Oseya 9:13 - Amazwi Yakwe Leza 2013

¹³ We Yawe, natindola vino ana yao yakuyalunga nu kuyakoma wa nyama. Aluko lwakwe Efulemu yalatungulula ana yao uku nkondo kuko kuno yalakomwa.

Oseya 9:13 ပူးပေါင်းရင်းမြစ်များ

2 Yamwene 15:16

Lino Menaemu wafumanga uku Tiliza, umu nzila wasile wavundanya umusumba wa Tifisa, aonona yonsi pyu. Asya wakoma na ikazi yonsi amwenemo, aonona ni mpanga yonsi iyali mu mbali, apakuzana ukuti antu ali mwenemo yatalondanga ukucimba kunoli. Asya wapanza yamangu yonsi anyomelile.

Yobo 27:14

ana yao nanti yangavula uli, yonsi kwene yalakomwa ku lupanga umu nkondo, Na izikulu yao nayo yalacula uku nzala.

Yelemiya 7:15

Ndamuvwintila ukutali nani, ndi vino nacisile ku ina inu, antu amu mutundu wakwe Efulemu.’”

Yelemiya 9:21

Imfwa yatitwingilila umu mawindo itu yatiingila nu mu mang'anda itu acindame. Yatikoma ana anono umu miseo na ance mu masokoni.

Nyimbo zya ndosya 2:22

Awewe waamile anisi itu apakuti yize yatoofya monsi monsi. Wemo wacisile ungati watuyama uku maliila. Apa wanda uno wasosile kutali nanti wenga wino wapuusile nanti uwasiile, awe. Yene yakomile ana yane, yano nakuzizye nu kuyatemwa.

Ezekelo 27:3

Nena Tuli, umusumba uwaya apa nkumba yakwe yemba, uno ukacita uculuzi na antu amitundu ivule yaku nko zivule aikala umu mbali ya luzi, uti, ‘Vii ivyalanda Yawe Simwandalali. We Tuli ukalanda ukuti wewe uli mufumaluke mukuyemba.’

Oseya 10:14

anisi inu yalamukatusizya inkondo. Amalinga inu yonsi yalononwa ndi vino cali apa wanda wa nkondo lino umwene Syalamani ononyile umusumba wa Beti Alibele. Wene walenzile ukuti yamangu kumwi na ana yao yalyatolwe.

Oseya 13:16

Samaliya alinzile kuvunukwa, pamulandu wakuti yasangukila Leza wao. Aikazi ya mwenemo yalasendwa umu nkondo, ana yanono yalapololwa apa musili, na anaci asenda indilwa yalatumbulwa.”

Oseya 13:8

Ndamuzanza ndi vino iculi cikacita, cico icaticiponzya ana yakweco. Nupya ndamulepola. Ndamulya papo kwene, ndi vino cisama akacita, nu kumusantola mu tupimfya ndi vino cilyanyi camu mpanga cikacita.

Oseya 14:1

Mwe ina Izlaeli welini kuli Yawe, Leza winu, pano mwemo mwapona apamulandu wa maifyo inu.

Oseya 9:16

Aluko lwakwe Efulemu yakoline wa cimuti icisindwe cino imisisi yakweco yuma, nupya citanga ciseeke iviseekwa. Nanti angala antu yayo yangavyala ana, nemo ndakoma ana yao akundwe.

Amosi 7:17

Caleka Yawe akuvwanga ati, “Umuci wako alaya cizelele mu musumba kwene uu. Alino ana yako aonsi na anaci kwene yalakomwa mu nkondo. Impanga yako alayankanya nu kuipeela ku antu yauze. Wemo wemwisikulu ulafwila ku mpanga ya antu atamanya Leza. Alino umucumi aina Izlaeli yalasendwa kuku umu uzya, ukutali ni mpanga ya kumwao.”