Yoane 20:19 - Amazwi Yakwe Leza 2013

¹⁹ Lyene manguzi pa wanda wakutandika mulungu, lino ilanzi lyatemba, alondezi yakongine pamwi. Milyango ya ng'anda nayo ala yatifiikilwa, pano yoopanga intunguluzi zya Ciyuda. Alino Yesu aiiza aimilila pakasi kao, ayanena ati, “Mutende uye namwe.”

Yoane 20:19 ပူးပေါင်းရင်းမြစ်များ

Masamu 122:8

Apa mulandu wa inane na yacuza yane namavwanga inti, “Yelusalemu, umutende uye munuli!”

Mateo 10:13

Ine ya ng'anda ndi yamuzengela, mutende winu ulaya panoyali, lelo ndi yakana kumuzengela, mutende winu ulamuwelela.

Mateo 18:20

Pano kuno antu yaili nanti yatatu yakongana mwi zina lyane, nani ndaya nao.”

Mako 16:14

Pacisila Yesu aloleka ku alondezi ikumi na wenga ala yatenzi yakulya pa cipango. Ayasinkola, pa kuntataila kwao na pa kukoma kwa myenzo yao, pano yatataile yano amuweni lino wazyukwike.

Yoane 14:27

“Namusila mutende, mutende wane auno namupeela. Ntamupile mutende ndi vino amu nsi yakapela. Mutaleka myenzo inu yaaziwa, nanti kuvwa intete.

Yoane 16:22

Vii avino cili kunomuli. Ndakai muli nu ulanda, lelo ndiza mulole nupya, nga ni myenzo inu ilazulamo ni nsansa zino pasi umuntu nanti umwi angazisisya kufuma kunomuli.

Yoane 16:33

Nati munena vintu vii pakuti muzane mutende munondi. Lino mucili mu nsi mulacula. Lelo posyini! Nemo nati ncimvya maka amu nsi ii.”

Yoane 20:21

Yesu nupya ayanena ati, “Mutende uye namwe. Ndi vino Tata wantumile avino nani namutuma.”

Yoane 20:26

Pacisila ca manda cinani, alondezi yakwe pali pamwi na Tomasi nupya yali mukasi ka ng'anda. Alino Yesu aiiza aimilila pakasi kao, ala ni milyango yatifiikilwa, nga ayanena ati, “Mutende uye namwe.”

Yoane 21:1

Pacisila cakwe cii, Yesu aloleka nupya ku alondezi yakwe pali yemba wa Tibelyasi. Kuloleka kwakwe kwacitike ndi vii.

Yoane 21:14

Lii, lili ila lyakwe citatu lino Yesu walolike ku alondezi yakwe pacisila ca kuzyukuka kufuma ku afwe.

Yoane 7:13

Lelo patali wakuti alande paswe pano yoopanga Ayuda.

Milimo 1:3

Pacisila cakuzyukuka kufuma ku mfwa, walolike kunoyali maila aingi pa manda makumi yani, mu misango ino yasininkizyanga kunoyali vino wene umumi. Walolike kunoyali nga nu kulandana nao pamulandu nu Wene wakwe Leza.

Loma 15:33

Leza ali ntulo ya mutende, aye namwe mwensi. Ameni.

1 Kolinto 15:5

Nupya aloleka kuli Petulo nga nu ku atumwa yonsi ikumi na yaili.

Efeso 2:14

Pano Klistu umwisikulu uwatuletela mutende pa kulenga Ayuda na Akulukuwa yaye mutundu onga. Umwili wakwe auno wene waomvizye pa koomola lung'umba lwa lupato luno lwatupatukinye mu kutulenga kuya anisi.

Efeso 6:23

Mutende nu kutemwa nga nu utailo vipelwe ku ina Klistu kufuma kuli Leza Tata nu Mwene Yesu Klistu.

Filipi 1:2

Leza Tata nu Mwene Yesu Klistu amupeele cikuku nu mutende.

2 Tesalonika 3:16

Mwene wino ali intulo ya mutende umwisikulu amupeela mutende nsita zyonsi mu musango uli onsi. Mwene aye namwe mwensi.

Ayebulai 7:2

Abulaamu nawe amupeela icikumi pali vyonsi vino wasenzile. Mekisedeki izina lino nkolelo likusenula ukuti “Kateeka wino akaleta uwololoke.” Cakwe ciili wene wali a kateeka wa Salemu, cikusenula ukuti, “Kateeka wino akaleta mutende.”

3 Yoane 1:14

Inkupaalila kwiza kulola zuwa, nga alino tulalanzyanya.

Umbwilo 1:4

Ne Yoane nalemba kalata ku mauvi cinimbali amu muputule wa mpanga ya Asiya. Cikuku nu mutende viye namwe kufuma kuli Leza, wino alipo, wino uwalipo, wino aliza. Cikuku nu mutende viye namwe kufuma ku mipasi cinimbali ili ku nkolelo ya cilimba cakwe Leza.