2 ABEIZY 16:3 - Mara Bible RV (BSI)

³ Izarei beizy lâpi tlao a chhih hra ta. Abeipa ta Izarei sawzy hmiakô liata a papua hapa phopizy ta hmo pasichhih ngaitapa ama tao tyhpazy tao hrapa ta, a sawchapawpa cha raopa hlâna ta hlâ ta.

2 ABEIZY 16:3 ပူးပေါင်းရင်းမြစ်များ

1 ABEIZY 14:24

Achhyna suzy liata chapaw âzuahpazy taihta râh liata y ei ta. Izarei sawzy hmiakô liata Abeipa ta a papua hapa phopizy hmotaopa pasichhihpa to kha tao hra ei ta.

2 ABEIZY 17:16

Abeipa ama Khazohpa biepiepa zydua tleisai ei ta, viahchaotaw nothlahpa leihpa miano a tao ei ta. Aseri tôh padua ei ta, avâ liata a ypa zydua a chhy ei ta, Bâlâ ama chakao tyh.

2 ABEIZY 17:17

Ama sawchapawzy nata ama sawchanôzy raopa hlâna atheihna ta hlâ ei ta, pachaopazy nata dyuzy hmâh ei ta, Abeipa mohmô liata hmo pha leipa tao awpa ta âmosasyh a zuah ei ta, Abeipa hie ama pahâh tyh.

2 ABEIZY 17:19

Zudâh mo chhao ta Abeipa ama Khazohpa biepiepazy zyh leipa ei ta, Izarei mo pathaopa taoziezy zi hra ei ta.

2 ABEIZY 17:8

Abeipa ta Izarei sawzy hmiakô liata a papua hapa phopizy taozie nata Izarei beizy tao tyhpa hmo pha leipazy ama taopa vâta a châ.

2 ABEIZY 21:11

“Zudâh bei Manase ta he hmo pasichhih ngaitapazy he tao ta, râh liata a pahrâ tuapa Amawri mo hlâ chhao ta hmo moleipa thata tao via ta, Zudâh chhao ano nothlahpa achhyna liata a pamoleisa hra.

2 ABEIZY 21:2

Abeipa ta Izarei sawzy hmiakô liata a papua hapa phopizy ta hmo pasichhihpa ama tao tyhpa hawhta, Abeipa mohmô liata hmo pha leipa tao ta.

2 ABEIZY 21:6

A sawchapawpa cha raopa hlâna atheihna ta hlâ ta, kulâmopa nata pachaopa zy hmâh ta, peihthaipa nata athihpa bie a chho thaipazy â saohiah tyh. Abeipa mohmô liata hmo pha leipa tao ta, Abeipa hie pahâh ha ta.

2 ABEIZY 21:9

Châhrasala nathlie khoh leipa ei ta, Abeipa ta Izarei sawzy hmiakô liata a pahleipadia hapa phopizy taopa hlâ chhao ta ru viapa ta hmo parao awpa ta, Manase ta âmo cha a siekheichhei haw.

2 ABEIZY 23:10

Chatawhcha ahy hmahta ama sawchapaw tlyma, ama sawchanô tlyma, Môleka atheihna châta ama hlâ khao lei nawpa ta, Hinô Sawchapawpa Saikao ama tahpa liata Tôphe chhao a parao haw.

2 ABEIZY 8:18

Ahabâ sawchanô lapinô ta a hneipa vâta, Ahabâ chhôhkha taozie hawhta, Izarei beizy lâpi a chhi hrapa ta, Abeipa mohmô liata hmo pha lei ngaitapa tao ta.

2 THÂTIHZYRONA 22:3

A nô cha Ahazia châta ryhraokheituhpa châ ta. A ryhraokheina a pha leipa vâta, Ahazia cha moleina hmo taona kyh liata, Ahabâ chhôh­kha lâpi a chhihpazy a chhih hra ta.

2 THÂTIHZYRONA 33:2

Abeipa ta Izarei phopi hmiakô tawhta a papua hapa phopizy hmotaopa pasichhihpazy taopa ta, Abeipa mohmô liata hmo pha leipa tao ta.

2 THÂTIHZYRONA 33:6

A sawchapawzy cha raopa hlâna atheihna ta Hinô Sawchapawpa Saikao liata hlâ ta, kulâmopa, pachaopa nata molietaopa zy hmâh ta, peihthaipa nata athihpa bie a chho thaipazy â saohiah tyh. Cha hawhna chata Abeipa mohmô liata hmo molei ngaitapa taopa ta, Abeipa hie pahâh ha ta.

HLAZY 106:35

Râh hropazy nata a pahlao ei ta, Ama hmotaozie hâ amâ la.

ISAI 57:5

Ôkâ thozy hry liata a patla ei chi ta, Tho hrohpa to ry liata Aohraohna ta a kâ tyhpazy châ veih ei chi ma? Saikaozy nata lôpanô keipazy chhôh liata nama sawzy thie ei chi ta, Atheihna ta a hlâ tyhpazy kha châ veih ei chi ma?

ZEREMIAH 32:35

Hinô Sawchapawpa Saikao liatapa Bâlâ achhyna su sâhpazy padua ei ta, ama sawchapawzy nata ama sawchanôzy Môleka lâ ama hlâ tyh. Zudâh pamoleisa nawpa ta, he hmo pasichhihpa tao awpa heta, biepie leipa ei na ta, ei palôh liata chhao a lâ beih vei.

EZEKIA 16:21

Ei sawzy thie chi ta, mei ta raopa hlâna ta na hlâ ei.

EZEKIA 16:47

Ama hroziezy a chhih chi ta, pasichhihpa hmo ama taopazy na tao hrapa dei châ leipa ta, daihti chyuta chhôh ta, na moleina nata na hrozie zydua liata âmo hlâta na paru via haw.

EZEKIA 20:26

ama sawchapaw uhtheipazy atheihna ta pahlâsapa ta papuapalei ei na ta, roryhrapa ta ei paysa ei. Abeipa ei châ tahpa ama pahno thei nawpa ta, cha hmozy cha ei tao.

EZEKIA 20:31

Nama hmohlâpazy hlâ ei chi ta, nama sawzy mei liata raopa ta atheihna ta nama hlâpa liata, tanoh taihta nama khazoh nothlahpa zydua liata namâ papuapaleipa a châ. Hy Izarei pathlazy saih u, nâmo a saohiah awpa chi ei châ ma? Ei hrona reipa ta ei reih, nâmo a saohiah awpa chi châ va na,” Abeipa Zehôvâh ta a tah.

THEIHTHAINA 18:21

“Na saw ahy hmahta atheihna ta Môleka lâ na hlâ awpa châ vei. Cha hawhta hmo taopa ta na Khazohpa moh na papuapalei awpa châ vei. Kei he Abeipa ei châ.

THEIHTHAINA 20:2

“Izarei sawzy hetana heta chho heih teh: Izarei saw tlyma, Izarei râh liata a pahrâpa chihropa tlyma, a saw Môleka lâta a piepa cha thie thlyu awpa châ ta, râh chyhsa zawpi ta alô ta vawhsao awpa a châ.

MIKÂ 6:7

Mietaku tôhpa sâh hluhpi cheih aw sah la, Abeipa cha a palysa aw ma? Sathaw chavah thy hluhpi ta Abeipa cha a palysa aw ma? Ei sawchapaw uhtheipa he ma, Ei paraona ngiahthai nawpa ta ei hlâ aw? Ei pôhpa thei he ma, Ei thlahpa moleina ngiahthai nawpa ta ei hlâ aw?”

RYHPACHANEINA 12:31

Abeipa na Khazohpa cha âmo taozie hawhta namâ chhy awpa châ vei. Ama khazohzy amâ chhyzie liata, Abeipa ta â haopa hmo pasichhihpa to tao ei ta, ama sawchapawzy nata ama sawchanôzy taih mei liata raopa ta ama khazohzy lâta ama hlâ tyh.

RYHPACHANEINA 18:10

Ama sawchapaw nata sawchanô mei liata a hlâpazy, pachaothaipazy, kulâmohthaipazy, moliethaipazy nata peihthaipazy nama hry liata ama y awpa châ vei.