2 KAWRINI 8:2 - Mara Bible RV (BSI)

² Rietheina hluhpi ta pasiapa ama châpa chhao ta, amâ lyna khô pathlah ta; dyhchhie kawpa ta ama ypa chhao ta, amâ pasaina a bie pakhô.

2 KAWRINI 8:2 ပူးပေါင်းရင်းမြစ်များ

BIESOZY 11:25

Chyhsa riaphapa cha a dyh pha aw ta, Ti a baotuhpa cha anosasyh â baopa a châ.

MATHAI 20:15

Kei eih châ ta, kei eih cha ei khozie hawhta tao thei va na ma? Ei riaphapa ma na hiatlia kaw?’ tah ta.

RAWMA 12:8

pasyutuhpa ta pasyuna bie reih sala, hmopietuhpa ta riapha ngaitapa ta pie sala, ryureituhpa ta tiamapa ta ryureih sala, ngiachhiena rai hriatuhpa ta a ly ngaitapa ta hria mawh sy.

RAWMA 2:4

A châ vei khiah, Khazohpa phana cha rona lâ châ chhi awpa a châpa pahno leipa ta, a phana hluhzie nata a nôphazie nata a palôh pasizie zy cha, hraoleipa hawhta ma na pachâ?

2 KAWRINI 1:12

He he eimâ palaikhei: Khizaw sona ta châ leipa ta, Khazohpa ngiachhiena vâta, he khizaw liata nata nâmo liata pathaihna nata Khazohpa liata adona ta eima hro tyhpa kha, eima chhie na pha pahnona ta miah a pahnokhei.

2 KAWRINI 2:9

Cha kyh vâta châ kha ei cha vaw paphao ei, kyh to liata rei namâ ngiah nata ngiah lei ei cha pasia thei nawpa ei ta.

2 KAWRINI 6:10

Pachârôh awpa ta pachâpa châ pi ta, châhrasala khâ eimâ ly. Dyhchhiepa hawhta pachâpa châ pi ta, châhrasala chyhsa hluhpi a pahneirôhsapa eima châ. Khâpa hmah a hnei leipa hawhta pachâpa châ pi ta, châhrasala ato eima hnei.

2 KAWRINI 9:11

Kyh to liata riaphapa nama châ thei nawpa ta, kao to liata pahneirôhsapa ta y aw ei chi ta, nama riaphana chata keimo hmâpa ta Khazohpa lâ alyna biereina a sa papua aw.

2 KAWRINI 9:13

Cha chakaona cha, Krista thâtihpha namâ pyhpa vâta, Zerusale liata mopathaihpazy châta nata mohropazy châta riapha ngaitapa ta nama thyupa a châzie ama pahno tita, Khazohpa ama palyupalih aw.

RYHPACHANEINA 15:4

Abeipa nama Khazohpa ta ryuto châta hnei awpa ta râh a cha piepa ei liata byhnâ cha pie aw ei ta, dyhchhiepa nama hry liata y aw veih ei.

1 THYSALAWNIKA 1:6

Rietheina hluhpi taona chôta, Thlahpa Pathaihpa liata a lypa ta bie a pyh ei chi ta, keimo nata Abeipa hâ a latuhpazy nama vaw châ haw.

1 THYSALAWNIKA 2:14

Unawh saih u, nâmo chhao, Zudia râh liata a ypa Krista Zisu liata Khazohpa Awnanopazy hawhta nama châ ha hih. Zuzy ku liata âmo pasa ama taopa hawhta, nâmo chhao nama râh chyhsazy ku liata pasa nama tao hra.

ZÂMIE 2:5

Unawh kho ngaitapa saih u, pachâ tua u! Khizaw pachâ ta dyhchhiepazy cha, ngiapâna liata hneirôh awpa nata ano kyh pachâtuhpazy hnohta bie â taihpa khinarâh ryutotuhpazy châ awpa ta, Khazohpa ta â tlyhpazy châ veih ei ma?

BIEPHUAH 2:9

“‘Na pasataozie nata na dyhchhiezie zy ei pahno. Châhrasala hneirôhpa na châ. Zu hmeiseihpa châ tlôh leipa ta Zu â tahpa, Sâtâ pakhyna o a châpazy ta ama cha reipachhiena chhao ei pahno.