Milimo 6:3 - Amazwi Yakwe Leza 2013

³ Caleka inane, sololini antu cinimbali amunomuli, azuziwamo na Mupasi Wamuzilo na mano, yano tumapela uwangalizi pa mulimo uu.

Milimo 6:3 ပူးပေါင်းရင်းမြစ်များ

Kufuma 18:21

Lelo kulunda pali vii, ulinzile kusola aonsi yamwi ampomvu nu kuyasonta kuti yaye wa ntunguluzi zya antu. Mu musango uu, intunguluzi zya antu mazimbi, na yamwi antu imyanda, na yamwi antu amakumi yasano, na yamwi antu ikumi. Yalinzile ukuya antu akaopa Leza. Yalinzile ukuya atailwe nupya atangazumilizya mafukakanwa.

Ezaya 28:26

Umulimi akamanya ningo ivyakucita, pano a Leza awino wamusambilizya ivyakucita.

Ezaya 28:6

Antu yano yakaputula imilandu ya yauze, Leza umweneco amaiza ayalangilile umwalola ulungami. Nupya aliwe kwene amaiza akomelezye yayo akazinga anisi yano yakaizila ukuzanza impongolo zya musumba.

Mateo 23:8

Lelo mwemo yatalinzile kuti yamwama yati, ‘Kasambilizya,’ pano mwakwata sile kasambilizya wenga, nupya mwensi mwemwe ina.

Yoane 21:23

Caleka mpwelo isalangana konsi mu alondezi yakwe Yesu ukuti wii wene atalafwa. Lelo Yesu atavwanzile vino wii wene atalafwa. Wene wavwanzile ati, “Ndi nkasi kuti alali kufika na lino ndiza, uzye cikupazi?”

Milimo 1:15

Pacisila ca manda yanono kwali ukongano wakwe yao ataile. Yali manye umwanda na makumi yaili. Alino Petulo aimilila pakasi kao avwanga ati,

Milimo 1:21

“Caleka umuntu muze alinzile ailundanye kunotuli kuti aye a kambone wa kuzyukuka kwa Mwene Yesu. Muntu wiyo alinzile kuya wenga kufuma pa antu ali mwi umba litu nsita zyonsi lino twapitananga nu Mwene Yesu,

Milimo 10:22

Yaasuka yati, “Konelio musika wa vita watatutuma. Wene umuntu musuma wino akaoopa Leza, nga na Ayuda yamucindika cuze. Mungeli wa Mwene wamunenyile kuti akwame ku ng'anda yakwe, pakuti akuvwe cino waya vwanga.”

Milimo 15:23

Alino yayatumilizya kalata uwatangi, “Swe atumwa na aikolo, swe ina inu, twatuma ulau kuno muli mwe ina itu amu Akulukuwa, akaikala mu Antioki, Silya na Kilikya.

Milimo 16:2

Onsi aina ali mu Lisitala nu mu Ikoniamu yatasyanga milimo yakwe Timoti.

Milimo 2:4

Alino yonsi yazuziwa na Mupasi Wamuzilo nga cila muntu atandika kuvwanga mu lulimi lwa cilendo kulingana na vino Mupasi wamupeela maka yakuvwanga.

Milimo 22:12

“Mwali umuntu izina lyakwe a Ananiya, uwali umupefi nupya wayelanga Masunde itu yakwe Mose, wino Ayuda ali mu musumba yamutasyanga.

Milimo 28:14

Tuzanako ataile yamwi nga yatulenga kuti twikale nao umulungu onga. Alino tukatuka tufika ku Loma.

Milimo 6:2

Caleka atumwa ikumi na yaili yaama iumba lya alondezi onsi, yayanena yati, “Citanga cizipe kutazyela kukosola mazwi yakwe Leza kuti twaankanya vyakulya.

Milimo 6:5

Lyene mazwi ya atumwa yazipila iumba lyonsi nga yasola Sitivini, umuntu uwali nu utailo ukulu cuze nupya wazuziwemo na Mupasi Wamuzilo. Filipo nga na Polokolasi, Nikana, Timoni, Pamenasi na Nikolasi, umusenusi wafumile ku Antioki

Milimo 6:6

Iumba liyaleta ku atumwa, nao yapepa, nu kwika makasa yao panoyali.

Milimo 9:30

Lino aina muli Klistu yamanya cii, yatwala Saulo ku Kesaliya, yamutuma ku musumba wa Taliso.

1 Kolinto 12:8

Mupasi Wamuzilo akapeela umuntu umwi maka akulanda vya mano, nga Mupasi Wamuzilo ali umwi kwene akapeela umuntu muze maka akulanda mazwi akusambilizya.

1 Kolinto 16:3

Caleka lino ndafika, ndamupeela makalata akuilondolola ku antu yano mwasolola, nga nao ndayatuma kuti yatwale makalata pamwi nu wila winu onsi ku Yelusalemu.

Efeso 5:18

Mutakoleka waini pano wene angamonona. Lelo muzuziwemo na Mupasi Wamuzilo.

Malango 1:13

Sololini antu yamwi amano, akwata ukwiluka, amanyikisya vintu nupya acindikwa, ukufuma muli cila mutundu, nga nani ndayapeela umulimo wa kwangalila mwemwe.’

1 Timoti 5:10

nupya uwamanyikwa mu kuomba milimo isuma, kukuzya ana yakwe ningo, kusunga aenyi mu ng'anda yakwe, kutumikila aina Klistu yauze mu ufuke, kwazwa antu ali mu ntazi, nu kuipelesya kucita visuma.

Yakobo 1:17

Wila usuma onsi ni cakupeelwa cifumaluke consi cikafuma kwiyulu, kuli Tata, kaumba wino uwaumvile ivya mwiyulu vyonsi vino vikapeela luswepo. Wene ali umwi lyonsi, nupya luswepo lwakwe lusyazima nanti panono.

3 Yoane 1:12

Cila muntu akavwangila Demetiliyo visuma. Ni landwe kwene ilya cumi lino akakosola likacita cili conga. Naswe kwene tukulundapo umboni pali aliwe, nupya mumanyile ukuti vino tukulanda ivya cumi.