Yoane 7:28 - Amazwi Yakwe Leza 2013

²⁸ Lino Yesu wasambilizyanga mu Ng'anda ikulu yakwe Leza, asanzika izwi ati, “Uzye nemo mwamanya mu cumi, nga na kuno nafuma? Nemo ntaizila pa lwane. Lelo Tata wino uwantuma uwa cumi. Mwemo mutamumanya.

Yoane 7:28 ပူးပေါင်းရင်းမြစ်များ

Masamu 9:10

Antu amanya we Yawe yangala yakutaila. Akakulonda we Yawe usiyatazyela.

Yelemiya 31:34

Alino kutalaya nu kusundana foo. Umwi atalanena umuze nanti umwina ukuti amanye Leza, pano yalamumanya yonsi pyu ukutandikila ku mucepesye ukufika nu ku asambazi kwene. Pasi pano ndayayela uluse ku maifyo yao. Ntalatala nupya niusye amaifyo yao.” Ivyalanda Yawe.

Yelemiya 9:6

Yene yakomela sile ukucita vyaukakasi ni vyaucenjezi. Yene yaposiwa kumwi nu kumanya ne Yawe Leza wao.

Oseya 4:1

Mwe ina Izlaeli, uvwini amazwi yakwe Yawe, pamulandu wakuti wene akumupeela umulandu, mwe antu mwemuno mwikala umu mpanga ii. Wene akumupeela umulandu wakuti, mu mpanga ii musi ucumi nanti ukutemwa, nga na antu yatazumila ukuti nene indi Leza.

Oseya 5:4

Imilimo yao iipe isiyazumilizya ukuwelela kuli Leza wao, pano yakweti imyenzo yakuntataila, nupya yasizumila vyapali Yawe.

Mateo 11:27

“Tata wampeela vintu vyonsi. Pasi nanti wenga uwamanya Mwana suka sile Tata, nupya pasi nanti wenga uwamanya Tata suka sile Mwana, nga na yao yonsi yano Mwana wasola kuti amusokolole kunoyali.

Mateo 2:23

Alino aya ikala mu musumba wa Nazaleti, kuti cifikiliziwe cino Leza wavwanzile kupitila muli yakasema, ati, “Alaamwa mwikazi uwamu Nazaleti.”

Mateo 26:55

Pa kasita kaka, Yesu anena iumba ati, “Uzye mwizile kuli nene ni mpaanga ni zya ntuwa pa kundema, ungati nene cipondo? Manda aingi nazanwanga mu Ng'anda ikulu yakwe Leza, ala nkusambilizya, nga namwe mutandemile.

Luka 10:22

“Tata, wampeela vintu vyonsi. Pasi nanti wenga uwamanya Mwana suka sile Tata. Nupya pasi nanti wenga uwamanya Tata suka sile Mwana, nga na yao yonsi yano Mwana wasola kuti amusokolole kunoyali.”

Luka 2:11

Ilelo kwene mu musumba wakwe Davidi watavyalwa kunomuli Katuula, wino ali a Klistu Mwene.

Luka 2:39

Lino Yosefu na Maliya yamazile vyonsi kulingana na Masunde ya Mwene, yene yaswilile kumwao ku musumba wa Nazaleti mu Galile.

Luka 2:4

Yosefu nawe wafumile ku musumba wa Nazaleti mu Galile nu kuya ku Betelemu musumba uwamu Yudeya mu musumba wakwe Davidi. Cino Yosefu wailileko pano wali uwamu mupanda nu uwamu luko lwakwe Davidi.

Luka 2:51

Caleka Yesu apita nao ku Nazaleti, kuko kuno lyonsi wali uwakutontela akwasi yakwe. Nyina wasunzile vintu vii vyonsi mu mwenzo wakwe.

Yoane 1:46

Natanaeli amuuzya ati, “Uzye mu Nazaleti mungafuma cimwi campomvu?” Filipo amunena ati, “Ndukailolele.”

Yoane 10:36

Nemo Tata wansolola nu kuntuma mu nsi. Uzye lyene mungati uli nkuvwanga mazwi ya misuli kuli Leza, pano inavwanga vino nene Mwana wakwe Leza?

Yoane 12:49

Pano ntakuivwangila, lelo Tata uwantuma wene wampeela ilamulo muno ningavwangila na muno ningakosolela.

Yoane 14:10

Filipo, uzye utataile vino Tata nani twaya wenga? Mazwi yano nkamunena, insiivwangila! Lelo Tata, wino akaikala munondi, akacita milimo yakwe.

Yoane 14:31

Lelo antu amu nsi yalinzile yamanye vino natemwa Tata. Uli mulandu uno nkacita vyonsi vino wampeela ilamulo kuti ncite. “Katukini, tuini tufume pa ncende ii.”

Yoane 16:3

Antu yalacita vintu vii kunomuli pano yatamanya Tata, nanti anene.

Yoane 17:25

Tata, wewe mololoke! Antu amu nsi yatakumanyile, lelo nemo nakumanya, nga na yaa yamanya vino wewe wantumile.

Yoane 17:3

Umi wapee uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.

Yoane 3:2

Wene waile kuli Yesu usiku, amunena ati, “Kasambilizya, twamanya vino wewe Kasambilizya wino wafuma kuli Leza. Pano pasi umuntu angacita vilangililo vino wemo ukacita, suka Leza ali nawe.”

Yoane 3:33

Lelo wino wensi akataila umboni wakwe, wene akasininkizya vino umboni wakwe Leza uwa cumi.

Yoane 5:32

Lelo pali muze wino akapeela umboni pamulandu wane, nga namanya vino umboni uno akapeela uwa cumi.

Yoane 5:43

Nemo nizila mwi zina lyakwe Tata, namwe musikunzengela. Muze ndi angiza mwi zina lyakwe na lwakwe, wene mulamuzengela.

Yoane 6:42

Yavwanga yati, “Uzye wii asi Yesu mwana wakwe Yosefu? Uzye lyene angavwanga uli ati, ‘Nafuma kwiyulu?’”

Yoane 7:14

Lino manda ya kuzevya cimulo yafika pakasi, Yesu aingila mu Ng'anda ikulu yakwe Leza atandika kusambilizya.

Yoane 8:14

Yesu ayanena ati, “Nanti ningaicitila umboni, lelo cino nkulanda ca cumi, pano namanya kuno nafuma na kuno nkuya. Mwemo mutamanya kuno nafuma na kuno nkuya.

Yoane 8:16

Lelo nanti nali nu kupingula, upinguzi wane ungaya uwa cumi, pano nsyacita cii nenga. Tata wino uwantuma ali nani.

Yoane 8:19

Nao yamuzya yati, “So alikwi?” Yesu aasuka ati, “Mutamanyile nene nanti a Tata. Ndi mumanya nene nga mwamanya na Tata kwene.”

Yoane 8:26

Nkweti vintu vingi vyakumunena makamaka pa viipe vino mwacita. Lelo wino uwantuma wene uwa cumi, nga nani nkanena amu nsi vino nuvwa sile kunoli.”

Yoane 8:42

Yesu ayanena ati, “Leza ndi a So mu cumi, nga mwantemwa, pano nemo nafuma kuli Leza. Nupya ndakai ndi pano. Ntaizile nenga, lelo aliwe uwantuma.

Yoane 9:29

Twamanya vino Leza wavwanzile kuli Mose. Lelo umuntu wii, tutamanyile kuno wafuma!”

Milimo 17:23

Pano lino natandalanga mu musumba winu nu kulola mu vifulo vino mukapepelamo, nazanyile akavuwa apalembwa ukuti, ‘Kuli Leza wino atamanyikwa.’ Cico cino mukapepa mu kuntamanya, acino ndakai namamulandila.

Loma 1:28

Mulandu uno antu yakana kusunga mano ya cumi apali Leza mu myenzo yao, Leza wayafutatila kuti yalondela melenganyo yao a ukakasi na kuti yacita vintu vino vitaine kucita.

Loma 3:4

Mucumi citangaya! Lelo Leza wene akalanda vya cumi. Nanti angala antu yonsi yaya antumpu. Cili wakwe vino calembwa mu malembelo cati, “We Leza, leka antu yamanye ukuti vino ukalanda ivya cumi, nu kuti ukayasinda ndi yakulolwesya mulandu.”

2 Kolinto 1:18

Leza angatailwa, nga nani kwene ningatailwa, lino nalanda ukuti kwasuka kwitu kuno muli lyonsi ukwakuti “Ee” lelo asi “Awe”.

2 Kolinto 4:6

Calembwa mu malembelo cati, “Leza watile kuye luswepo, luyako.” Luswepo luyengesa mu mfinzi. Lyene ndakai Leza kwene wiyo akuyengesa mu myenzo itu kuti antu yamanye vino lulumbi lwakwe lukaloleka muli Yesu Klistu.

Tito 1:2

Utailo uwo nga nu kumanya vikafuma mu upaalilo witu uwa kuya nu umi wape. Leza wino asitumpoka uwatulaya umi kwene uu, kufuma lino kutandika kwa nsita kutali kuyeko.

Ayebulai 6:18

Lyene vintu vii viili, ulayo nu mulapo, vitangasenulwa nupya Leza pa kuviomvya atange atumpoke. Caleka swe muno twacingililwa na aliwe tukakomeleziwa cuze nu kulemasya na maka ku upaalilo uno uli nkolelo itu.

1 Yoane 5:10

Wino wensi uwataila Mwana wakwe Leza, wene wakwata umboni uu mu mwenzo wakwe. Lelo wino wensi asyataila Leza, ala wene akulanda ukuti Leza uwa ntumpu pano wene atataila vino Leza walanda vya pa Mwana wakwe.

1 Samueli 2:12

Ana aonsi yakwe Eli yali antu yaukakasi. Yene yatacindike Yawe.