2 THÂTIHZYRONA 31:2 - Mara Bible RV (BSI)

² Hezekia ta theihthaipazy nata Livai pathlazy cha Abeipa o liata raopa hlâna nata aryhna hlâna chakaona rai hria awpa ta zy, chhikao vaih awpa ta zy, alyna bie rei awpa nata reithaina hla sa awpa zy ta a py py ta pachhaih ta, ama chakao awpazy rairuah ta.

2 THÂTIHZYRONA 31:2 ပူးပေါင်းရင်းမြစ်များ

1 THÂTIHZYRONA 16:37

Chatanachata Abeipa Biehrai Byh hmiakô liata â ngiahna hawhta noh chareih chakaona rai hria awpa ta, Bei Dâvi ta Asâpha nata a unawhzy soh ta.

1 THÂTIHZYRONA 24:1

Arawna pathlazy cha he hawhta a py py ta pachhaihpa ama châ. Arawna sawchapawzy cha Nâdâ, Abihu, Eliaza nata Ithamâ zy châ ei ta,

1 THÂTIHZYRONA 24:24

Uzie sawchapawzy hry liata Mikâ cha pawhrâh chaipa châ ta, Mikâ sawchapawzy hry liata Sâmi cha pawhrâh chaipa a châ.

1 THÂTIHZYRONA 25:25

Hleichariena cha Hânani nata a sawchapawzy nata a unawhzy chô liata tlu ta, pahrawh hleino ama châ.

1 THÂTIHZYRONA 26:26

Selômô nata a unawhzy cha Bei Dâvi, pho pawhrâhpazy, pheisaih sâh kha hyutuhpazy, pheisaih za kha hyutuhpazy nata pheisaih hyutuh chaipazy ta ama hlâpa, hmohlâpa pathaihpa sopakhyna zydua avaotuhpa ama châ.

2 THÂTIHZYRONA 23:8

Livai pathlazy nata Zudâh mo zydua ta theihthaipa Zehôdâ biepiepa zydua hawhta tao ei ta. Ama hyutuhpazy ta Pahânoh ta chakaona rai a hria awpa nata a pahâ awpazy a vaw chhi chyu ei ta. Theihthaipa Zehôdâ ta Pahânoh ta a pahâ awpazy cha pahâsa leipa ta.

2 THÂTIHZYRONA 24:14

Rai ama patlô nahta, sôh laibâhpa zydua cha abei nata Zehôdâ lâ vaw cheih ei ta. Cha sôh cha hmâpa ta Abeipa o liata chakaona châta nata raopa hlâna châta beihphiahzy tao ei ta, ropahâhpa beihkohzy nata ngôh nata tâkâ hmobaohzy chhao ama tao. Chatanachata Zehôdâ hro chhôh zydua cha, Abeipa o liata raopa hlânazy a daihtita liata ama hlâ lymâ.

2 THÂTIHZYRONA 31:17

Theihthaipazy cha a chhôh chhôh ta ama mohzy ropa châ ei ta, Livai pathlazy cha chakaona rai ama hria awpa lymâ hawhta, kô kih tawhta chô lâ zydua a py py ta ama moh ropa a châ.

2 THÂTIHZYRONA 35:2

Theihthaipazy ama raihria awpa chyu rao ta, Abeipa o liata chakaona rai hria awpa ta âmo cha pasyu ta.

2 THÂTIHZYRONA 5:11

Cha liata a ypa theihthaipazy cha, py to ta amâ pathai khai hapa vâta, Su Pathaihpa tawhta vaw pua ei ta.

2 THÂTIHZYRONA 8:14

A paw Dâvi ta a vaw rao hapa hawhta, theihthaina rai hria awpa ta theihthaipazy cha a py py ta pachhaih ta, Livai pathlazy chhao theihthaipazy hmiakô liata reithaina hla sa awpa ta noh chareih ta â ngiahnazie hawhta a py py ta pachhaih ta, chhikao vaituhpazy chhao ama chhikao vai awpa chyu ta a py py ta a pachhaih ei. Cha hawhta tao awpa ta, Khazohpa chyhsa Dâvi ta bie a vaw pie hapa a châ.

EZRÂ 6:18

Mawsi Châbu liata ropa hawhta, Zerusale liata Khazohpa chakao awpa ta theihthaipazy nata Livai pathlazy cha âmo py chyu liata y awpa ta raopa ama châ.

NEHEMIAH 11:17

Mikâ sawchapawpa Mâtaniah chhao Zerusale liata a pahrâ. Mâtaniah cha Zabidi sawchapawpa châ ta, Zabidi cha Asâpha sawchapawpa a châ. Asâpha cha reithaina hla chhituhpa châ ta, alyna bie a reih tyhpa a châ. A pilâhpazy hry liata a panona Bâbukiah nata Sâmua sawchapawpa Abadâ zy chhao Zerusale liata ama pahrâ hra. Sâmua cha Kalâ sawchapawpa châ ta, Kalâ cha Zeduthu sawchapawpa a châ.

HLAZY 134:1

Nâmo, Abeipa chakaotuhpa zydua saih u, A vy u la, Abeipa cha reithai teh u! Abeipa o liata zâ ta a duah tyhpa zydua saih u, Abeipa cha reithai teh u!

ZEREMIAH 33:11

Alyna nata thaphana aozy thei heihpa châ aw ta, myuhneituhpa nata myuh aozy chhao thei heihpa châ aw ta, Abeipa o lâta alyna biereina hmohlâpa a vaw cheihpazy ao chhao thei heihpa châ aw ta, “‘Pheisaihzy Abeipa hnohta alyna bie reih teh u, Abeipa cha pha ta, A kyhpachâna tlyzaw ta a ypa a châ!’ ama tah aw. Hmiatuapa daihti hawhna khata, râh cha vânoh ei patosa heih aw,” Abeipa ta a tah.

LUKA 1:5

Zudia bei Herawda daihti liata, Abizah py liata theihthaipa pakha, a moh Zekaria ama tahpa y ta. Cha chyhsa chata Arawna pathla hry liatapa Elizabe cha lapinô ta hnei ta.

LUKA 1:8

Chatawhcha hetana heta vaw châ ta. Noh kha cha ano py chakao daihti liata, Zekaria chhao Khazohpa hmiakô liata theihthaipa chakaona rai hria hra ta.