BIEPHUAH 20:2 - Mara Bible RV (BSI)

² Drâkao parih hlôpa, ahripa nata Sâtâ cha patu ta, kô sâh kha châta chahry ta.

BIEPHUAH 20:2 ပူးပေါင်းရင်းမြစ်များ

ÂTHAONA 3:1

Zehôvâh Khazohpa ta râhsa a taopa zydua hry liata parih cha so piehpie chai ta. Parih ta chanô hnohta, “Khazohpa ta ‘Sadô liata tho thei kheihawhpa hmahta nama nie awpa châ vei’ a cha tah tlai ei ma?” tah ta.

ÂTHAONA 3:15

Nâ nata chanô likah liata, Akhakhaina paysa aw na ta, Na pathla nata a pathla chhao amâ khakhai aw. Ano ta na luh cha pakei aw ta, Nâ ta a phei ngavâhmaothy thi na padôsa aw,” tah ta.

ZAWBÂ 1:7

Abeipa ta Sâtâ hnohta, “Khataih tawhta a vypa ma na châ?” tah ta. Sâtâ ta Abeipa cha a chhy ta, “Alei chô liata vawh heih, a vy heih, khy heih, zu heih tahna tawhta â vypa ei châ,” tah ta.

ISAI 24:22

Atâhpazy hawhta khaohtlô liata pahmaohpa ta, Patâhna o liata khôpa châ aw ei ta, Noh hluhpi a sie tawhta hriepa ama châ aw.

ISAI 27:1

Cha noh liata, Abeipa ta a zaozi laipa, tiahpa nata thatlôpa hmâpa ta, Leviathâ parihpi a chakhao ngâpa cha a hrie aw. Leviathâ parihpi a pakipa cha hrie aw ta, tilaipi liata parihpi a ypa cha a thie aw.

EZEKIA 47:5

Dy sâh kha thlie heih ta, ti cha a lai kaw bâpa vâta, ei chaka thei leipa chavah vaw châ ha ta. A zaw khi ta âthupa, chaka thei lei awpa chavah vaw châ ha ta.

MATHAI 19:29

Ahy rai ei moh vâta ozy, unawhzy, sietanôzy, paw, nô, sawzy nata râhzy a siesaipa cha, a lie za kha ta hmô aw ei ta, chhâzaw hrona ama to aw.

MATHAI 8:29

Thata awh ei ta, “Khazohpa Sawchapawpa, kheihta miah tao awpa ma na khoh? Noh taihpa tlô hlâta riethei miah pataosa awpa ta ma nâ vy?” tah ei ta.

MÂKA 4:15

Hezy he lâpi liata a tlapa bie chizy ama châ. Bie ama theipa nahta, Sâtâ a vy ta, ama palôh liata bie chi hiepa cha thlai a lapa ha tyh ei.

MÂKA 5:7

Ao paro ngaitapa ta awh ta, “Zisu, Khazohpa Chônôchaipa Sawchapawpa, ei chô liata khâpa tao awpa ma nâ chhuah? Khazohpa moh ta ei châ haw na, na taola khah y,” tah ta.

ZAWHÂNA 12:31

Tahmâ he khizaw pachiana daihti châ ta, tahmâ he khizaw bei cha thypa a châ aw.

ZAWHÂNA 16:11

Pachiana kyh liata ama thaileichâna cha, khizaw ryureituhpa he a thâtih pachiapa a châ hapa vâta a châ.

RAWMA 16:20

Thlalôhna Khazohpa ta Sâtâ cha nama phei ry liata a tlysao patoh aw. Eima Beipa Zisu Krista ngiachhiena nama hnohta y mawh sy.

HEBRAI 2:14

Sawzy cha sapa nata thisaih azaona a hneipa ama châpa hawhta, ano chhao sapa nata thisaih hnei hra ta, a thina ta thina hmotaotheina a hneipa ahripa cha a pahleipadia haw.

1 PITY 5:8

Palôh pasohpa ta y u la, a hrohrua teh u. Nama khakhaipa ahripa cha chakeibarôhneipa a rôhpa hawhta a rôh ta, a nie thei awpa tluapa ta â khie tyh.

2 PITY 2:4

Vâlyuhchâpazy moleina hmo ama tao nona kha, Khazohpa ta âmo cha pahlôh leipa ta, hriena su liata thy ta, pachiana daihti a tlô hlâlei khaohtlô zohpa liata a khô chy ei.

ZUDÂH 1:6

Vâlyuhchâpazy chhao ama biehneina nata ama pahrâna su a siesaipazy cha, noh rônahpa pachiana noh tlôna taihta zohna hnabeidyna ry liata chhâzaw bâlia ta chahrypa ta y awpa ta Abeipa ta a soh chy ei.

BIEPHUAH 12:13

Drâkao ta alei lâ thy pathlahpa a châpa a hmô nahta, sawchapaw a satuhpa chanô cha a chadai ta.

BIEPHUAH 12:15

Parih ta chanô cha ti ta a paphaosa thei nawpa ta, chavah hawhta a pakah tawhta ti pachhao ta.

BIEPHUAH 12:17

Chavâta drâkao cha chanô chô liata a hiehâh ngaita ta, chanô pathla laibâhpa, Khazohpa biepiepazy a zyhpa nata Zisu bie a pyhpazy a dyuh awpa ta pua ta.

BIEPHUAH 12:3

Ngiana hropa avâ liata a vaw lâ heih ta. Drâkao saihpa lai ngaitapa, luh miasari nata ki hrawh a hneipa, a luhzy liata lakho miasari a khopa vaw y ta.

BIEPHUAH 12:4

A chaolahmei ta avâ liata awhsi su thôh su kha a daophi pathlah ta, alei lâ za thy ta. Chanô saw cha a vaw pihpata nahta a palâ thei nawpa ta, drâkao cha chanô nawh a zeihpa hmiakô liana cha a duah thlâh ha ta.

BIEPHUAH 12:9

Chatawhcha drâkao lai ngaitapa, parih hlôpa, ahripa nata Sâtâ tahpa ta moh bipa, khizaw zydua a dôtuhpa cha za thy pathlah ei ta. Alei lâ za thy ei ta, a vâlyuhchâpazy chhao a hnohta za thy pâ hra ei ta.

BIEPHUAH 13:2

Sahrâhpa ei hmôpa cha keichhoh lyu ta, a pheizy chavyh phei lyu ta, a pakah cha chakeibarôhneipa pakah a lyu. Sahrâhpa hnohna chata Drâkao ta a hmotaotheina, a beidyuchhai nata biehneina lai ngaitapa pie ta.

BIEPHUAH 13:4

Sahrâhpa hnohta a biehneina a piepa vâta, drâkao cha a chhy ei ta. Sahrâhpa chhao cha a chhy ei ta, “Sahrâhpa hawhpa he ahy y, ahy a dyuh thei aw?” tah ei ta.

BIEPHUAH 20:10

Âmo dôveituhpa ahripa cha, sahrâhpa nata hrohso pakheipa yna mei nata kaih tipo liata thypa châ ta, chhô nah zâ ta chhâzaw nata tlyzaw ta pasa pataosapa a châ aw.

BIEPHUAH 20:7

Kô sâh kha a lei tawhta, Sâtâ cha patâhna tawhta pathliepa châ aw ta,

BIEPHUAH 9:11

Leichiepa khaohtlô vâlyuhchâpa cha ama bei ta hnei ei ta, a moh cha Hebrai reih ta Abadô châ ta, Krikâh reih ta Apôliô a châ.