2 SAMUELA 1:16 - Mara Bible RV (BSI)

¹⁶ Dâvi ta a hnohta, “Na thisaih maoh cha na luh liata y mawh sy. ‘Abeipa sathawthupa ei thie,’ na tahpa vâta, nâma pakah tlai ta thailei a cha pachâ haw,” tah ta.

2 SAMUELA 1:16 ပူးပေါင်းရင်းမြစ်များ

2 SAMUELA 1:10

Chatanachata a kiapâh liata a kei duah na ta, a pao ha tawhta cha hro thei khao aw vei tahpa ei pahnopa vâta, ei thie lâlao haw. A luh liata beilakho nata a bâh liata lâkyu la na ta, ei zibeipa châta he lâ he ei vaw chei,” tah ta.

2 SAMUELA 16:8

A ryureina na chhupa Sawla chhôhkha thisaih zydua kha Abeipa ta na chô liata vaw paliesa ta, khinarâh cha na sawchapawpa Absalaw hnohta Abeipa ta a pie haw. Pachâ teh, thisaih palo hmâhpa chyhsa na châpa vâta, nâmasasyh ta nâ parao haw,” tah ta.

1 ABEIZY 2:37

Na pua noh, Kidaraw chavah na chaka noh cha, na thi noh a châ aw tahpa pahno mah y. Na thisaih cha nâma luh chô liata a y aw,” tah ta.

ZAWBÂ 15:6

Kei ta thailei cha pachâ va na; Nâma pakah tlai ta thailei cha pachâ ta, Nâma hmao tlai ta a cha sei.

BIESOZY 6:2

Na pakah biezy liata a ao chi ta, Na pakah biezy ta a cha patu hapa a châ.

EZEKIA 18:13

a pôhna hneipa ta a sôh dyu pacheisapa ta, â thôhna a la khiahta cha, a hroh aw ma? Hro aw vei. Cha hmo pasichhihpa zydua cha tao ha ta, a thi tlai awpa a châ. Ano thisaih maoh cha ano chô liata a y aw.

EZEKIA 33:5

Chiahmie pyu thei ta, châhrasala zikyurâna a papeisa leipa vâta, a thisaih cha ano chô liata a y aw. Zikyurâna a papeisa khiahta deikua cha, a hro a pabohsa aw.

THEIHTHAINA 20:16

Chanô ta sahroh â paykheisa khiahta cha, chanô nata sahroh cha na thie awpa a châ. Thie thlyu awpa ama châ, ama thisaih maoh ama phaoh aw.

THEIHTHAINA 20:27

“Chapaw rai, chanô rai, peihthaipa nata ahripa lâta pachaona a taopa cha thie thlyu awpa châ ta, alô ta vawhsao awpa a châ. Ama thisaih maoh ama phaoh aw,” tah ta.

THEIHTHAINA 20:9

A nô tlyma, a paw tlyma, chhie a sapa cha thie thlyu awpa a châ. A nô tlyma, a paw tlyma chhie a sapa vâta, a thisaih maoh a phaoh aw.

MATHAI 27:25

Zawpi zydua ta, “A thisaih maoh cha keimo chô liata nata eima pathlazy chô liata y mawh sy!” tahpa ta a chhy ei ta.

LUKA 19:22

Zibeipa ta a hnohta, ‘Chakaotuhpa moleipa, na pakah tawhta bie a puapa tlai ta thailei ei cha pachâsa aw! Chyhsa chakhiehcharieh kawpa châ na ta, ei sokhâh leipa chhao la tyh na ta, ei tu leipa chhao a hria tyhpa ei châpa cha na pahno naw?

HMOTAOPAZY 18:6

Châhrasala Zuzy ta a dyuh ei ta, ama reipachhie nahta, Pawla cha a poh chatho ta, ama hnohta, “Nama thisaih maoh cha nâmo luh liata y mawh sy! Kei deikua la, ei pathaih. Tahmâ tawhta la, Zenitaizy lâ ei sie aw,” tah ta.

HMOTAOPAZY 20:26

Chavâta chyhsa zydua thisaih liata ei pathaih tahpa tanoh ei cha chho ei.

RAWMA 3:19

Ryhpa ta a reipa maih cha, ryhpa ry liata a ypazy hnohta reipa a châ tahpa eima pahno. Chatanachata pakah to hmao mopa ta y aw ei ta, khizaw zydua he Khazohpa ryureina ry liata a y thei aw.

RYHPACHANEINA 19:10

Chataleipatala Abeipa nama Khazohpa ta ryuto châta râh a cha piepa liata paraona a hnei leipa thisaih palopa châ aw ta, thisaih maoh nama phaoh pathlei aw.

ZAWSUA 2:19

Ahy rai na o chhikao tawhta khiliah lâ a puapa maih cha, a thisaih maoh ano luh chô liata y aw ta, keimo cha thailei châ aw ma pi. O chhôh liata na hnohta a ypa chô liata ku pathlapa a châ khiahta deikua cha, a thisaih maoh cha eima luh chô liata a y aw.

RYUREITUHPAZY 9:24

Cha hmo cha Zerubâlâ sawchapaw sysarizy chô liata nôchhie ngaitapa ta ama taopa kha âmo chô liata palie thlusapa ta, ama thisaih maoh cha âmo a thietuhpa ama unawhpa Abimele chô liata paphaosa ta, a unawhzy thie awpa ta a ku tha a patlôtuhpa Sekhe mo chô liata chhao paphaosapa ta a y thei nawpa ta taopa a châ.

1 SAMUELA 25:39

Dâvi ta Nâbâ a thi haw tahpa a thei nahta, “Nâbâ ku liata pasipasawh ei tyhpa viari nâ thôpatuhpa nata ano a chakaotuhpa heta hmo pha leipa ei tao ha awpa tawhta nâ pakhâpa Abeipa cha reithaipa ta y mawh sy. Nâbâ molei paraona cha Abeipa ta ano luh chô liata a patlasa haw,” tah ta. Chatawhcha Dâvi ta a chakaotuhpazy tuah ta, Abikai cha a lapinô châta za pahiasa ta.

1 SAMUELA 26:9

Châhrasala Dâvi ta Abisai hnohta, “Pahleipadia khah y, Abeipa sathawthupa chô liata ku pathla ta, thai a châpa ahy ma a y beih?” tah ta.