BIEPHUAH 14:7 - Mara Bible RV (BSI)

⁷ Ano chata ao paro ngaitapa ta, “Khazohpa chi u la, ano cha palyupalih teh u, a pachiana daihti a vaw tlô haw. Avâ nata alei, tilaipi nata tihnawh a taotuhpa cha a chhy teh u,” tah ta.

BIEPHUAH 14:7 ပူးပေါင်းရင်းမြစ်များ

ÂTHAONA 22:12

Ano ta, “Hawtipa chô liata na ku pathla leipa la, kheihta hmah a chô liata tao khah y. Na sawchapawpa, na sawchapaw matlupa tlai chhao na pie awpa na thlyu leipa ei hmôpa ta, Khazohpa na chi tahpa tahmâ ei pahno haw,” tah ta.

NEHEMIAH 9:6

Nâ cha Abeipa châ chi ta, nâma deita he Abeipa cha na châ. Avâzy tao chi ta, avâzy avâ nata cha liata a ypa zydua na taopa a châ. Alei nata a chô liata a ypa zydua tao chi ta, tilaipi nata a chhôh liata a ypa zydua chhao na taopa sai a châ. Cha zydua cha hrona pie chi ta, avâ liata a ypazy ta ama châ chhy.

HLAZY 115:15

Lei nata vâ taotuhpa Abeipa ta, Byhnâ cha pie mawh sy!

HLAZY 124:8

Keimo baona cha Abeipa moh liata y ta, Ano cha avâ nata alei taotuhpa a châ.

HLAZY 33:6

Abeipa bie ta avâzy khi taopa châ ta, A pakah hu ta avâ liata a ypa zydua khi taopa a châ.

HLAZY 36:1

Moleina ta moleipa palôh chhôh chaipa liata bie reih ta, Moleipa mohmô liata cha Khazohpa china rai y vei.

HLAZY 89:7

Ano cha mopathaihpazy pakhypi liata ama chi ngaitapa châ ta, A kiapâh liata a ypa zydua hlâta ama chiza chaipa Khazohpa a châ.

HLAZY 95:5

Ano taopa a châpa vâta, Tilaipi chhao ano eih châ ta; Alei hipa chhao, A ku ta a taopa a châ.

PUASAINA 20:11

Noh charu chhôh ta Abeipa ta avâ nata alei, tilaipi nata a chhôh liata a ypa zydua tao ta, noh sarina noh cha â pahâpa vâta, Abeipa ta Pahânoh cha byhnâ pie ta a pathaisa.

ISAI 40:3

Ao vaw paro ta, hetana heta a tah: “Râhchawhpa liata Abeipa lâpi a chhuahdy u la, Râh raohpa liata eima Khazohpa châta Lâlai patlâpa tao teh u.

ISAI 40:6

Ao ta, “Phuah teh!” tah ta. Kei ta, “Khâpa ma ei phuah aw?” tah na ta. Chyhsa zydua sibiepa hawhta châ ei ta, Ama chhithaina zydua chhao, Lyurâh pawpi hawh dei a châ.

ISAI 40:9

Hy Zaio lâ thâtihpha a tlôkheituhpa y, Tlâh sâhpa lâ khi kiah mah y. Hy Zerusale lâ thâtihpha a tlôkheituhpa y, Hmotaotheina chhaota na ao papua mah y. Chi leipa ta na ao papua la, Zudâh khihpizy hnohta, “Nama Khazohpa he moh teh u!” tah mah y.

ISAI 42:12

Abeipa cha parônahsa ei sala, Ano reithaina cha, Tilaipi kiah râhzy liata phuah mawh ei sy.

ISAI 44:23

Abeipa ta chatlaina tao ha ta, Chavâta, Hy avâzy saih u, hla sa u la, Hy alei su a thupazy saih u, awh teh u. Hy tlâhpizy saih u, hla paryh u la, Hy râhmâhpa nata a chhôh liata tho to saih u, hla paryh teh u! Abeipa ta Zakaw cha chatlai ha ta, A rônahna Izarei liata a paluahsa haw.

ISAI 58:1

“A chado leipa ta a paro ngaitapa ta awh la, Chiahmie hawhta na ao papua teh. Ei phopi hnohta ama paraona phuah la, Zakaw pathlazy hnohta ama moleinazy phuah teh.

ZEREMIAH 10:10

Abeipa deikua cha Khazoh hmeiseihpa châ ta, Khazoh hrohpa nata tlyzaw Bei a châ. A hiehâhna ta alei a chalyu ta, Phopizy ta a pathiiana tao thei veih ei.

EZEKIA 7:2

“Hy chyhsa sawchapawpa y, Abeipa Zehôvâh ta Izarei râh hnohta hetana heta a tah: Chhâna! Râh ki palihzy liata chhâna a vaw tlô hai.

EZEKIA 7:6

Chhâna a vaw tlô haw. Chhâna vaw tlô ta, a cha thyuhnao haw. Moh teh, chhâna a vaw tlô.

DÂNIAH 8:19

Ei hnohta, “Moh teh, hiehâhna hnôh lâta hmo a vaw tlô awpa ei cha pahnosa aw, aluahna he chhâna daihti raopa kyh a châ.

HÔSIA 8:1

Ei biehrai parao ei ta, Ei ryhpa amâ dyuhpa vâta, Abeipa o chô liata pahmôhpi hawhta, Na hmao liata chiahmie pataoh teh.

MALAKHAI 2:2

Nathlie leipa u la, nama pathipalôh liata a vao hra leipa sala, ei moh nama palyupalih leipa khiahta cha, nama chô liata chhiesana patlôsa aw na ta, nama byhnâzy cha chhiesana lâta ei palie aw. Hmeiseihta cha nama pathipalôh liata namâ vao leipa vâta, tahmâ tlai chhao heta chhiesana lâta ei palie haw,” Pheisaihzy Abeipa ta a tah.

MATHAI 25:13

A noh nata dawh pahno tlôh leipa ei chi ta, chavâta a hrohrua teh u.

LUKA 17:18

He chihropa dei leipa heta, Khazohpa reithai awpa ta a vaw kuapa pakha chhao y veih ei ma?” tah ta.

HMOTAOPAZY 14:15

“Pupa saih u, he hmozy he khazia nama tao? Keimo he nâmo nôchâ hawhpa a phaohpa chyhsapa eima châ hra. He hmo khâpa hraoleipazy he a heihsaipa ta, avâ nata alei nata tilaipi nata a chhôh liata a ypa zydua a taotuhpa Khazoh hrohpa lâ a heih awpa ta, nama hnohta thâtihpha eima vaw tlôkhei.

ZAWSUA 7:19

Zawsua ta Âkhâ hnohta, “Ei sawchapawpa, Abeipa Izarei Khazohpa parônahsa la, a hnohta a phuah teh. Khâpa hmo ma na tao tahpa na chho la, na phih khah y,” tah ta.

1 PITY 4:7

Hmo zydua chhâna â hnia haw. Chavâta thlah nama chhâ thei nawpa ta palôh pasohpa nata a sohsi ngaitapa ta y teh u.

BIEPHUAH 11:13

Cha daihti lia tlai chata alo thata a vaw sih ta, khihpi su hrawh su kha cha cho ha ta. Alo sihpa liana chata chyhsa sâh sari thi ei ta, a laibâhpazy cha chi ngaita ei ta, vârâh Khazohpa cha palyupalih ei ta.

BIEPHUAH 11:18

Phopizy ama hiehâh ta, Na pathiiana a vaw tlô; Cha cha athihpazy pachiana daihti châ ta, Châ chakaotuhpa hrohsopazy nata mopathaihpazy Lymâ piena daihti a châ. Na moh a chituhpa a lai a chyh ta Lymâ piena daihti châ ta, Leilô paraotuhpazy paraona daihti a châ,” tahpa ta Khazohpa a chhy ei ta.

BIEPHUAH 15:4

Hy Abeipa, ahy ma cha chi leipa ta y aw ta, Na moh palyupalih leipa ta a y aw? Pathaihpa cha nâ dei na châ. Na pachiana siaziezy palâhâhpa a châ hapa vâta, Phopi zydua a vy aw ei ta, Ama châ vaw chhy aw.”

BIEPHUAH 16:9

Chatanachata chyhsazy cha ama u khaina taihta noh sah ngaitapa ta pakâhpa châ ei ta, potlana chô liata biehneituhpa Khazohpa moh cha chhiesapa ei ta. Châhrasala ro khoh hlei leipa ei ta, Khazohpa palyupalih veih ei.

BIEPHUAH 18:10

A pasataona chipa ta, lâhlapi ta a duah aw ei ta, hetana heta ama tah aw: “Cha rimâ cha! Cha rimâ cha! Nâ, khihpi rônahpa, Nâ, khihpi thatlôpa, Hy Babylaw khihpi! Dawh kha chhôh ta, Na rao khai ha he zaw.”

BIEPHUAH 18:17

Dawh kha chhôh ta, A hneirôna zydua a lei khai ha he zaw!” Balyh hyutuhpa zydua nata balyh ta khitlyhpa zydua, balyh puhpazy nata tilaipi chô liata sôhpalietuhpa zydua cha Lâhlapi ta a duah ei ta,

BIEPHUAH 18:19

Ama luh liata buchadoh a mia ei ta, awh ei ta, hetana heta chapa ta mâchhie ama sâ: “Cha rimâ cha! Cha rimâ cha! Khihpi rônahpa, A hneirôna hmâpa ta, Tilaipi balyh hneituhpazy A pahneirôhsapa khihpi! Dawh kha chhôh ta, A lei khai ha he zaw!

BIEPHUAH 19:5

Chatawhcha beidyuchhai tawhta ao vaw pua ta, “Nâmo, Khazohpa chakaotuhpa zydua, Nâmo, ano a chituhpazy, Molaipa nata mochyhpazy saih u, Eima Khazohpa cha reithai teh u,” vaw tah ta.

BIEPHUAH 4:11

“Hy Eima Beipa nata Khazohpa, Nâ cha rônahna zy, palyupalihna zy, hmotaotheina zy A to tlâh na châ na; Hmo to tao chi ta, Na bie hawhta vaw y ei ta, Na bie hawhta paysapa ama châ,” tahpa ta chhâzaw nata tlyzaw ta a hroh thlâhpa cha amâ chhy.

BIEPHUAH 4:9

Hmohrohneipazy ta beidyuchhai liata atyuhpa, chhâzaw nata tlyzaw ta a hroh thlâhpa cha parônahsapa ta palyupalih ei ta, alyna bie ama reina maihta,

BIEPHUAH 8:10

Vâlyuhchâpa pathôhna ta a chiahmie vaw tô ta, meirei hawhta a iapa awhsi laipa avâ tawhta za tla ta, chavahzy su thôh su kha nata tihnawhzy vi ta.

1 SAMUELA 6:5

Nama kheihluh nothlahpazy nata nama râh a paraotuhpa siahloh nothlahpa zy tao u la, Izarei Khazohpa cha palyupalih teh u. Cha hawhta nama tao khiahta cha, nâmo chô liata nata nama khazohzy nata nama râh chô liata a ku a pahua thei ngyu aw.