DÂNIAH 2:21 - Mara Bible RV (BSI)

²¹ Daihti nata khihchâh zy panano ta, Abeizy pabâ ta, abeizy a padua; Asopazy hnohta sona pie ta, Pahno thaipazy hnohta novâhna a pie.

DÂNIAH 2:21 ပူးပေါင်းရင်းမြစ်များ

1 ABEIZY 10:24

Kha­zohpa ta a palôh liata sona a sopa nathlie awpa ta, khizaw zydua ta Sawlawmaw cha ama pangai tyh.

1 ABEIZY 3:28

Izarei saw zydua ta abei ta bietluna a taozie cha thei ei ta, ryureina dopa siekhei nawpa ta Khazohpa sona a chô liata a ypa ama hmôpa vâta, abei cha chi ngaita ei ta.

1 ABEIZY 4:29

Khazohpa ta Sawlawmaw cha sona nata novâhna thata pie ta, tilaipi ngiahkâ liata sadi zie hawh tlai ta palôh kawhna a pie.

1 THÂTIHZYRONA 22:12

Abeipa ta Izarei chô liata biehneina a cha pie tita, Abeipa na Khazohpa ryhpa na zyh thei nawpa ta, Abeipa ta sona nata novâhna cha pie mawh sy.

1 THÂTIHZYRONA 29:30

A ryureina thâtih zydua, a thatlôna thâtihzy, ano nata Izarei chô liata hmo a tlôpa thâtihzy nata khizaw hropa lâta khinarâhzy liata hmo a tlôpa thâtihzy chhao ropa a châ hra.

ESTHERI 1:13

Abei ta hmo pahno thaipa chyhsa sopazy a saohiah ta. Ryhpa nata pachiana kyh liata chyhsa sopazy a saohiahpa cha abei taozie tyhpa a châ.

ZAWBÂ 12:18

Beizy chaisaih pathlâ ta, Duakalâpa a papeisa ei.

PUASAINA 31:3

ano cha sona, novâhna, pahnona nata zôthaina tozy hnei awpa ta Khazohpa Thlahpa ta ei pabie.

PUASAINA 31:6

A hnohta a hria awpa ta, Dânâ chi Ahisamâ sawchapawpa Ôhôliaba ei rao. Tao awpa bie ei cha piepa zydua ama tao thei nawpa ta, novâhpa zydua palôh liata sona soh na ta,

DÂNIAH 1:17

He satlia papalihpazy he achuna nata thaina kyh to liata Khazohpa ta sona nata novâhna pie ta. Dâniah chhochhi cha aluahna nata mâ zydua taih chhao chhopasia thei ta.

DÂNIAH 10:1

Persia bei Kôresâ kô thôh â bei kô ta, Dâniah, a moh Beltesâza bipa hnohta bie vaw tlô ta. Bie cha a do ta, adyuhna rarôh ypa kyh a châ. Bie cha pahno thai ta, aluahna chhao cha a pahno thai hra.

DÂNIAH 11:6

Kô khazie tlyma a khô tawhta, azaona tao aw ei ta, chho bei sawchanô cha aryhna tao awpa ta maw bei lâ a khy aw. Châhrasala chho bei sawchanô ta a bâh thatlôna pabohsa thei leipa aw ta, maw bei chhao a duah thei leipa aw ta, a bâh thatlôna a duah thei hra aw vei. Bei sawchanô nata ano a chakaotuhpazy, a paw nata cha daihtizy liata ano a baotuhpazy chhao a paphasai khaipa ama châ aw.

DÂNIAH 2:20

Dâniah ta, “Sona nata thatlôna cha, Khazohpa eih châ ta; Khazohpa moh cha, Chhâzaw nata tlyzaw ta reithaipa ta y mawh sy!

DÂNIAH 2:23

Châ ly na ta, ei cha reithai, Hy pathlatuhzy Khazohpa y; Sona nata hmotaotheina na pie chi ta, Eima cha hiapa eina pahnosa ha chi; Abei mâsapa cha miah na pahnosa haw,” tah ta.

DÂNIAH 2:9

Khâpa mâ ma ei sa tahpa eina chho leipa khiah ei chi ta cha, hriena dei leipa ta cha nama to hro awpa y vei. Hmo â vaw nano laih awpa hnabeiseihpa ta, ei hmiakô liata haipa nata moleina biezy rei awpa namâ paraohpa a châpa ei pahno haw. Ei mâsapa cha na chho teh u, chatanachata a chhopasiana eina chho thei aw ei chi tahpa ei pahno aw,” tah ta.

DÂNIAH 4:14

A paro ngaitapa ta hetana heta awh ta, ‘Thokô kha thlu la, a chiahzy thlâ la, a hnazy pahrie la, a theizy hiepatla khai teh. A ry tawhta râhsazy pai ei sala, a chiah tawhta pavawzy a zaw khai mawh ei sy.

DÂNIAH 4:17

He pachiana bie he vaituhpazy biepiepa ta taopa châ ta, biepathlupa he mo pathaihpazy bie ta taopa a châ. Chônôchaipa cha chyhsazy khinarâh chô liata ryu a reihpa châ ta, a pie khohpa hnohta khinarâh pie ta, chyhsa nawh chaipazy chhao a pabeisa thei ei tahpa chyhsazy ta ama pahno thei nawpa ta,’ tah ta.

DÂNIAH 4:22

Hy abei y, kha thokô kha nâma he na châ. Kaw lai chi ta, na tha kaw tlô ta, na rônahna a sâh via rilipa ta avâ daih ta, nâ beinarâh chhao alei chhâna taihta a châ.

DÂNIAH 4:32

Chyhsazy hry tawhtapa papuapa ta y aw chi ta, na pahrâna cha râhsazy hry ta a châ aw. Viahchao hawhta sibiepa pabâsapa châ aw chi ta, na châta daihti mia sari a khô aw, Chônôchaipa ta chyhsazy khinarâh chô liata ryureih ta, a pie khohpa hnohta khinarâh cha a pie tyh, tahpa na pahno hlâlei cha,” tahpa ta.

DÂNIAH 7:25

Chônôchaipa chakhiana biezy reih aw ta, Chônôchaipa mopathaihpazy cha ama rie a pathei aw; Daihtizy nata ryhpazy panano a chhuah aw ta, Daihti miakha, daihtizy nata daihti khophie chhôh cha, A ku liata mopathaihpazy piepa a châ aw.

LUKA 21:15

Bie nama rei awpa cha pie aw ei na ta, sona cha pie aw ei. Nama khakhaipazy ta nama bie cha ei thei leipa aw ei ta, cha pachhaipadai thei aw veih ei.

RAWMA 13:1

Chyhsa to ta ama chô liata ryureituhpazy bie ama zyh awpa a châ. Khazohpa rao leipa ryureituhpa y veih ei. Ryureituhpazy cha Khazohpa raopa ama châ.

1 KAWRINI 1:30

Nâmo deikua cha, ano zawhzi ta Krista Zisu liata nama y. Ano cha keimo châta Khazohpa tawhta sona vaw châ ta, eima siana, pathaihna nata chatlaina a châ hra.

ZÂMIE 1:17

Hmosaipiepa phapa nata hmosaipiepa pakipa zydua cha chô lâ tawhta a zupa châ ta, khaihpazy Paw tawhta a zupa a châ. Ano liata ananona nata nohpahlipa y vei.

ZÂMIE 1:5

Nama hry liata ahy rai sona â phahla khiahta cha, Khazohpa lâ hiah mawh sy. Khazohpa cha chyhsa zydua hnohta riaphapa nata maochhie leipa ta sona a pietuhpa châ ta, sona a phahlapa hnohta sona piepa a châ aw.

BIEPHUAH 19:16

A poh liata nata a byhpi liata, “Beizy Beipa nata hyutuhpazy Hyutuhpa,” tahpa moh ropa a hnei.