Yelemiya 4:13 - Amazwi Yakwe Leza 2013

¹³ Lolini! Umwanisi akwiza wa makumbi. Amaceleta yakwe ankondo yakwiza wakwe nkungulupya. Imfwalasi zyakwe zilusile yacipungu uku lwilo. Kalanda kunotuli! Twatitononwa!

Yelemiya 4:13 ပူးပေါင်းရင်းမြစ်များ

2 Samueli 1:23

“Saulo na Yonatani, yene aakuzunguka nupya akundwe. Yene yatapalukine umu mfwa numu wikazi wao kwene. Yakweti ulwilo ukuluta yalyang'anda, ni vimaka ukuluta yacisama.

Ezaya 13:5

Yakufuma uku nsi ntali, uku mpela ya nsi, uku konona impanga yonsi

Ezaya 19:1

Amazwi asowilwe pamulandu na Eguputo. Yawe ali api kumbi ilikupita ulwilo, wene akuya ku Eguputo. Utuluwi twaku Eguputo tukuzakaza sile uku ntete apa manso yakwe, nga aina Eguputo nayo kwene caticiyaputula umusana.

Ezaya 3:8

Ala umu cumi, Yelusalemu alaongoloka, Yuda alawa, pano imivwangile yao, ni vicitwa vyao vikacuzya Yawe, yakamutukola apaswe.

Ezaya 5:28

Inceto zyao pasi pakusongola. Yene yatiyazumba na malapwa yao. Inkamba zya mfwalasi zyao zyakoma wi we. Alino imipeto ya maceleta yao ikuzinguluka wakwe nkungulupya.

Ezaya 66:15

Nemo ne Yawe ndizila umu moto, ndiza nkupitila muli nkungulupya, lino ndiza mukufulula yano nasokela.

Yelemiya 10:19

Antu amu Yelusalemu yapunda yati, Silolini vino twacisika! Ivilonda vitu vitalapola. Swemo twelenginye ukuti tungazizimizya ku ucuzi uu!

Yelemiya 4:12

Umuza uo uno ukwiza api lamulo lyakwe Yawe, wene ulaya ukome ukuluta. Yawe umwisikulu aliwe akuma imbila ya uputuzi pa antu yakwe.

Yelemiya 4:31

Nuvwile inkuuta kwati izya mwanaci wino ali pipi nu kulela ukuilizyanya kwati a wiyo akwelepa umwana wiyeli. Kwali kuli kulila kwakwe Yelusalemu, wino akwasela sile wataanza na makasa ala akuti, Owe mwe! Nazanzwa! Yene yakwiza ku kunkoma!

Yelemiya 46:18

Lino nene ndi wa umi, ivyalanda Yawe, wino izina lyakwe a Yawe Wamaka yonsi. Kuliza umwi wiyo akoline na Taboli umwamba uno watalimpisya pa myamba yuze, wiyo akoline nu mwamba wa Kalimeli, uwaya mu nkumba yakwe yemba.

Yelemiya 48:40

Yawe wavwanga wati, “Silolini! Lyang'anda akuvwelukila pansi, wataanza na maapa yakwe pali Moabu.

Yelemiya 49:22

Silola! Wiyo wino akuwela nu kulelemba wakwe lyang'anda'anda. Akwanza amapa yakwe pali Bozila. Mu wanda ulya imyenzo ya vita vyamu Edomu ilaya wa mwenzo wa mwanaci ali pakulela.

Yelemiya 6:23

Yene yalasenda amalapwa na masumo mu minwe. Yene akalale nupya yasi nu luse. Yalaangula icongo kwati ukulunkuma kwakwe yemba mukalamba, lino yakupita pa mfwalasi. Yene yatiyaiteyanya ukukulwisya Yelusalemu.”

Yelemiya 9:19

Uvwini impooma zya antu mu Zioni, zikuti, “Owe mwe, lyene casila twalowa! Owe mwe, vino twazewana! Tulinzile twasya impanga itu. Pamulandu wakuti amang'anda itu yatiyaongololwa.”

Nyimbo zya ndosya 4:19

Yayo atuzinganyanga yali nu lwilo ukuluta yacipungu atiyavuka umu lwelele. Yatuzinganyanga umu myamba nu kututeyamila umu lwanga.

Ezekelo 26:10

Imfwalasi zyakwe zilavula wakwe cimwi cakuti ulukungu luno zilakatusya lulakukupilizya. Amalinga yako yalatenta ku congo ca mfwalasi yakwe, ku congo ca maceleta yakwe ni congo ca vintu vya mipeto vyuze. Lino alingila mu mpongolo zyako cilaya kwati avino yakaingila mu musumba uwati ucimba.

Ezekelo 38:9

Alino lyene ulakatuka nu kwiza wa cipunga. Ulavimbilikizya impanga wi kumbi, wewe kwene, ivita vyako vyonsi ni mitundu iingi pamwi nawe.

Danieli 11:40

“Lino insita yakusyalikizya ya mwene waku Silya ilafika, umwene waku Eguputo alamuzanza, nga umwene waku Silya nawe alaipokolola ku maka yakwe yonsi, ale akuomvya amaceleta, imfwalasi, nga ni vimawato ivivule. Wene alazanza impanga izivule, nu kusalalamo ungati a mulamba wa mukuku.

Danieli 7:4

Cakwe conga calolike wakwe cisama, lelo cakweti amaapa wakwe cipungu. Lino ncili lolekesya, amaapa yakweco yanyunsulwa. Alino cinyama cici yacikatusya apakuti cimilile wa muntu, nga yacipela nu mwenzo wa muntu.

Oseya 8:1

Yawe akuti, “Lizini intandala! Anisi yatiyuwa apa mpanga yane wakwe lyang'anda apapela pa nyama. Antu yane yavuna upangano wane, nu kusangukila amalamulo yane.

Mika 2:4

Mu wanda ulya antu yalamutumfya. Yene yalamusoweka, mu lwimbo luu ulwa ndosya yati, ‘Twatitononwa ukumalilika. Impanga ino Yawe watwankanya, nayo kwene yatiyaipoka! Ivyalo vitu wavyankanya kuli yao atusenzile mu uzya.’

Naumi 1:3

Yawe asisoka zuwa, lelo uwamaka wakwe cimwi nupya asipanya umuntu uwa mulandu. Pano Yawe akupita, pakakatuka nkungulupya ni cipunga icikome. Amakumbi ali lukungu luno ingazo zyakwe zikakatusya.

Habakuku 1:8

“Imfwalasi zyao zyalwilo ukuluta inangu, nupya yakalipisya ukuluta imimbulu ili ni nzala. Akwezilepo a yanyela ku malunga nanti kungatalimpa uli. Yene yakapapukila kwati inkwazi ino ikasi kulema cakuti ingalya.

Zakaliya 6:1

Ne Zakaliya indola icilolwa nacuze. Iila lii lyene indola amaceleta yakufuma pakasi ka myamba iili ya cela ca mukuwa.

Mateo 24:30

Pa nsita ilya, cilangililo ca Mwana wa Muntu cilaloleka mwiyulu. Na antu amu nko zyonsi mu nsi yalalosya lino yalalola Mwana wa Muntu akwiza mu makumbi na maka nu lulumbi lukulu.

Malango 28:49

Yawe alamuletela antu amu luko luze ulwa ku mpela ya nsi ukwiza muzanza, uluko luno icilimi cao mutacimanya. Yene yaliza yamuvwelule ungati a cipungu.

Umbwilo 1:7

Lolini, wene akwiza mu makumbi! Antu yonsi yalamulola, pamwi na yao kwene amutosile mu mbazo. Antu yonsi pano nsi yalalosya pamulandu na aliwe. Vii avino cilaya.