Zefaniya 1:17 - Amazwi Yakwe Leza 2013

¹⁷ Yawe wavwanzile ati, “Nemo ndaponyezya antunze impungo, cakuti yene yalapuputa wa mpafu, pano yene yiifya kunondi. Uwazi wao ulakonkoloka wakwe mulamba, ni vyala vyao vilaolela apambiliwili wakwe citindi.”

Zefaniya 1:17 ပူးပေါင်းရင်းမြစ်များ

Masamu 83:10

Wayacimvisye uku Endoli, ni vyala vyao apano vyatikite wakwe citindi.

Ezaya 29:10

Pano Yawe wataleka ukuti mwemo mwasipula, mupone nu mutulo twa mfwa. Yakasema ali yano yalaatungulula antu, lelo Leza wene wayazyatika amanso.

Ezaya 50:1

Yawe wavwanga wati, “Uzye kalata wakutaana wino natelilepo mayo winu ali kwi? Nanti uzye akuli weni uwankongwesizye, kuno nakazizye mwemwe? Awe, mwemo yamukazizye uku uzya pamulandu wa maifyo inu, nga nyoko nawe yamusenzile pamulandu wa nkota zinu.

Yelemiya 10:18

Yawe Leza wasya amuvwintile kutali ni mpanga ii.

Yelemiya 15:3

“Mu cumi anene ne Yawe nayapingwilile imikosi ii ini, kuti iyaponele. Yalayakoma na yasimbwa yalatakanya ivyala vyao. Ivyunyi navyo vilayakompola ni nyama zya mpanga zilalya ivilasyalako.

Yelemiya 18:21

Caleka we Yawe, sungala uleke ana yao yafwe ku cipowe, kayafwe nu ku nkondo. Leka aci yao yafwilwe ana na yaiya. Leka aonsi yafwe ku mpungo, na alumendo leka yafwe ku nkondo.

Yelemiya 2:17

Uzye asi mwemwe mwenga mwalenga cico, apamulandu wakufutatila Yawe Leza winu, apacisila cakumutungulula umu nzila yampomvu?

Yelemiya 2:19

Uyi winu ulamuletelela na ucisanguka winu ulamuzewanya. Alino lyene mulasambilila, muluvwa nu usungu icakuti nu kumucuzya cilamucuzya apakulola vino ukusuula Yawe Leza winu, nu kukana moopa kwaya. Ivyalanda ne Yawe Leza Wamaka yonsi.

Yelemiya 3:25

Katuletulambalale sile pansi pamulandu ni nsonyi. Ukuzewana kwitu kakule kutucitepo cimwi. Swemo kumwi ni vikolwe vitu twaifya kuli Yawe, ukutandikila sile uku wance witu, ukwizafika nu wanda wilelo. Twakana nu kuvwa ukwi zwi lyakwe Yawe, Leza witu.”

Yelemiya 4:18

“Endi, mwe ina Yuda amwemwe mwailetelela sile mwenga uku mikalile inu. Uyi winu auno wamuletelela uku macuzi yaa. Lyene mwatimucekama sile pamulandu nu kucula, ni myenzo inu nayo pasi paukali.

Yelemiya 8:2

Mu cifulo cakuti yakonganikwe nu kuzikwa, amafupa yao yalaya wakwe citindi uwatatulumana pa musili. Yene yalaanikwa ku kasanya, ku mwezi nu ku ntanda, uku vintu kwene vivyo vino yatemilwe ukutumikila, vino yakalondela nu kuuzya kuno vili nga nu kuvipepa. Kutalaya uwakuyakolonganika nu kuyaziika. Yalikala pa musili wa muvundo.

Nyimbo zya ndosya 1:14

“Amaifyo yitu wayamanya yonsi pyu nupya wene wayanyepa pamwi. Wene wayanyinyinzya mu nsingo yane, nga nane nanyomelwa. Ala Yawe wansumba mu makasa ya anisi yane yano ntange indwe nayo, awe.

Nyimbo zya ndosya 1:18

“Lelo Yawe walungika, pasi pano natalamile amasunde yakwe. Munguvwwe mwe antu mwensi. Lolini vino nkuwaikwa. Alumendo na akazyana yane yasendwa umu uzya.

Nyimbo zya ndosya 1:8

Yelusalemu waifya apakalamba, nga acino wataikowezya asyala tupu! Yonsi amucindikanga mpiti yatiyamusuula. Ali cino lyene akufuteka nu kuvimba apa manso pamulandu ni nsonyi.

Nyimbo zya ndosya 2:21

Akote na ance ayaya yatuzi mu miseo, yatiyafwa. Anisi yatiyakomola alumendo na akazyana ku malupanga. Awewe wayakomozile ukwaula nu luse, uwanda uno wasosile ukali ukali.

Ezekelo 16:38

Nupya ndakupezya ivikapeziwa yamangu yano atemwa ukulongozya nu kuzwisya uwazi. Ndakuvunuka nu lucu nu uzuwa.

Ezekelo 24:7

Mwali ukakasi mu musumba. Uwazi utazwanga pa musili apakuti lukungu aluno luuzike, wakonkolokanga pali cilwala, apiwe.

Ezekelo 24:8

Nani kwene ali pano naleka uye, pakuti waloleka, ali kuti icipyu cane cilandwilwepo ukali ukali.”

Amosi 4:10

“Namuponyezizye impungo ya ndwala wakwe ilya ino naponyezizye aina Eguputo. Nakomisizye alumendo inu umu nkondo, natungulwile ni mfwalasi zinu uku anisi inu. Namununsyanga ni fungo lya vyala ilyafumanga mu nkambi ya asilika. Lelo mutawezile kunondi. Avino Yawe wavwanga.

Mika 7:13

Insi ilasanguka iye ulwanga pamulandu wa vicitwa viipe vya aikazi ya mwenemo.

Mateo 15:14

Lekini yaye. Yene intunguluzi mpafu. Impafu ndi yatungulula impafu yuze, ale zyoili kwene zingaponela mu ciwina.”

Loma 11:25

Kuli nkama ya cumi, inane, ino nkasi mumanye kuti mutize mwaelenganya ukuti mwemwe yamano. Inkama iyakuti, ukukoma kwa myenzo ya ina Izlaeli kusi kwa manda pe, lelo kulatwalilila kufika pa nsita ino Akulukuwa yonsi asolwa iiza kuli Leza.

Loma 11:7

Lyene, cili uli? Aina Izlaeli yatazanyile cino yalondanga. Impendwa sile inono yakwe yano Leza wasolwile acizanyile. Asyala yene ayakomya myenzo.

2 Kolinto 4:4

Yene yatataila, pano Satana wino ali leza uwa nsi ii, walesyanya kuti yatalola luswepo ululi Ilandwe Lisuma lya pali Klistu uwa lulumbi.

2 Petulo 1:9

Lelo wino wensi atakwata vintu vii ala wene akoline wa muntu akalola ciyeye nupya wene wilila ukuti waswefiwa ku maifyo yakwe a mpiti.

1 Yoane 2:11

Lelo wino wensi uwapata umwina wakwe wene ali mu mfinzi. Wene akapita mu mfinzi nupya atamanya kuno akuya, pano mfinzi yamupafuzya.

Umbwilo 3:17

Wemo ukulanda uti, ‘Nene mukama nupya nikala ningo. Ntulilwa cimwi.’ Lelo utamanya vino wewe mucuzi nupya mulanda! Wewe mupina, wemo wewe mpafu nupya uli tupu.