DÂNIAH 12:3 - Mara Bible RV (BSI)

³ A sopazy cha avâ khaihpa hawhta khaih aw ei ta, chyhsa hluhpi siana lâta a paheisatuhpazy cha awhsi hawhta chhâzaw nata tlyzaw ta ama khaih aw.

DÂNIAH 12:3 ပူးပေါင်းရင်းမြစ်များ

PUASAINA 34:35

Izarei sawzy ta Mawsi hmia moh ei ta, a khaih ha tyh. Chavâta Mawsi cha Khazohpa bie a chho awpa ta â ngia heih hlâlei hmiakhuna ta a hmia cha a khu heih tyh.

BIESOZY 11:30

Mosiapa thei cha hrona tho châ ta, Chyhsa hro a pahnietuhpa cha asopa a châ.

BIESOZY 3:35

Asopazy cha palyupalihna ryu to aw ei ta, Ahrupazy deikua cha nohzaona ama to aw.

BIESOZY 4:18

Mosiapazy lâpi deikua cha khihdei khaihpa hawh châ ta, Nohchhô locho a tlô hlâlei a khaih via lymâ.

BIECHHOTUHPA 12:9

Biechhotuhpa cha sona a hneipa dei châ leipa ta, chyhsazy hnohta pahnona pachu ta, bieso hluhpi pachâ ta, a chu ta, a pha ngaitapa ta a paryhpakhy.

ISAI 53:11

Pasataona khô lâta hrona khaihna hmô aw ta, Palôhtlâh ngaitapa ta a y aw. Nâ chakaotuhpa chyhsa siapa cha, A pahnona hmâpa ta chyhsa hluhpi thai pachâsa aw ta, Ama paraonazy a phaopa aw ei.

ZEREMIAH 23:22

Ei ryureina liata â duah hrapa châ ei sala cha, Ei phopi hnohta ei bie phuah aw ei ta, Ama lâpi doleipa tawhta pakuasapa ta, Ama hmotaopa doleipazy tawhta ama pakuasa ha awpa tlai.

DÂNIAH 11:33

Zawpi hry liata chyhsa sopazy ta, chyhsa hluhpi pachu aw ei ta, châhrasala noh hluhpi chhôh cha zaozi ta tlyma, meipaleih ta tlyma, sei châna ta tlyma, hraona ta tlyma chyhsa hluhpi ama pao aw.

DÂNIAH 11:35

Daihti raopa a vaw tlô hlâ via cha, chyhsa sopa thokha chhao amâ chapia hra aw, daihti chhâna taihta pasiapa ta nata pathaisapa nata pangyuhpa ta ama y thei nawpa ta.

DÂNIAH 12:10

Chyhsa hluhpi âmosasyh ta a pathaisa aw ei ta, a pangyuhsapa ta amâ taopathi aw. Moleipazy deikua cha ama molei via rili aw. Moleipa ta a pachâna pahno leipa aw ta, chyhsa sopazy deikua ta cha ama pahno aw.

MATHAI 13:43

Chyhsa siapazy deikua cha, ama Paw khinarâh liata noh hawhta ama khaih aw. Nakhaoh a hneipa ta thei mawh sy.

MATHAI 19:28

Zisu ta ama hnohta, “Hmeiseihta ta ei cha chho ei, Chyhsa Sawchapawpa he khizaw thiehpa liata a rônahna beidyuchhai liata â tyu tita, nâmo, nâ zituhpa sahlaozy chi he, beidyuchhai miahrawh hleino liata a tyuh aw ei chi ta, Izarei chi hrawh hleinozy chô liata ryu nama reih aw.

MATHAI 24:45

“Cha khiahta la chakaotuhpa ngâchhihpa nata sopa, a zibeipa ta a o liata hyutuhpa ta a raopa, ama nie awpa a daihtita liata a pie lymâ tyh awpa cha ahy ma a châ tly?

ZAWHÂNA 4:36

Sâh hriatuhpa cha hlao hmô ta, chhâzaw hrona châta a theizy a pakhy, chatanachata a tutuhpa nata hriatuhpazy cha amâ ly raihrie aw.

ZAWHÂNA 5:35

Zawhâna kha meiôh khaihpa nata khaih ngaitapa châ ta, a khaihna ry liata thaphapa ta y chy awpa nama khoh kaw.

HMOTAOPAZY 13:1

Antiôkâ Awnanopa sahlaozy hry liata hrohsopazy nata pachutuhpazy y ei ta. Chazy cha Bânabâ zy, Nikâ ama tahpa Simeôna zy, Kurini khihpa Lukia zy, Bei Herawda unawh heihpa Manaina nata Sawla zy ama châ.

1 KAWRINI 3:10

Khazohpa ta ngiachhiena eina piepa lymâ hawhta, o satuhpa zôthaipa taozie hawhta, kei ta lôbô bô na ta, mohropa ta a chô liata o ama sa. Chyhsa to ta lôbô chô liata o ama sa awpa kyh liata a sohsi chyu mawh ei sy.

EPHESI 4:11

Chatanachata thokha lyuhchâpa châ awpa ta, thokha hrohsopa châ awpa ta, thokha biechhotuhpa châ awpa ta, thokha mietaku vaituhpa châ awpa nata thokha pachutuhpa châ awpa ta Krista ta a rao ei.

HEBRAI 5:12

A daihti pachâpa ta, pachutuhpa a châ bâ awpa châ ei chi ta, châhrasala Khazohpa bie thabypa pachu namâ ngiah thlâh ha chy. Sâhpiti a ngiah chy ei chi ta, pati hmeiseihpa nie thei mâh veih ei chi.

2 PITY 3:15

Eima unawh kho ngaitapa Pawla chhao ta, a hnohta sona piepa lymâ hawhta nâmo lâ châ a ropa hawhna khata, eima Beipa daotheizie he pachhana ta rao teh u.

BIEPHUAH 1:20

Ei ku chachâh lâta awhsi miasari na hmôpazy nata ngôh meiôh patyuna miasari na hmôpazy kyh liata bienyupa cha he he a châ: Awhsi miasarizy cha awnanopa hlao sarizy châta vâlyuhchâpazy châ ei ta, meiôh patyuna miasarizy cha awnanopa hlao sarizy ama châ,” tah ta.

RYUREITUHPAZY 5:31

“Cha hawhna chata, Hy Abeipa, Na chariahpa zydua leidia khai ei sala, Na viasazy deikua cha, Noh hawhta khaih ei sala, Thatlôpa ta thyu mawh ei sy!” Chatanachata râh cha kô sypalih chhôh thlalôhpa ta y ta.