1 SAMUELA 12:20 - Mara Bible RV (BSI)

²⁰ Samuela ta ama hnohta, “Chi khah u, he hmo pha lei ngaitapa he tao tlai ei chi ta, châhrasala Abeipa nama zipa cha tleisai leipa u la, nama pathipalôh tlokhuh ta Abeipa cha chakao muh vy.

1 SAMUELA 12:20 ပူးပေါင်းရင်းမြစ်များ

1 THÂTIHZYRONA 28:9

“Nâ, Sawlawmaw, ei sawchapawpa y, na paw Khazohpa he pahno la, pathipalôh tlokhuh ta nata tao khona palôh hneipa ta ano cha chakao mah y. Abeipa cha palôh zydua mohtuhpa châ ta, achhuahna nata pachâna zydua pahnotuhpa a châ. Ano cha na tlua khiahta cha, hmô awh chi ta, nâ heihsai khiah deikua cha, chhâzaw ta a cha thy aw.

HLAZY 101:3

Hmo pha leipa kheihawhpa rai, Ei mohmô liata soh aw va na. Lâpi a tleipazy hmotaopa a hao na ta, Kei liata a bai aw vei.

HLAZY 125:5

Lâpi akopazy lâta a tleipazy deikua cha, Abeipa ta hmoparaopazy hnohta a papua aw ei! Izarei chô liata thlalôhna y mawh sy!

HLAZY 40:4

Abeipa a ngâpa chyhsa cha a nohlao na; Ano cha apalaipa lâ a heih leipa ta, Haipa bie lâta a pavia leipa a châ.

PUASAINA 23:25

Abeipa nama Khazohpa nama chakao awpa a châ. Chatanachata nama viahchhâ nata ti zy byhnâ pie aw na ta, nama hry tawhta hriiah ei papai aw.

PUASAINA 32:30

A mylâ ta Mawsi ta zawpi hnohta, “Moleina lai ngaitapa nama tao haw. Tahmâ he Abeipa lâ khy aw na ta, nama moleina chatlaina ei tao thei aw tly ma,” tah ta.

ZEREMIAH 3:1

“Chyhsa ta a lapinô ma sala, A lapinô cha o tawhta pua ta, Vahpa hropa a hnei ha khiahta cha, A lapinô cha a hnei heih aw ma? Cha hawhta taopa cha, Thata râh papuapaleipa châ aw vei ma? Na khopaw hluhpi liata nâ zuah khai tawhta ma, Kei lâ vaw kua heih nâ chhuah?” Abeipa ta a tah.

HÂKAI 2:5

‘Chi khah u, Izi râh tawhta nama kaw pua nota bie ei châ taih hapa hawhna ei khata, ei Thlahpa ta khâ a cha ypâ lymâ ei.’

RYHPACHANEINA 10:12

“Chavâta Hy Izarei, Abeipa nama Khazohpa ta a châ hnawpa ei cha khâpa hropa châ leipa ta, Abeipa nama Khazohpa cha chipa ta, a lâpi zydua a chhih ta, ano kyhpachâ ta, nama pathipalôh tlokhuh ta nata nama thlahpa tlokhuh ta Abeipa nama Khazohpa cha chakao ta,

RYHPACHANEINA 11:16

A vaih teh u, chataleipatala nama palôh dôveipa ta y aw ta, tlei aw ei chi ta, khazoh hropazy chakaopa ta namâ chhy pathlei aw.

RYHPACHANEINA 31:29

Ei thi tawhta thata molei aw ei chi ta, bie ei cha piepa ei lâpi tawhta nama tleisai aw tahpa ei pahno. Noh a vaw tlô awpazy liata, nama ku hmotaopa ta Abeipa hie pahâhpa ta, a mohmô liata hmo pha leipa nama tao awpa vâta, hmo pha leipa ta a cha tla thlu aw ei,” tah ta.

ZAWSUA 23:6

Chavâta Mawsi ryhpa châbu liata ropa zydua riahphapa ta zyh u la, tao teh u. Chachâh lâ tlyma, chavei lâ tlyma, tleisai cheita khuh vy.

1 PITY 3:16

chhie nata pha pahnona pathaihpa hmâpa ta nama tao awpa a châ. Chatanachata Krista liata nama hrozie phapa a reipachhie tyhpazy cha maophyuhpa ta ama y aw.

1 SAMUELA 12:19

Izarei phopi zydua ta Samuela hnohta, “Eima thi lei nawpa ta, châ chakaotuhpazy châta Abeipa na Khazohpa lâ thlah miah chhâpa teh. Bei hiah pi ta, he hmo pha lei ngaitapa eima taopa he, eima moleina zydua baichhatuhpa tlao a vaw châ,” tah ei ta.