Mpendwa 34:5 - Amazwi Yakwe Leza 2013

⁵ Ukufuma ku Azimoni, umupaka ulafutukila ku cifoloma ca kaluzi akalungama ku Eguputo nu kwizafika kuli Yemba wa Adiliya.

Mpendwa 34:5 ပူးပေါင်းရင်းမြစ်များ

Utandiko 15:18

Pa wanda ulya Yawe acita upangano na Abulamu, avwanga ati, “Nakulaya ukuti namapeela impanga ii yonsi ku amu mupanda wako, ukufuma ku Luzi lwa Eguputo kufika nu ku luzi lukulu lwa Yufulate,

1 Yamwene 8:65

Kuku kwene, uku Ng'anda ikulu yakwe Yawe, ali kuno Solomoni na antu yonsi aina Izlaeli aizile ukufuma ku mupunda waku Lebo Hamati ukuyafika nu ku luzi lwa Eguputo, yazevizye Cimulo ca Nsakwe pa manso yakwe Yawe apa manda cinimbali.

Ezaya 27:12

Mu wanda ulya Yawe alakolonganika antu yakwe ukutandikila sile ku luzi Yufulate, ukuyapelela kuli nande waku Eguputo. Wene alayapaatulula wenga wenga ndi vino yakaelulula ingano ukufuma mu vinkapala.

Ezekelo 47:19

Ku kayeya umupaka ulafuma ku Tamala nu kulungama ku kayeya ku manzi yaku Meliba, ku Kadesyi, ukufika ku Luzi lwa Eguputo na kuli Yemba wa Adiliya. Uo ulaya ali mupaka waku kayeya.

Danieli 11:45

Wene alasimpa na mataalu yakwe aku wene apakasi kakwe yemba nu mwamba apa kuulwa Ng'anda ikulu yakwe Leza. Lelo wene alafwa, nga kutalaya umwi kuku uwakumwazwilizya.”

Yoswa 15:4

Lyene apali pa kupita ku Azimoni iutuntukila ku Luzi lwa Eguputo, nga iusinta na muli Yemba. Ukwene uli mupaka uwaku kaeya wakwe Yuda.

Yoswa 15:47

Na Asyidodi, kumwi ni misumba ni mizi yakweyo. Na Gaza, kumwi ni misumba ni mizi yakweyo ukufika nu ku Luzi lwa Eguputo nga ni mpanga yamu nkumba yakwe Yemba wa Adiliya.