1 SAMUELA 9:16 - Mara Bible RV (BSI)

¹⁶ “Mylâ, he daihti liana heta, Benzami râh tawhta nâ lâta chyhsa pakha vaw pasiesa aw na ta, ei phopi Izarei chô liata ryureituhpa châta sathaw na thu aw. Ano ta ei phopi cha Philistinâ mo ku tawhta a pachha aw. Ei phopi chapa pyu ta ei kô kaw daih ta, ei phopi pasataona ei hmô haw,” tahpa ta vaw pahnosa chhielie ha ta.

1 SAMUELA 9:16 ပူးပေါင်းရင်းမြစ်များ

2 SAMUELA 3:18

Tahmâ he tao daihti a châ hih. Abeipa ta Dâvi chô liata bie a taih ta, a hnohta, ‘Nâ chakaotuhpa Dâvi ku ta ei phopi Izarei he Philistinâ mo ku tawhta nata ama chariahpa zydua ku tawhta ei pachha aw,’ tahpa ta a vaw rei hapa a châ,” tah ta.

2 ABEIZY 20:5

“Kua la, ei phopi hyutuhpa Hezekia hnohta, Abeipa, châ pathlatuhpa Dâvi Khazohpa ta hetana heta a tah: ‘Na thlahchhâna thei na ta, na mothlihzy ei hmô haw. Nathlie teh, cha patlâh aw na ta, noh thôhna noh ta Abeipa o lâ na khy aw.

HLAZY 102:1

Hy Abeipa, ei thlahchhâna he thei la, Ei awna ao nâ lâ vaw tlô mawh sy!

HLAZY 106:44

Chatahrasala ano ama padona ao a thei nahta, Ama nôpona cha a pachâ heih tyh.

HLAZY 25:18

Ei pasataona nata nôpona he pachâ la, Ei moleina zydua nâ ngiahthai mah y.

BIESOZY 16:9

Chyhsapa palôh ta a lâpi pachâhpady ta, A lâsie a chhituhpa deikua cha Abeipa a châ.

ZEREMIAH 32:8

Chatanachata ei heinawhpa Hâname cha Abeipa bie hawhta, vaituhpa dôhpachhôh tlyhmia liata kei lâ a vy ta, ei hnohta, ‘Benzami râh Anathô liata ei lyu he nâ ta chalei mah y, ryuto a pakhy theipa na châpa vâta, nâ ta na chatlai awpa a châ,’ tah ta. Chatanachata cha cha Abeipa bie kha a châ tahpa pahno ha na ta.

1 SAMUELA 10:1

Samuela ta sathaw ôh pachhi ta, Sawla luh liata bao ta, Sawla cha a pahnâ ta, a hnohta, “Abeipa ta a ryuto chô liata ryureituhpa châ awpa ta sathaw a cha thu. Abeipa phopi chô liata ryureih aw chi ta, âmo a chadôpa ama chariahpazy ku tawhta na pachha aw ei. He he Abeipa ta a ryuto chô liata ryureituhpa châta sathaw a cha thu tahpa na châta ngiana a châ aw.

1 SAMUELA 14:20

Sawla nata a pheisaih zydua cha a hmaohpakhy ei ta, adyuhna lâ pua ei ta. Philistinâ mo cha thata a tymâ ei ta, âmo nata âmo ta zaozi ta a chhawh chaimâh ei ta.

1 SAMUELA 14:23

Cha noh ta Abeipa ta Izarei cha pachha ta, Bethave khô lâ taihta amâ dyuh lymâ.

1 SAMUELA 15:1

Samuela ta Sawla hnohta, “Kei he Abeipa ta a phopi Izarei chô liata bei châta sathaw cha thu awpa ta nâ lâta eina vaw tuapa kha châ na ta, chavâta tahmâ Abeipa bie reipa he nathlie teh.

1 SAMUELA 16:1

Abeipa ta Samuela hnohta, “Sawla cha Izarei chô liata bei châta ei khoh khao leipa châ ta, ano vâta khachâ ma pachârôhpa ta na y aw? Na saki ôh liata sathaw pabie la, sie teh. Bethlehe khihpa Zese lâta ei cha tuah aw. A sawchapawzy hry liata pakha keima châta bei ta ei rao haw,” tah ta.

1 SAMUELA 16:3

Atheihna hlâna liata Zese cha aw aw chi ta, na tao awpa ei cha chho aw. A moh ei cha chho awpa cha sathaw eina thupa aw chi,” tah ta.