Neemiya 2:20 - Amazwi Yakwe Leza 2013

²⁰ Lyene nemo njaasuka inti, “Leza wa mwiyulu alasuka atupeele icituku. Ala swemo, swe aomvi yakwe twasya tutandike uku kuula cipya cipya. Lelo mwemo papo pano muli, mutakweti icipande nanti cimwi muno umu Yelusalemu. Nupya mutakweti insambu nanti imwi. Nanti icimanyililo icakuti yace yamwiusizyako mutakweti.”

Neemiya 2:20 ပူးပေါင်းရင်းမြစ်များ

2 Milandu 26:5

Wene waipile kuli Leza pa manda yonsi yano Zakaliya wamusambilizyanga pa kukwatila Leza icoopo. Na lyonsi lino waipile kuli Yawe, Leza wamupeelanga ulongo.

Ezila 4:3

Lelo Zelubabeli, Yesyua nga na akalamba asyala ya ndupwa zya ina Izlaeli yaasuka yati, “Umulimo uu uwa kukuulila Yawe Ng'anda ikulu, utakupazi awe. Sweswe swenga tuli nu kuikuulila Ng'anda ikulu yakwe Leza ukulingana namuno Kilusi mwene waku Pesya watupelile ilamulo.”

Neemiya 1:4

Nalanga nuvwa vivyo, inikala pansi indila, inkungumala. Apa manda yamwi intandika ukulosya ukwaula ukulya ala nkupepa kuli Yawe, Leza wa mwiyulu.

Neemiya 2:4

Umwene ali pakunguzya ati, “Icani fwandi cino wemo ukulonda?” Lyene intala impepa kuli Leza wa kwiyulu,

Esita 4:11

“Aomvi ya mwene yonsi yamanya ukuti umonsi wensi nanti umwanaci ali wensi, uwala wingila umu musolo wakwisano umukasi, ukwaula ukuti yamwame kweneko, wiyo wene ali nu kufwa. Suka sile manye ndi cakuti umusambazi aliwe wamusonta ni nsonzo yakwe zaabu iya wene lyene angapusuka. Alino nani pano yangamile ukwiza uku musambazi, ala patipapita sile amanda amakumi yatatu.”

Masamu 102:17

Lyene alauvwa ni ipepo lya antu yano watazile atazyela, alata nu kusuula ukupapata kwao.

Masamu 122:6

Pepini kuti mu Yelusalemu muye umutende, mule muti, “Lekini antu yayo akutemwa we Yelusalemu yaye nu longo.

Masamu 20:5

Lyene tuce tupunde ni nsansa apakucimvya kwako nu kutumpula imendela umwi zina lyakwe Leza witu. Sangala Yawe ale akupeele vyonsi vino walenga!

Masamu 35:27

Yonsi yaya yano yali ni nsansa apamulandu wa ulungami wane, kayumile utupundu, yavwange nu kuti, “Yawe umukulu, akazangila apakusyuka kwa muzya wakwe.”

Masamu 51:18

We Leza, uku luse lwako ungakomelezya Zioni, apakuti ilinga lyaku Yelusalemu, likulwe cipya cipya.

Kufuma 28:29

Lino Aaloni akwingila mu Ncende Yamuzilo aazwala cakuzwala ca pacisao cino calembwapo mazina yonsi ya ana yakwe Izlaeli, pakuti ne Yawe naiusya antu yane amanda pe.

Kasambilizya 7:18

Fwandi we muntu ulinzile ukuteeka umwenzo pa milandu ii iili. Wemo ndi cakuti ukaoopa Leza, ale lyene imilandu ii yoili ukailondela ukwaula intazi.

Ezaya 56:5

lyene ndamupeela icintu cimwi cizipisye ukuluta na pikwata lya ana aonsi na anaci. Akuli kuti nemo ndaleka amazina inu yakasyale mu ng'anda yane, yakasyale nu ku antu yane. Ali kuti yace yaiusya pee ukwaula kufutikwa.”

Aina Levi 2:2

Alino autwale kuli yasimapepo ana yakwe Aaloni aonsi. Atapule usu uwo utonyoleke ikufi lyonga, utikinkanye na mafuta nu ubani onsi. Lyene simapepo aoce vyonsi vivyo pa kavuwa, pakulanga ukuti iciputulwa icapeelwa kuli Yawe. Mununko usuma uwa wila uu ukazanzya Yawe.

Aina Levi 24:7

Wike ubani usuma cuze muli cila mulongo, mucifulo ca mikate pakulanga ukuti iciputulwa capeelwa kuli Yawe, nga kuti uye uwila wakocela Yawe.

Zakaliya 6:14

Ingala iyo ya wene ilaya iciusizyo mu ng'anda yane ne Yawe, cakwiusizyako Helidai, Tobiya, Yedaya na Yosiya. Umwana umonsi wakwe Zefaniya.’

Mpendwa 10:10

Alino nu mu nsita zinu zyaluzango, ivili mu manda inu akuzevya myezi ipya nga nu kuzevya kuze ukwasyala ukwa upefi, muce mwalizya intandala pa kupeela amawila inu akoca na autandano. Lyene ndiusya ukumwazwilizya. Nene indi Yawe Leza winu.”

Milimo 10:31

avwanga ati, ‘Konelio! Leza watauvwa ipepo lyako nu kumanya imilimo yako iya luse.

Milimo 10:4

Nawe alolekesya mungeli, auvwa intete amunena ati, “Musambazi kuli cii?” Mungeli aasuka ati, “Leza watazangila mu mapepo yako nga nu wila uno ukapeela ku apina.

Milimo 8:21

Utakweti imbali nanti wankanyo mu mulimo witu, pano mwenzo wako usi wololoke pa manso yakwe Leza.