Chavâta tahmâ, châ chakaotuhpa pathlazy cha chhâzaw ta na hmiakô liata ama y thei nawpa ta, âmo cha byhnâ pie mah y. Hy Abeipa, nâma tlai ta byhnâ aw ha chi ta, chhâzaw byhnâ châ mawh sy,” tah ta.
Chyhsa tuah ei ta, Philistinâ bei zydua aw pakhy ei ta, ama hnohta, “Izarei Khazohpa Byh he kheihta ma eima tao aw?” tah ei ta. Âmo ta, “Izarei Khazohpa Byh he Kâthâ khihpi lâ siekheipa châ mawh sy,” tah ei ta. Chatanachata Izarei Khazohpa Byh cha Kâthâ khihpi lâ siekhei ei ta.
Philistinâ mo ta Izarei khihpi ama la hapazy kha, Ekaraw tawhta Kâthâ taihta Izarei ku liata y pakhua heih ta, Izarei ta a râh zydua cha Philistinâ mo ku tawhta a la pakhua khai haw. Izarei nata Amawri mo chhao a dyryh kawpa ta ama y lymâ.