1 ABEIZY 15:18 - Mara Bible RV (BSI)

¹⁸ Âsâ ta Abeipa o sôh nata abei o sôh sonazy liata tâkâ nata ngôh zydua la ta, a chakaotuhpazy ku liata hlâ ta. Cha sôhzy cha Bei Âsâ ta Dâmaskâ khih liata a ypa Aramia bei Benhadâ lâ paphao ta. Benhadâ cha Heziô sawchapawpa Tâbarimaw sawchapawpa a châ. Âsâ ta Benhadâ hnohta,

1 ABEIZY 15:18 ပူးပေါင်းရင်းမြစ်များ

ÂTHAONA 14:15

Zâ ta chho awpa ta ano nata a chakaotuhpazy a pachhaih ei ta, thie lymâ ei ta, Dâmaskâ chavei lâta a ypa Hôbâ khih taihta a chadai ei ta.

ÂTHAONA 15:2

Châhrasala Abarâ ta, “Hy Abeipa Zehôvâh, khâpa eina pie aw chi, saw leipa châ na ta, ei ryu a to awpa cha Dâmaskâ khihpa Elieze a châ?” tah ta.

1 ABEIZY 14:26

Abeipa o liata ryusôhpazy nata abei o liata ryusôhpazy lapa ta, hmo to siekhei ta. Sawlawmaw taopa ngôh vyhphao zydua chhao a siekhei khai haw.

1 ABEIZY 15:15

A paw hmohlâpa pathaihpazy nata ano hmohlâpa pathaihpa tâkâ, ngôh nata hmobaohzy cha Abeipa o liata a ngiakhei ta.

2 ABEIZY 12:17

Cha daihti liata Aramia bei Hâze cha khy ta, Kâthâ khih a dyuh ta, la ta. Hâze cha Zerusale lâ khy lymâ a chhuah ta.

2 ABEIZY 12:18

Zudâh bei Zehôasâ ta a pathlatuhpa Zudâh bei Zehôsaphâ, Zehôrâ nata Ahazia zy ta ama vaw hlâ hapa hmo ziehpa zydua nata ano daihti liata hmo ziehpa a pachôpazy nata Abeipa o liata nata abei o liata ryubyhzy liata ngôh a ypa zydua la ta, Aramia bei Hâze hnohta paphao ta. Chatanachata Hâze ta Zerusale cha kuasai ha ta.

2 ABEIZY 12:19

Zôasâ thâtih hropazy nata a hmotaopa zydua cha Zudâh beizy thâtih rona châbu liata ropa a châ.

2 THÂTIHZYRONA 15:18

A paw hmohlâpa pathaihpazy nata ano hmohlâpa pathaihpa tâkâ, ngôh nata hmobaohzy cha Khazohpa o liata a ngiakhei ta.

ZEREMIAH 49:27

“Dâmaskâ thokhy liata mei patih aw na ta, Benhadâ abei ozy a kâ khai aw,” Pheisaihzy Abeipa ta a tah.

AMÔSÂ 1:4

Chavâta Bei Hâze o liata mei tuah aw na ta, Benhadâ abei ozy a kâ khai aw.