1 SAMUELA 2:30 - Mara Bible RV (BSI)

³⁰ Chavâta Abeipa Izarei Khazohpa ta hetana heta a tah: ‘Na chipathlazy nata châ pathlatuhpa chipathlazy cha ei hmiakô liata chhâzaw ta ama y aw,’ tahpa ta bie a vaw taih taraw na ta, tahmâ deikua cha Abeipa ta, ‘Cha hawhta châ khao aw vei, nâ palyupalihpa maih palyupalih aw ei na ta, nâ mohnaopa maih cha ama noh â li lymâ aw.

1 SAMUELA 2:30 ပူးပေါင်းရင်းမြစ်များ

1 ABEIZY 11:11

Chavâta Abeipa ta Sawlawmaw hnohta, “He hawhta y ha chi ta, zyh awpa ta bie ei cha piepa, ei biehrai nata ei bieraopazy na zyh leipa vâta, khinarâh he cha chhu aw na ta, châ chakaotuhpa ei pie aw.

1 ABEIZY 2:27

Sawlawmaw ta Abiathâ cha Abeipa theihthaipa a châna pabâh ta, chatanachata Abeipa ta Eli chhôhkha kyh Silô liata a reipa kha a vaw tlôpa a châ.

1 THÂTIHZYRONA 17:18

Châ chakaotuhpa na palyupalihna kyh liata, Dâvi heta reih awpa khâpa a hnei khao? Châ chakaotuhpa he pahno pasia tlôh chi ta.

2 THÂTIHZYRONA 15:2

Âsâ dy awpa ta pua ta, a hnohta, “Asâ nata Zudâh nata Benzami pathla zydua saih u, na nathlie teh u: Ano chhâh namâ châh chhôh zydua cha, Abeipa chhao ta nama chhâh a châ ta, ano nama tlua khiahta cha, hmô aw ei chi ta, ano namâ heihsai khiahta cha, ano chhao ta a châ heihsai aw ei.

2 THÂTIHZYRONA 26:18

Bei Uzia cha pakhâ ei ta, a hnohta, “Uzia y, Abeipa châta ropahâhpa rao awpa cha nâma tao awpa châ vei. Ropahâhpa rao awpa ta pananopa Arawna pathla theihthaipazy tao awpa a châ. Supathaihpa tawhna heta pua ha mah y. Hmo parao chi ta, na hmo taopa he Zehôvâh Khazohpa tawhta palyupalihna na hmô nawpa châ vei,” tah ei ta.

HLAZY 18:20

Ei sianazie hawhta Abeipa ta ei chô liata tao ta, Ei ku pathaihnazie hawhta lymâ eina pie.

HLAZY 18:26

Pathaihpa hnohta na pathaihna palâsa chi ta, Piehpiepa cha a piehpiena hawhta na hrie tyh.

HLAZY 50:23

Alyna bierei atheihna hlâtuhpa ta na parônahsa ta, A yzie â dopa ta a vaotuhpa hnohta, Khazohpa pachhana ei pahmô aw.”

HLAZY 73:20

Chyhsa a kaw hra ta, A mâsapa khâpasaw ta a rei leipa hawhta; Hy Abeipa, nâ hra tita, Âmo cha nothlahpa hawhta hmô aw chi ta, Khâpasaw ta reih aw va chi.

HLAZY 91:14

Abeipa ta hetana heta a tah: “Kyh khâchâ nâ pachâpa cha pachha aw na ta, Ei moh a pahnopa cha ei pabohsa aw.

HLAZY 91:15

Eina pado tita a chhy aw na ta, Nôpona daihti liata a hnohta ypa ta, Pachha aw na ta ei palyupalih aw.

PUASAINA 28:43

Cha chysiazy cha Arawna nata a sawchapawzy ta ahmaohna poh o liata amâ ngia tita nata su pathaihpa liata chakao awpa ta maisâh amâ hnia tita, amâ ky tyh aw. Chataleipatala thailei châ aw ei ta, ama thi pathlei aw. Cha cha Arawna nata a pathlazy châta chhâzaw bieraopa a châ aw.

PUASAINA 29:9

Arawna nata a sawchapawzy cha chaisaihna ta ama chai saih aw chi ta, lakhu pakhu aw chi ta, chatanachata theihthaipa châna cha chhâzaw ta âmo eih châ awpa ta bieraopa ta chahnaopa a châ aw. Cha hawhna chata Arawna nata a sawchapawzy cha na chahnao aw ei.

BIESOZY 12:8

Pahnona phapa a hneipa chyhsa cha reithaina hlao ta, Palôh chhiepa chyhsa deikua cha mohnaona a hlao tyh.

BIESOZY 4:8

Sona cha pasâhsa la, A cha cheihchalo aw; A pyhpahly la, A cha palyupalih aw.

BIESOZY 8:17

Kyh nâ pachâtuhpazy cha ama kyh pachâ na ta, Palôh hmeiseihpa ta nâ tluapazy ta eina hmô ei.

ISAI 29:13

Chatawhcha Abeipa ta, “He phopi heta ama pakah ta nâ vaw hnia ei ta, Ama hmao ta eina palyupalih ei; Ama palôh deikua cha nâ hla kaw ta, Eina china chhao ei cha, Chyhsapa pachuna biepiepa deita a châ.

ZEREMIAH 29:32

Chavâta Abeipa ta hetana heta a tah: Nathlie teh u, Nehelâ chyhsa Semiah nata a pathlazy cha ei hrie tlai aw ei. Abeipa chakhiana bie a reipa vâta, he phopi hry liata a pathla pakha hmahta hroh leipa aw ei ta, ei phopi chô liata hmo phapa ei tao awpa chhao hmô aw vei, Abeipa ta a tah,’ tahpa ta châ paphao mah y,” tah ta.

ZEREMIAH 49:15

Pachâ teh, phopizy hry liata cha panawh aw na ta, Chyhsapazy hry liata mohnaochhihpa ta ei cha tao aw.

EZEKIA 34:10

Abeipa Zehôvâh ta hetana heta a tah: Pachâ teh, mietaku vaituhpazy ei dyuh ei. Ei mietakuzy leidiana kyh liata âmo ku liata maophaohna soh aw na ta, mietakuzy ama mohôhna chhao ei pachhâsa aw. Chatanachata mietaku vaituhpazy cha âmosasyh a pasa khao aw veih ei. Mietakuzy cha ama pakah tawhta pachha aw ei na ta, âmo nie awpa châ khao aw veih ei.

DÂNIAH 4:34

Cha nohzy chhâna liata, kei, Nebukaneza cha avâ lâ ei mo kaw khaih na ta, chatanachata ei pahnona cha kei lâta vaw kua heih ta, Chônôchaipa cha reithai na ta, tlyzaw ta a hrohpa cha reithaipa ta ei palyupalih. A ryureina cha tlyzaw ryureina châ ta, A khinarâh chhâ zydua ta â duah.

MALAKHAI 1:6

“‘Sawchapaw ta a paw palyupalih ta, sei ta a zibeipa a palyupalih. Nâmo, theihthaipa, ei moh nâ pachhietuhpazy saih u, paw ei châ khiahta cha, ei phuhpa palyupalihna cha khataih liata ma a y? Zibeipa ei châ khiahta cha, ei phuhpa chizana cha khataih liata ma a y?’ Pheisaihzy Abeipa ta a cha tah ei. Châhrasala nâmo ta, ‘Kheihta ma na moh cha eima cha pachhie?’ nama tah.

MALAKHAI 2:3

“Moh teh u, nama pathlazy chhorei aw ei na ta, nama hmia liata ie ei hnia aw. Nama kyhchhina iezy tlai cha nama hmia liata hnia aw na ta, cha iezy chhao chata siekheipa nama châ aw.

MALUHREINA 11:20

Nama hry liata a ypa Abeipa dythapa ta, chana chôta Abeipa hmiakô liata paphôh ei chi ta, “Khazia ma Izi râh tawhta eima kaw pua tly?” nama tahpa vâta, thla kha chhôh tlai, aina taih nata apalithluna taihta nama nie aw,’ tahpa ta na chho aw ei,” tah ta.

MALUHREINA 35:34

Kei Abeipa he Izarei sawzy hry liata pahrâ tlôh na ta, chavâta nama hnohta ei yna râh, nama pahrâna râh he nama papuapalei awpa châ vei,” tah ta.

ZAWHÂNA 12:26

Ahy rai eina chakao khiahta la, na zi mawh sy. Nâ chakaotuhpa cha ei yna liata a y hra aw. Ahy rai eina chakao khiahta la, ano cha Paw ta a palyupalih aw.

ZAWHÂNA 5:23

Chatanachata chyhsa zydua ta Paw ama zapa hawhta, Sawchapawpa chhao ama za hra aw. Ahy rai Sawchapawpa a za leipa cha, ano tuahtuhpa Paw a za leipa a châ.

ZAWHÂNA 5:44

Nâmo nata nâmo a reithai raihrie ei chi ta, Khazohpa hmeiseihpa a y chhôhpa tawhta â vypa reithaina hmâchhâh nama tlua vei khiahta cha, kheihta namâ ngiapâ thei aw?

ZAWHÂNA 8:49

Zisu ta, “Ahripa azopa châ va na, ei Paw ei palyupalihpa tlao a châ. Nâmo deikua ta ei moh nama pachhie.

1 KAWRINI 4:5

Chavâta a daihti a tlô hlâ nata Abeipa â vy hlâta cha, pachiana biepathlupa khâpa hmah tao khuh vy. Ano ta zohna liata hmo nyupazy cha khaihna lâ vaw puakhei aw ta, palôh achhuahnazy a palâsa aw. Cha tita chyhsa to Khazohpa reithaina ama hlao chyu aw.

1 PITY 1:7

Chatanachata pasiapa ta a ypa namâ ngiapâna cha, mei ta pasiapa ngôh hlâta sôh viapa ngiapâna hmeiseihpa a châzie a lâ aw ta, Zisu Krista â vaw luah tita reithaina nata palyupalihna nata rônahna zy nama to aw.

RYUREITUHPAZY 9:10

Chatawhcha thozy ta theiku kô hnohta, ‘A vy la, eima bei vaw châ teh,’ tah ei ta.