ei luh liata aluahna ei hmôpazy ta na patypamâ ta.

DÂNIAH 4:6

Chavâta ei mâsapa na chhopasia awpa ta, Babylaw râh liata chyhsa sopa zydua ei hmiakô liata a vaw chhi awpa ta biepie na ta.

DÂNIAH 5:14

Khazohzy thlahpa cha nâma liata y ta, khaihna nata novâhna nata so patluana zy na hnei tahpa ei vaw thei.

DÂNIAH 5:7

Dyuthaipazy, awhsithaipazy nata pachaothaipazy ano lâ a vaw chhi awpa ta abei cha a paro ngaitapa ta awh ta. Abei ta Babylaw chyhsa sopazy hnohta, “Ahy rai he châropa he reih ta, a chhopasiana nâ chho theipa cha, poh saihlawpa pabupa châ aw ta, a rao liata ngôh pachhih paaopa châ aw ta, khinarâh liata ryureituhpa a sâh chaipa a pathôhna a châ aw,” tah ta.

HMOTAOPAZY 12:22

Zawpizy ta, “Khazoh ao a châ, chyhsapa ao châ vei!” tahpa ta awh ei ta.

HMOTAOPAZY 14:11

Zawpizy ta Pawla hmotaopa cha ama hmô nahta, Lykônia reih ta, ao paro ngaitapa ta, “Khazohzy ta chyhsapa hawhta keimo lâ amâ zu hih!” tah ei ta.

HMOTAOPAZY 16:16

Thlahchhâna su lâ eima sie nota, sei laihsa pakha ta miah a vaw tyh ta. Ano cha pachaothaina thlahpa a hneipa châ ta, pachaona bie a reipazy tawhta a zibeipa châta sôh hluhpi a hmô tyhpa a châ.

BIEPHUAH 3:9

Moh teh, Sâtâ pakhyna o liata chyhsazy, Zu chyhsa hmeiseihpa châ tlôh leipa ta, haipa ta Zu chyhsa â tahpazy cha na phei thaby liata vaw pabôhsa aw ei na ta, kyh ei cha pachâ tahpa ama pahno aw.