1 KAWRINI 4:10 - Mara Bible RV (BSI)

¹⁰ Keimo la Krista châta ahrupa châ pi ta, nâmo deikua Krista liata asopa nama châ. Keimo la chiehleipa châ pi ta, nâmo deikua thatlôpa nama châ. Nâmo cha chyhsa palyupalihpa ta y ei chi ta, keimo deikua chyhsa mohnaopa ta eima y.

1 KAWRINI 4:10 ပူးပေါင်းရင်းမြစ်များ

2 ABEIZY 9:11

Zehu cha a zibeipa chakaotuhpazy lâ vaw pua ta, ama hry liata pakha ta a hnohta, “Ato a pha khai ma? Kha ahrupa kha khâpa vâta nâ lâ a vypa ma a châ tly?” tah ta. Zehu ta ama hnohta, “Nama pahnopa chyhsa châ ta, a bie reipa chhao nama pahno kha zaw,” tah ta.

BIESOZY 11:12

A vaih a mohnaopa cha pahnona a phahlapa châ ta, Chyhsa novâhpa deikua cha â chalih tyh.

ISAI 53:3

Ano cha chyhsazy ta mohnaopa ta dytha ei ta, Pachârôhnazy a hneipa chyhsa châ ta, Pachâchhienazy a pahnopa a châ. Chyhsazy ta ama hmia ama nyusaipa chyhsa hawhta, Mohnaopa ta y ta; Keimo chhao ta, Ano cha pasâhsa hlei hra ma pi.

HÔSIA 9:7

Hriena nohzy vaw tlô ha ta, Viarithôna nohzy a vaw tlô haw; Cha cha Izarei ta pahno mawh sy. Nama moleina hluh tupa nata namâ haona lai tupa vâta, Hrohsopa cha ahrupa châ ta, Thlahpa chyhsa cha angâpa a châ.

MATHAI 24:9

“Riethei tao awpa ta cha patusa aw ei ta, cha thie aw ei ta, ei moh vâta phopi zydua ta ama châ hao aw.

MATHAI 5:11

“Chyhsa ta keima vâta cha reipachhiepa ta nata cha taolapa ta, bie pha leipa to ta â doleipa ta ama cha tei tita, nama nohlao na.

LUKA 10:16

“Nama bie a theipa cha, ei bie a theipa a châ. Nâmo châ khoh leipa cha, kei nâ khoh leipa châ ta, kei nâ khoh leipa cha, nâ tuahtuhpa a khoh leipa a châ,” tah ta.

LUKA 18:9

Sia â tah kawpa ta, mohropazy a mohnaopa chyhsazy hnohta, he pakhona bie he Zisu ta reih ta:

LUKA 6:22

“Chyhsa Sawchapawpa vâta, chyhsazy ta châ haopa ta, cha pathluapa ta, cha pasipasawhpa ta, nama moh ama cha pachhie tita, nama nohlao na!

HMOTAOPAZY 17:18

Epikuria nata Stôika chyhsa sopa thokhazy chhao Pawla cha a dyuh ei ta. Thokha ta, “He reih hluhpa heta khâpa ma rei â chhuah?” tah ei ta. Thokha ta Zisu kyh nata thyuheihna kyh a reipa vâta, “Chihropa khazohzy biechhotuhpa a châ ei aw,” tah ei ta.

HMOTAOPAZY 17:32

Athihpa thyuheihna kyh ama thei nahta, thokha ta pahneisao ei ta, ahropazy ta, “Cha kyh cha nâma tawhta eima nathlie heih aw,” tah ei ta.

HMOTAOPAZY 26:24

Cha hawhta a thaichâna bie a rei hai nota, Festâ ta ao paro ngaitapa ta, “Pawla, na palôh â ki khao leipa he! Nâ chu hluhna ta a cha pahrusa ha hih!” tah ta.

HMOTAOPAZY 9:16

Ei moh vâta riethei khatlu ta ma a tao aw tahpa ei pahmôsa aw,” tah ta.

1 KAWRINI 1:21

Khazohpa sona liata cha, khizaw ta sona hmâpa ta Khazohpa a pahno thei vei tawhta cha, biechhona hrupa hmâpa ta a ngiapâpazy pachhapa cha Khazohpa ta pha a tah ngaita.

1 KAWRINI 1:23

Keimo deikua cha, Krista khaipâpa thâtih eima chho. Cha cha Zuzy châta achapiana châ ta, Zenitaizy châta hruna a châ.

1 KAWRINI 1:25

Khazohpa hruna cha chyhsapa sona hlâta so via ta, Khazohpa chiehleina cha chyhsapa thatlôna hlâta a thatlô via.

1 KAWRINI 10:12

Chavâta â duahpa ta â pachâpa cha a chado mawh sy, chataleipatala a pao pathlei aw na.

1 KAWRINI 2:14

Khizaw chyhsa ta Khazohpa Thlahpa hmozy a pyh vei. Ano pachâ ta cha hruna châ ta, thlahpa ta pahnopa chi a châpa vâta pahno thei vei.

1 KAWRINI 2:3

Chiehleina, china nata thata achalyuna chôta nama hry liata ei y tyh.

1 KAWRINI 3:18

Ahy hmahta anosasyh ta a dôvei khah sy. Nama hry liata ahy rai, he chhâ liata a so kawpa hawhta â pachâ khiahta cha, a vaw so thei nawpa ta ahrupa lâta a lie mawh sy.

1 KAWRINI 3:2

Pati hmeiseihpa a nie thei awpa nama châ mâh leipa vâta, pati hmeiseihpa châ leipa ta, sâhpiti ta ei cha pasa ei. Tahmâ chhao he a nie thei awpa châ mâh veih ei chi,

1 KAWRINI 4:8

Namâ ngiahpazy nama hnei khai haw! Nama vaw hneirôh haw! Keimo a hlao leipa ta beizy nama vaw châ haw! Beizy châ hmeiseih u la, keimo chhao nama hnohta a bei hra sih la ei tah kaw dia!

2 KAWRINI 10:10

Thokha ta, “A châpaphaopazy a hri ta, a tha chhao tlô ta, a pôhpa deikua chiehleipa châ ta, a biereipa chhao khâpa hmah châ vei,” eina tah ei.

2 KAWRINI 11:19

Nâmo la asopa nama châpa vâta, ahrupazy chhao palôh pha kawpa ta nama chhyh thai!

2 KAWRINI 11:29

Ahy ma chiehleipa ta y ta, chiehleikheipa ta ei y vei tly? Ahy ma pahluasapa ta y ta, hiehâhkhei leipa ta ei y tly?

2 KAWRINI 13:9

Keimo eima chieh vei no chhao ta, nâmo thatlôpa ta nama ypa cha eimâ ly chaina a châ. Phapakipa ta nama y thei nawpa ta thlah eima chhâ lymâ.

2 KAWRINI 4:12

Chatanachata keimo liata thina ta rai hria ta, nâmo lia deikua cha hrona ta rai a hria tyh.

2 KAWRINI 6:8

rônahna nata nozana liata zy, reipachhiena nata reithaina liata zy, modypa ta eima y tyh. Chyhsa dopa châ pi ta, châhrasala chyhsa dôvei thaipa hawhta miah ama pachâ.

1 THYSALAWNIKA 4:8

Chavâta he hmo a papeisa leituhpa cha, chyhsa a papeisa leipa châ leipa ta, a Thlahpa Pathaihpa miah pietuhpa Khazohpa a papeisa leipa a châ.

1 PITY 4:14

Krista moh vâta pasipasawhpa nama châ khiahta cha, rônahna Thlahpa nata Khazohpa Thlahpa cha nama chô liata y ta, chavâta nama nohlao aw.