2 THÂTIHZYRONA 20:3 - Mara Bible RV (BSI)

³ Zehôsaphâ cha chi ngaita ta, Abeipa tluana lâta a hmia pahei ta, Zudâh râh zydua kâhvileipa ta y awpa ta phuah ta.

2 THÂTIHZYRONA 20:3 ပူးပေါင်းရင်းမြစ်များ

2 THÂTIHZYRONA 11:16

Izarei chi zydua hry tawhta Izarei Khazohpa Zehôvâh padona lâta ama palôh a heihpa zydua ta, ama pathlatuhpazy Khazohpa Zehôvâh lâ atheihna hlâ awpa ta, theihthaipazy nata Livai pathlazy cha Zerusale lâ pazi ei ta.

2 THÂTIHZYRONA 19:3

Chatahrasala Aseri tôhzy râh tawhta pahleipadia chi ta, Abeipa tluana lâta na palôh na paheipa vâta, phana khazie rakha ma cha na hnei,” tah ta.

2 THÂTIHZYRONA 7:14

ei moh a phaohpa ei phopi ta a panawh ei sala, thlahchhâpa ta ei hmia tlua ei sala, ama yzie moleinazy amâ heihsai khiahta cha, vârâh tawhta vaw nathlie aw na ta, ama moleinazy a ngiahthai aw na ta, ama râh cha ei patlâh heih aw.

NEHEMIAH 9:1

Cha thla, noh kih nata noh palihna noh liata, Izarei sawzy a hmaoh ei ta, kâhvileipa ta y ei ta, latho poh a bupa ta, ama luh liata alei a mia ei ta.

ESTHERI 4:16

“Vawh la, Susâ liata a ypa Zu chyhsa zydua pakhy khai la, ei châta kâhvileipa ta y u la, noh thôh chhôh, chhô nah zâ ta khâpa hmah nie leipa u la, khâpa hmah doh hra khuh vy. Kei nata ei laihsazy chhao, nâmo taopa hawhta kâhvileipa ta y hra aw pi ta, cha khai tawhta abei lâ cha ei ngia aw. Ryhpa chakhiapa a châ awpa vâta, ei thi hapa chhao ta, thi lah vâ na,” tah ta.

ZEREMIAH 36:9

Zôsia sawchapawzy Zudâh bei Zehôki abeina kô pangawhna, thla chakina liata, Zerusale khihsaw zydua nata Zudâh khihpizy tawhta Zerusale lâ â vypa chyhsa zydua ta Abeipa hmiakô liata kâhvileipa ta y awpa phuah ei ta.

DÂNIAH 9:3

Chavâta Zehôvâh Khazohpa lâ a heih na ta, kâhvileipa ta, latho poh a bupa ta buchâhzy a miapa ta, thlahchhâna nata hiana zy ta ano cha tlua na ta.

ZÔELA 1:14

Kâhvileipa daihti phuah u la, Pakhypi pathaihpa aw teh u. Machâzy nata râhsaw zydua Abeipa nama Khazohpa o lâ awpakhy u la, Abeipa awsao teh u.

AMÔSÂ 5:4

Abeipa ta Izarei phopi hnohta hetana heta a tah: “Kei na tlua u la, Nama hroh aw.

ZAWNA 1:16

Balyh puhpazy ta Abeipa cha chi ngaita ei ta, Abeipa lâ atheihna hlâpa ta, biezy a taih ei ta.

MATHAI 10:28

Pôhpa thie thei ta, thlahpa a thie thei leipazy chi leipa u la, hrienasu liata pôhpa nata thlahpa a pahleipadia theipa cha tlao chi teh u.

RYUREITUHPAZY 20:26

Chatawhcha Izarei pheisaih zydua cha Bethel lâ khy ei ta, cha ei ta. Cha liata Abeipa hmiakô ta a tyuh ei ta, cha noh liana cha zâlâ taihta kâhvileipa ta ypa ta, raopa hlâna nata aryhna hlânazy Abeipa lâ hlâ ei ta.

1 SAMUELA 7:6

Izarei sawzy cha Mizpâ liata a hmaohpakhy ei ta. Ti thaih ei ta, Abeipa hmiakô liata patlai ei ta, cha noh cha kâhvileipa ta y ei ta. Cha su liana tlai chata, “Abeipa chô liata eima vaw molei haw,” tah ei ta. Samuela cha Mizpâ liana chata Izarei sawzy chô liata ryureih ta.