Yoane 9:39 - Amazwi Yakwe Leza 2013

³⁹ Yesu avwanga ati, “Nizile mu nsi ku kupingula milandu ya antu onsi, kuti yao asyalola yalole, na yao akalola nao yaye impafu.”

Yoane 9:39 ပူးပေါင်းရင်းမြစ်များ

Ezaya 29:10

Pano Yawe wataleka ukuti mwemo mwasipula, mupone nu mutulo twa mfwa. Yakasema ali yano yalaatungulula antu, lelo Leza wene wayazyatika amanso.

Ezaya 44:18

Ala yatamanya nu kutezya nanti kamwi. Yene yazyata yasilola akantu nanti kamwi foo. Imyenzo yao nayo isiiluka.

Ezaya 6:9

Lyene nawe anena ati, “Pita ukanene antu yaa uti, ‘Nanti mungakutika uli, lelo mutangatezya. Ukulola mungalola, lelo mutangiluka.’”

Ezekelo 12:2

“We mwana wa muntu, wemo wikala pakasi ka antu yacisanguka. Yene yakwata amanso akulolelako, lelo yasilola. Yakwata amakutwi akuuvwilako, lelo yasiuvwa, pamulandu wakuti acisanguka.

Mateo 11:5

Impafu zikulola, vilema vikupita, yakwe tembwe yakupoziwa, yacipuuli yakuuvwa. Afwe yakututululwa, ni Landwe Lisuma likukosolwa ku apina.

Mateo 15:14

Lekini yaye. Yene intunguluzi mpafu. Impafu ndi yatungulula impafu yuze, ale zyoili kwene zingaponela mu ciwina.”

Mateo 6:23

Lelo manso inu ndi yasi ningo, mili inu ilazulamo mfinzi. Caleka luswepo ululi munomuli ndi lwasenuka lwaya mfinzi, mfinzi iyo imaya ikulu cuze.

Luka 1:79

nu kuyengesa pali yonsi yano aikala mu mfinzi nu mu cinzingwa ca mfwa, nga nu kututungulula mu kwikala umi wa mutende.”

Luka 13:30

Acisila yalaya ankolelo, na yao ali ankolelo ndakai yalaya acisila.”

Luka 2:34

Lyene Simeoni ayapolelela anena Maliya nyina wa mwana ati, “Lola umwana wii waikwa na Leza kuti aye cakuponya nu kukatusya aingi mu Izlaeli, nupya kuti aye wa cilangililo kufuma kuli Leza cino aingi yalakana.

Luka 4:18

“Mupasi wa Mwene uli panondi, pano watampela maka kuti nkosole Ilandwe Lisuma ku apina. Wantuma ku kusapula anyepwe nu kuleka impafu kuti zyalola, nga nu kwiza kulula yano atitikiziwa,

Luka 7:21

Pa nsita kwene ilya Yesu apozya alwale aingi alwile ndwala zya misango na misango, na ali ni mipasi yankota, nga nu kuleka impafu kuti zyalola.

Yoane 12:31

Ndakai, akasita ka kupingula antu amu nsi ii. Ndakai Ciwa kateeka wa nsi ii akucimviwa.

Yoane 12:46

Nemo niza wa luswepo lwamu nsi, kuti wino wensi wantaila atakikale mu mfinzi.

Yoane 3:17

Pano Leza atatumile Mwana wakwe muno nsi kuti aiize apingule amu nsi, lelo kuti atuule umi wao.

Yoane 3:19

Luswepo lwiza mu nsi, lelo antu yakacita viipe. Acino yapingulwa pano yatemwisya mfinzi kuluta luswepo.

Yoane 8:12

Nupya Yesu anena Afaliseo ati, “Nemo nene luswepo lwa antu amu nsi. Wino wensi wandondela, wene atalapita mu mfinzi lelo alaya nu luswepo lukatungulula ku umi.”

Yoane 8:15

Mwemo mukapingula mu mwata wa untunze, nemo nsyapingula umuntu nanti umwi.

Yoane 9:25

Umuntu nawe avwanga ati, “Nda kaifya, nemo ntamanyile. Manyile cintu conga. Nali mpafu, lelo ndakai nkulola.”

Milimo 26:18

Uli nu kuyayula amanso, kuti yafume mu kanda iize ku luswepo, na kuti yafume mu maka yakwe Ciwa iize kuli Leza, na kuti maifyo yao yelelwe kupitila mu utailo wao munondi, nga yapokelele cifulo pamwi na antu yano Leza wasola ukuti yaye akwakwe.’

2 Kolinto 2:16

Lelo ku antu akulowa, wene waya mununko wa mfwa nupya ukakoma. Lelo kuli yao akatuulwa mununko uu uwa cumi nupya ukayapeela umi. Uzye lyene aweni alinzile kuomba mulimo uwa musango uu?

Efeso 5:14

Luswepo lukasokolola vyonsi, wakwe vino calembwa mu malembelo cati, “Zyuka, we muno ukaswile, tutuluka nga Klistu amayengesa panuli.”

2 Tesalonika 2:10

Wene alaomvya inkota pa kusomba yao yano yalalowa. Antu yao yalalowa pamulandu wakuti yatazumile nu kutemwa cumi pakuti yatuulwe.

1 Petulo 2:9

Lelo mwemwe mutundu usololwe, yasimapepo aku wene. Mwemwe luko lwamuzilo, nupya antu yakwe Leza yano asololwa kuti yalande vicitwa vyakwe Leza vyakuzunguka. Leza uwamwama kuti mufume mu mfinzi nga mwize mu luswepo lwakwe ulwakuzunguka.

1 Yoane 2:11

Lelo wino wensi uwapata umwina wakwe wene ali mu mfinzi. Wene akapita mu mfinzi nupya atamanya kuno akuya, pano mfinzi yamupafuzya.