2 SAMUELA 21:16 - Mara Bible RV (BSI)

¹⁶ Mopahreihpa pathlazy hry liata Isbibenô ta Dâvi cha thie a chhuah ta. Isabibenô asei cha dawh sekel za thôh a hripa châ ta, zaozi thiehpa a vao ta.

2 SAMUELA 21:16 ပူးပေါင်းရင်းမြစ်များ

ÂTHAONA 14:5

Chavâta kô hrawh hleipalihna liata, Kedaolaome ta ano py beizy chhaota âmo cha siehnao ta, Asterôkanai liata Rephai mo, Hamâ liata Zuzi mo nata Kiriathai bypi liata Emi mozy cha ama pahnie haw.

ÂTHAONA 6:4

Cha nohzy liata nata cha hnôhlâ chhao ta, alei chô liana heta mopahreihpa sahlao y ei ta. Cha chyhsazy cha Khazohpa sawchapawzy ta chyhsa sawchanôzy hnei ei ta ama pathlazy ama châ. Âmo he hlâno ta chyhsa thatlôpa nata mohpathâhpazy kha ama châ.

2 SAMUELA 21:18

Cha khai tawhta, Philistinâ mo nata adyuhna Kôbi khih liata y heih ta. Husâ chyhsa Sibekai ta mopahreihpa pathlazy hry liatapa Sâphi cha thie ta.

2 SAMUELA 21:20

Kâthâ liata adyuhna y heih ta. Cha khihpi liata chyhsa mopahreih ngaitapa, a ku chavei chachâh kuparo miacharu hnei ta, a phei chavei chachâh ta pheiparo miacharu a hneipa, a zydua ta kuparo nata pheiparo mia kih nata miapalih a hneipa y ta. Ano chhao cha mopahreihpazy pathla châ ta.

2 SAMUELA 21:22

Cha papalihpazy cha Kâthâ khihpi liata mopahreihpa pathlazy châ ei ta, Dâvi ku ta nata a chakaotuhpazy ku ta ama thi khai haw.

2 SAMUELA 5:18

Philistinâ mo cha a vy ei ta, Rephai saikao liata a paziah ei ta.

MALUHREINA 13:22

Neke lâta khy ei ta, Hebraw tlô ei ta, cha liata Anâki pathla Ahimâ mo, Sesai mo nata Tâmai mozy y ei ta. Hebraw cha Izi râh liata Zawâ â dua hlâta kô sari liata padua hapa a châ.

MALUHREINA 13:28

Râh liata phopi a pahrâpazy deikua cha, phopi thatlô ngaitapa châ ei ta, khihpizy chhao thokhy a hneipa, khih lai ngaitapazy a châ. Anâki pathlazy chhao, cha liata eima hmô.

RYHPACHANEINA 1:28

Khataih lâ cha ma eima khy aw? Eima unawhzy ta, “Cha phopi cha keimo hlâta pahreih via ei ta, ama doh chhao a sâh via ta, ama khihpizy lai kaw ta, avâ a daihpa thokhyzy ta amâ dôh. Anâki pathlazy chhao eima hmô,” tah ei ta, eima hnabei miah ama pady khai haw,’ tah ei chi ta.

RYHPACHANEINA 2:10

Kha hlâta cha, cha râh liata Anâki mo hawhta chyhsa pahreihpa nata doh seihpa nata maluh hluh ngaitapa Emi mo y tyh ei ta.

RYHPACHANEINA 2:11

Anâki mo hawhta, âmo chhao cha Rephai mo tahpa ta pahnopa ama châ. Châhrasala Môabâ mo ta Emi mo tahpa ta ama aw tyh.

RYHPACHANEINA 2:21

Anâki mo hawhta chyhsa pahreihpa nata doh seihpa nata maluh hluh ngaitapa châ ei ta, châhrasala Abeipa ta âmo cha Amawna mo hmiakô liata pahleipadia ta, Amawna mo ta pho ei ta, ama râh liata ama pahrâ haw.

RYHPACHANEINA 3:11

Bâsanâ bei Ôkâ deita cha Rephai chi a y chhôhpa châ ta, a rakhô cha thua rakhô châ ta, a doh lâ dy chaki seih ta, a hâ lâ dy palih a kawh. Cha cha tahmâ taihta Amawna pathlazy khihpi Râbâ liata a y thlâh ha.

RYHPACHANEINA 9:2

Phopi pôh pahreihpa nata doh seihpa, Anâki pathlazy ama châ. Âmo cha pahno ei chi ta, ‘Anâki pathlazy hmiakô liata ahy a duah thei aw?’ ama tah tyhpa nama thei.

ZAWSUA 11:22

Izarei sawzy râh liata Anâki mo pakha hmah y khao veih ei. Kâza khih, Kâthâ khih nata Asadô khihzy lia deita ta a chyhta ama y.

ZAWSUA 15:14

Kâlebâ ta Anâki pathla pathôh, Sesai, Ahimâ nata Tâmai zy cha Hebraw khihpi tawhta papua ta.

1 SAMUELA 17:7

Asei bih cha thaisana bâtlâh hawhta châ ta, asei luh cha sekel 600 a hripa thua a châ. A vyhphao chabatuhpa cha a hmia lâta sie ta.