Oseya 2:15 - Amazwi Yakwe Leza 2013

¹⁵ Kuku kwene akuno ndamuwezezya vyalo vyakwe vya matingi. Ndasenula Cifoloma ca Ntazi kuti ciye impongolo ya upaalilo. Nga kuku kwene akuno wene alazumila kunondi ndi vino wazumile lilya lino wali umwance, lino wene wafumile mu Eguputo.

Oseya 2:15 ပူးပေါင်းရင်းမြစ်များ

1 Yamwene 16:31

Wene walondesyanga ukwifya ukuluta vino Yeloboamu wifizye. Acino wapitilizye ukwifya pakutwala Yezebele umwana umwanaci wakwe Etibaali umwene wa ina Sidoni, nu kutandika kupepa Baali.

Masamu 106:12

Alino lyene yazumila amazwi yakwe, yamaimba na malumbo yakwe.

Masamu 129:1

We Izlaeli, tunene vino anisi yako yakakuzunya ukufuma sile ku wance wako. Vwanga uti,

Ezaya 65:10

Yene yalampepa, yalacema imfwele zyao ni ng'ombe zyao umu nyika yaku Syaloni, yayela lwaku uwondaka alino nu mu cifoloma ca Akoli, lwaku ufumondaka.

Ezaya 65:21

Yalaakuula amang'anda ya kwikala mwenemo, yalaalima ni vyalo vya matingi nu kulya iviseekwa vya mwenemo.

Yelemiya 2:1

Yawe anena kuti nje nkume imbila ku antu amu Yelusalemu inti,

Yelemiya 2:2

“Nkaiusya ukuti lino mwali ance mwali ni cuvwilo. Mwemo mwantemilwe wakwe cimwi muli unawinga winu. Yandondile umu lwanga, itupita suka tufika mu mpanga itatala yalimwa.

Yelemiya 29:11

Pano nimanya vino mpanzile ukucita pamulandu namwe, ivyalanda Yawe. Napanga ukumuletela ulongo asi syamo foo. Ukumuletela utailo ni syuko likalamba.

Yelemiya 3:4

Lyene uzye asi wewe ukangama ukuti nene mukwasi wako ukutandikila sile ku wance wako?

Yelemiya 32:15

Pano Yawe Wamaka yonsi, Leza wa ina Izlaeli wavwanga wati, ‘Umu mpanga ii, antu yalakala nupya amang'anda, ivyalo ni miyanda ya matingi.’ ”

Nyimbo zya ndosya 3:21

Lelo akula niusya icintu cii conga cene icindetela upaalilo:

Ezekelo 16:22

Apa kasita konsi kaa kano wikalila nu kucita ucizelele, icumi usitala uwikale pansi nu kwiusya vino waviilwe, na vino walaangananga sile umu wazi wa mbuza, na vino wapitanga tupu umu wance wako.”

Ezekelo 16:60

Lelo kwene ndiusya upangano uno napangine nawe, lino wali umwance, nupya ndapangana nawe upangano wakuyelelela pee.

Ezekelo 16:8

“Nga lino napisile umupipi nawe, nakulolekesya, nazana nu kuti insita yako iya citemwiko, yatifikila. Alino niza navungulula isempe lya cikuwalo cane, nakuvimbilikizya apakufisa impamba zyako, pano wali tupu. Nga lino nalapa nu mulapo wakupingana nawe upangano pano lyene waya wewe wane.” Vii, ivyalanda ne Yawe Simwandalali.

Ezekelo 28:25

Yawe Simwandalali wavwanga wati, ‘Lino ndafumya aina Izlaeli mukasi ka mitundu muno yayasalanganyizizya, nu kuyakolonganika, alino ndalanga ucindami wane pa manso ya mitundu muli cii cakuti, yalikala mu mpanga ino napiile muomvi wane Yakobo.

Ezekelo 28:26

Yalikalamo ukwaula cakoopa, yalakuula amang'anda nu kulema amatingi, yalaikala ku matwi cele. Nupya lino ndafulula amu mbali mbali zyao yonsi, yano yayasuula, alino yalamanya ukuti nene indi Yawe Leza wao.’ ”

Oseya 11:1

Yawe akuti, “Lino Izlaeli wali umwana munono, namutemilwe nga imwama umwanane ukufuma lino wafumile mu Eguputo.

Oseya 12:13

Apa kufumya aina Izlaeli mu Eguputo Yawe waomvizye kasema. Nga wayasunganga kupitila muli kasema kwene wiyo.

Oseya 12:9

Lelo nemo nene indi Yawe Leza winu, wiyo uwamufumizye mu Eguputo. Ndalenga kuti mwikale mu mataalu, ndi vino cali mu manda ya kuzevya vimulo vinu.

Oseya 13:4

Yawe wavwanga wati, “Nene indi Yawe Leza winu wiyo uwamutungulwile ukufuma mu Eguputo. Mutaya na Leza muze suka sile nene. Nene ndi Katuula winu, nenga mpo.

Oseya 2:12

Ndonona imiti yakwe ya miolivi ni misamvu kwene iyo ino wene wavwanzile ukuti, ali malipilo yano akambwe yakwe yamulipa. Ndaisenula iye imisitu, nga inyama zya mpanga zilailya kuku kwene.

Amosi 9:14

“Ndawezya antu yane aina Izlaeli ku mpanga yao. Yalakuululula imisumba ino yononeka nu kwikala mwenemo. Yalalima vyalo vyamatingi nu kumwa waini wakwevyo. Yalalima imiyanda nu kulya ivyakulya vyakweyo.

Zakaliya 9:12

Swililinimo mwe azya mwemuno mukalolela ukukululwa, swililini ku mwinu kwa kwikalilila umutende. Ilelo kwene namunena ukuti ndamulambula amaila yaili, pali vyonsi sile vino mwaculile.

Mpendwa 21:17

Ali lino aina Izlaeli yimvile ulwimbo ulwakuti, “Tufukoka mwe, fukokini! Twamwimbilila pa kufukoka,

Yoane 10:9

Nene mulyango! Wino wensi uwingila pali nene, alatuulwa. Wene alingila, alafuma nu kuzana vyakulya.

Milimo 14:27

Lino yafika mu Antioki, yakonganika iuvi lyonsi, yayalandila vyonsi vino Leza wayacitile, na vino wapile Akulukuwa isyuko kuti yataile.

Yoswa 7:26

Alino iyatulikapo nu mutumba wa mawe ukulu sana. Umutumba uu na ndakai apano waya. Ali cino ukufika na pilelo pantu papa yakapaama yati Cifoloma ca Akoli. Awe lyene nu ukali wakwe Yawe pali pakusila.

Yakapingula 8:34

Yene yatatwalilile kutumikila Yawe Leza wao uwayatuulanga ku anisi yao yonsi ayazingulwike.