Yakapingula 20:26 - Amazwi Yakwe Leza 2013

²⁶ Lyene aina Izlaeli, antu yonsi kwene, iyaswilila ku Betele, nga kuku pasi pakulosya pa manso yakwe Yawe. Uwanda ulya yatalile nanti kamwi ukufika nalino ilanzi lyawa nga yapeela Yawe amawila yakoca nga na mawila ya utandano.

Yakapingula 20:26 ပူးပေါင်းရင်းမြစ်များ

Utandiko 28:19

Atemela cifulo cici izina ati Betele. (Lelo umusumba ulya mpiti wamwangwa ukuti Luzi.)

2 Samueli 3:35

Uwanda uwa onsi antu yonsi yizanga kuli Davidi iyamupapata kuti alye icakulya. Lelo Davidi walavile nu mulapo ati, “Si Leza andye, ndi cakuti nemo nalya cimwi lino ilanzi litali liwe!”

2 Milandu 20:3

Lilyo kwene Yeosafati auvwa intete nga aelenganya ukulenga amano kuli Yawe nu kupeela ilamulo ku antu yonsi umu mpanga yakwe Yuda kuti yatale yafunge ukulya.

Ezila 8:21

Kuku kwene uku luzi lwa Aava, nemo ne Ezila napiile antu amasunde akuti swemo swensi tutale tute ukulya, pakuti tuicefye kuli Leza, tumupapate apakuti atutungulule umu ulendo witu nu kutucingilila, sweswe pamwi na ana itu, kumwi ni vyuma vitu vyonsi.

Yelemiya 36:9

Cali mu mwaka walenga isano, umwezi wakwe fundimbali, pano Yeoyakimu mwana Yosiya watandikile kuteeka mu mpanga yakwe Yuda. Ali lino antu yatiile ukulya pamulandu wakupapata Yawe. Fwandi antu yonsi yano yafumile mu misumba yamu Yuda na ina Yelusalemu yatiile ukulya.

Yowelo 1:14

Nenini antu kuti yafunge ukulya. Nenini antu kuti yakongane umu mucinzi. Ama aikolo pamwi na yonsi aikala umu mpanga ii kuti yize yakongane mu Ng'anda ikulu yakwe Yawe Leza winu, nga mulile kunoli.

Yoswa 24:1

Lyene Yoswa akonganika antu amu mitundu yonsi ya ina Izlaeli ku Syekemu. Aama aikolo, ni ntunguluzi, na yakapingula nga na yamusika yonsi ya ina Izlaeli, nga nayo yiiza yimilila pa manso yakwe Yawe.

Yoswa 7:6

Lyene Yoswa alepula insalu zyakwe nga afukama pansi afupime ku nkolelo ya Mbokosi ya Upangano yakwe Yawe, alali papa kwene mpaka nalino ilanzi lyawa. Intunguluzi zya ina Izlaeli nazyo izicita icili cimwi, nga iziisansa ulukungu pa mitwe.

Yakapingula 20:18

Aina Izlaeli pali pakuya ku Betele nu kuuzya Leza yati, “Uzye umutundu cii ulinzile kuya uwankolelo ukuzanza aina Benjamini?” Yawe nawe aasuka ati, “Umutundu wakwe Yuda ulinzile kutandikilapo ukuya kweneko.”

Yakapingula 20:23

Aina Izlaeli iyatumbela ku Betele, kuno yaile iyalosya pa manso yakwe Yawe ukufika na lino ilanzi lyawa, nga iyuzya Yawe yati, “Uzye nupya kwene tumaswilila ku kulwisya aina itu aina Benjamini?” Yawe aasuka ati, “Ee, yangini mukayalwisye.”

Yakapingula 20:25

Ni ila kwene lii, lino aina Benjamini yafuma mu Gibeya ku kwiza lungatana nayo, iyakomola aina Izlaeli nayauze ukulingana amazimbi ikumi na cinani, yonsi kwene ala yatiyaipangasya impanga.

Yakapingula 21:2

Alino antu yalya iyaya ku Betele, akuno iyalinda kasanya konsi pa manso yakwe Yawe mpaka na lino ilanzi lyawa, ala yakupunda nu kuilizyanya wakwe cimwi kuli Yawe yati,

Yakapingula 21:4

Katondotondo uwanda uwalondelilepo antu yalya iyakuula kavuwa kuku nga iyapeelelapo amawila yakoca na mawila autandano.

1 Samueli 11:4

Lino intumi zizi zyafika ku Gibeya, kuno Saulo wikalanga, nu kufisya amazwi ku antu, yonsi kwene iyatandika ukulila nu kupoma.

1 Samueli 7:6

Acino yonsi kwene iyakongana ku Mizipa. Alino iyatapa amanzi nu kwitila wa wila uwapeelwa kuli Yawe. Lyene iyata nu kulya pa wanda ulya onsi. Iyavwanga iyati, “Twatitwifya kuli Yawe.” (Fwandi ku Mizipa kwene kuli kuno Samueli wapingwililanga aina Izlaeli.)