Zakaliya 8:13 - Amazwi Yakwe Leza 2013

¹³ Mwe antu amu Yuda mwe, na mwe ina Izlaeli mwe! Mpiti ainamasi yatolanga izina linu, alino iyalumbula pakutipwila antu yauze, ala yakuti, ‘Mwe anisi mwe, cakumulya caula, wakwe cici calile Ayuda na ina Izlaeli!’ Lelo nemo ndamutuula, na inamasi lyene yamamoopanga. Si mungala mwalukupolelewa ndi vikwene ivyapolelelwa Ayuda na ina Izlaeli! Caleka mwemo posyini sile, mutaoopa foo.”

Zakaliya 8:13 ပူးပေါင်းရင်းမြစ်များ

Utandiko 26:4

Ndalenga ana yako kuvula wa ntanda zya mwiyulu, nupya ndayapeela impanga ii yonsi. Mitundu yonsi ili nu kunguzya kuti njipolelele wakwe vino natimpolelela ana yako.

Masamu 44:16

apamulandu wakuvwa ivimazwi vya muzewanya ni ntusi izikatukana anisi yane na antu atupata.

Masamu 72:17

Antu yangala yateezya yamwilila, nu lulumbi lwakwe lwalu kuyelelela wi lanzi. Antu ya mitundu nayo kayalumba umwene wa mpanga yao, yapapata na Leza ukuti ayapolelele, ndi vino wapolelile umwene wa mpanga yao.

Masamu 79:4

Antu ya mitundu yano twapalamana nayo pasi pakutusoweka. Yene yakutuseka nu kutuwela penepo.

Ezaya 43:28

Yakateeka inu nayo kwene yansaalwile nu kukowezya Ng'anda yane ikulu. Ali cino nani namufulwile mwe ina Izlaeli nu kuleka ukuti mwe antu yane muzewane.”

Yelemiya 24:9

Ndayalenga ukuya na kasokonda uku wene uli onsi uwa panonsi. Yene yalaya izewanya lya antu nu musowe, inseko nu lutipu umu ncende zyonsi muno ndayazingila mwenemo.

Yelemiya 25:18

Yelusalemu ni misumba yaku Yuda, yamwene yao ni vilolo vyao, apakuti ice isanguke ulwanga nu kononeka. Ikawelwe nu kutipwilwa ndi vino caya nu mwilelo kwene.

Yelemiya 26:6

Ndi cakuti mwatwalilila ukukanayuvwila, lyene ndacitila Ng'anda ikulu ndi vino nacisile ku Syilo. Alino imitundu yonsi ya muno nsi yalaomvya izina lya musumba uu uwa ntipu.”

Yelemiya 29:18

Ndayazinganya nu lupanga, ni cipowe nga ni mpungo. Ndayaletela intete ni ngofyo uku wene uli onsi wa pano nsi. Yalaya antu yamwi atipwe, akuwelwa nupya azewane mu mitundu yonsi muno nayasalanganyizizye.

Yelemiya 33:24

“Uzye utuvwile vino antu yakulanda ukuti Yawe watasumba inko zyakwe Yuda ni zyaku Izlaeli zino waisololwelile sile umweneco? Yati yasuula antu yane, yasikuvwika apa mitundu foo!

Yelemiya 42:18

“Yawe Wamaka yonsi, Leza wa ina Izlaeli wavwanga wati, ‘Vino ukali wane ni cipyu cane vyaponile akaya aku Yelusalemu, ali vino cipyu cane cilamuponela ndi mwaya ku Eguputo. Mulaya antu yamwi atipwe na asulwe. Mutalatala musyukile incende ii nupya.’ ”

Yelemiya 44:12

Alino lyene ndasenda antu alasyalapo amu Yuda yano yapanzile ukuya ikala ku Eguputo. Ndalola inzila yakuyalovezyamo, muno kwene mu Eguputo. Yalafwa ku nkondo, uku cipowe nu ku mpungo. Antu yalazunguka sile pa kuyalola. Yalayawela nu kuomvya izina lyao apakuyatipwila.

Yelemiya 44:22

Asi papo, ukufika napilelo impanga inu yononeka mutacili nanti umwi uwakwikala mwenemo. Antu yauze yakazunguka sile, apakulola vino cili, ni zina linu, ali lino yakaomvya apakutipwila. Pasi pano Yawe wasusile waposiwa ukuzizimizya apa miyele inu ni misango inu iipisye.

Nyimbo zya ndosya 4:15

Antu yalaizyanga ala yakuti, “Senkini! Mwemwe yakowele! Funtukini! Funtukini! Mutatukumya!” Acino nayo ali vino yafumile nu kuutukila ku inamasi, nga kusi umwi uwayazengile.

Ezekelo 34:26

Ndaleka ikale ukuzinguluka umwamba wane. Ndatonyezyamo imvula pa nsita ilinge, nupya ilaya imvula ya upolelelo.

Ezekelo 37:11

Alino Yawe anena ati, “We mwana wa muntu, ala aina Izlaeli yaya wa mafupa yaa. Yene yakati, ‘Swemo tuuma solokoto wa mafupa kwene yayo, nu upaalilo kutacikweti, foo; Twala twalowelela sile.’

Ezekelo 5:15

“Lino nemo ndasoka nu kukufokela ukali ukali apakukufulula, antu amitundu yakuzinguluka yalalemwa ni ntete. Lino yalakulola, yalakusaalula nu kukuwela. Ivyalanda ne Yawe.

Danieli 9:11

Izlaeli wensi wavuna amasunde yako nu kukufutatila, nupya wene wakana ukukuyela. “Caleka swemo twifya kunuli nu kuiletelela intipu zino zyalembwa mu Masunde yakwe Mose, umuomvi wako we Leza.

Mika 5:7

Lyene antu yakwe Yakobo asyala yonsi yalaya pakasi ka mitundu ingi ya antu, wa lumi ulwafuma kuli Yawe. Yalaya wa mvula ino ikutonya pa mulemvwe, ino isilolela ukunenwa nu muntu, nanti umuntu aipeele ilamulo.

Zefaniya 3:16

Insita imwi ilafika, lino yalamunena mwe ina Izlaeli iyati, “Mutuvwa intete mwe ina musumba wa Zioni! Mutaleka na makasa inu yapomponteke foo!”

Zefaniya 3:20

Pa nsita ilya indamukonganika, nu kumuwezya ku mwinu. Ndaleka mulumbuke nu kuya alongo, pakasi ka antu amu mitundu yonsi ya pano nsi. Ndamuwezezya uwene winu mule mukulola.” Avino Yawe wavwanga.

Hagai 2:19

mutakweti ing'ano izingi umu nkoma zinu. Amatingi, amasamvu, imipomegeleneti ukwikapo ni miolivi kwene vyonsi vitaseeka. Lelo ukutandika pa wanda wi lelo kwene nemo namamupolelelanga pe.”

Hagai 2:5

Mutuvwa intete awe, pano umupasi wane uli pano muli kuti umwazwe muli vyonsi vino mukucita ndi vino nalavile lino namufumizye umu Eguputo.”

Zakaliya 1:19

Alino inuzya umungeli uwalandanga kunondi, inti, “Uzye impembe zii zyalola mwi?” Nga nawe aasuka ati, “Zii zili mpembe izyasalanginye antu aku Yuda, aku Izlaeli na aku Yelusalemu.”

Zakaliya 14:11

Antu yalikala kuku ku matwi cele, kutalaya nupya ica kuyofya ku kononwa nupya.

Zakaliya 8:15

Lelo ndakai nimpanga ukupolelela aina Izlaeli na Ayuda. Caleka mutuuvwa intete.

Zakaliya 8:9

“Posyini! Pali ndakai mwemo mukuuvwa amazwi ali yonga sile yano yakasema yalandanga, lilyo lino umufula wa kukuulilapo cipya cipya Ng'anda yane ikulu wafukwilwe.

Zakaliya 9:13

Pasi pano nemo namuteyanya mwe Ayuda wa ulapwa wane. Nimwika wa luceto mwe ina Izlaeli. Aonsi amu Zioni ali yano namaomvya wa lupanga, pa kulwisya aonsi amu Gilisi.”

1 Kolinto 16:13

Pempulini nu kukomeleka mu utailo, posyini, muye na maka.

Galatiya 3:14

Klistu wacita cii kuti upolelelo uno Leza walavile kuli Abulaamu upelwe ku Akulukuwa muli Klistu Yesu. Cii cacitike kuti mu utailo tungapelwa Mupasi Wamuzilo wino Leza walavile Abulaamu.

Malango 26:19

Mwemo alaleka muye uluko lukulu ukuluta antu amu nko zyuze yano waumba, nga namwe mulamulumbanya nu kumucindika.

Malango 28:37

Umu nko muno Yawe alamusalanganyizizya, antu yalazunguka pa vintu vino vyati vimuponela. Yalamuwela nu kumutumfya.