Milimo 10:38 - Amazwi Yakwe Leza 2013

³⁸ Mwamanya vya pali Yesu uwaku Nazaleti, na vino Leza wapongolwile Mupasi Wamuzilo panoli nu kumupeela maka. Wapisile konsi konsi, ala akucita visuma nu kupozya yonsi yano acuziwanga na Ciwa, pano Leza wali nawe.

Milimo 10:38 ပူးပေါင်းရင်းမြစ်များ

2 Milandu 17:9

Yasenzile nu lupapulo lwa masunde yakwe Yawe nu kupitana monsi umu misumba yamu Yuda ale yakusunda antu.

Masamu 2:2

Yamwene yao yasakatuka, ni ntunguluzi zyao yapangila Yawe, pamwi nu musololwe wakwe.

Masamu 2:6

“Natindasika mpiti umwene wane, ali pa Zioni, umwamba wane uwamuzilo.”

Masamu 45:7

Wemo watemwa ivintu ivilungame, wapata ivintu iviipe. Ali mulandu kwene uno Leza, uwaya Leza wako wakusolwile nu kukupelesya insansa izivule ukuluta apa yauzo.

Ezaya 11:2

Alino Mupasi wakwe Leza aliza aikalilile penepo, Mupasi wa malango nu wa kwiluka. Mupasi wa kupanda amano nu wa maka, Mupasi wa kumanya ivintu nu koopa Yawe.

Ezaya 42:1

Yawe wavwanga wati, “Wii ali muomvi wane wino nemo nemweneco natungilila, ali wino naisolwela nupya natemwisya. Namamwikila Umupasi wane, nga nawe alaletela antu amu mitundu yonsi ulungami.

Mateo 12:15

Lino Yesu uvwa vino yati yumana kapi, afuma ku cifulo cici, na antu aingi yamulondela. Alino apozya alwale yao onsi,

Mateo 12:28

Lelo ndi cakuti nkafumya mipasi yankota mu maka ya Mupasi wakwe Leza, ale lyene Uwene wakwe Leza wati wiza panomuli.

Mateo 9:19

Alino Yesu pamwi na alondezi yakwe yakatuka, yapita nawe.

Mateo 9:35

Lyene Yesu apitana mu misumba nu mu mizi yonsi kwene, ino yali pipi na yemba uwaku Galile. Wene asambilizya mu mang'anda ya mapepo nu kukosola Ilandwe Lisuma lya Wene wakwe Leza, nu kupozya indwala zya misango yonsi, ni ndema.

Mako 6:6

Wene azunguka cuze, pano antu yatakweti utailo munoli. Alino aya mu mizi yazingulwike ala akusambilizya antu.

Luka 3:22

na Mupasi Wamuzilo aikila panoli mu musango wa nkunda. Ni zwi lifuma mwiyulu liti, “Wewe Mwanane mukundwe, munuli nkuzanga cuze.”

Luka 4:18

“Mupasi wa Mwene uli panondi, pano watampela maka kuti nkosole Ilandwe Lisuma ku apina. Wantuma ku kusapula anyepwe nu kuleka impafu kuti zyalola, nga nu kwiza kulula yano atitikiziwa,

Luka 9:42

Lino mulumendo acili akwiza, mupasi wankota umuponya pansi alino umutensya na maka. Alino Yesu akalipila mupasi wankota, apozya mulumendo, nga nupya amupeela kuli isi.

Luka 9:56

Lyene apita nao ku muzi uze.

Yoane 10:32

Yesu ayanena ati, “Nati ncita vicitwa vingi visuma vino Tata wampile kuti ncite. Uzye apa vicitwa vii pano mukulonda kuntama na mawe?”

Yoane 16:32

Lolini kasita kakwiza, endi, kati kiza lino mulasalangana, cila muntu alapita ukwakwe nga munsye nenga. Lelo mu cumi nsi nenga, pano Tata ali nani.

Yoane 3:2

Wene waile kuli Yesu usiku, amunena ati, “Kasambilizya, twamanya vino wewe Kasambilizya wino wafuma kuli Leza. Pano pasi umuntu angacita vilangililo vino wemo ukacita, suka Leza ali nawe.”

Yoane 3:34

Pano wino Leza watuma wene akavwanga mazwi yakwe Leza, na Leza akamupeela Mupasi Wamuzilo.

Yoane 6:27

Mutaombela cakulya cino cikalowa, lelo mwaombela cakulya cino cikaikalilila manda pe nupya cikapela umi wape. Cii cili cakulya cino Mwana wa Muntu alamupeela, pano Leza Tata wamupeela insambu yakucita vivyo.”

Milimo 10:37

Mwamanya cintu cimwi cikulu, icacitike mu mpanga yonsi mu Yudeya, kutandika mu Galile pacisila lino Yoane wakosozile ilandwe lyakwe ilya luwatizyo.

Milimo 2:22

“Mwe ina Izlaeli, uvwini mazwi yaa. Yesu uwaku Nazaleti umuntu wino Leza watumile kuli mwemwe, walangililwe mu vinjelengwe, mu vizungusyo, nga nu mu vilangililo vino Leza wacisile kupitila munoli. Mumanyile vii vyonsi, ukuti ivya cumi pano vyacitike.

Ayebulai 1:9

Wemo watemwa ulungami wapata lufyengo. Caleka Leza, Leza wako, watakupaka na mafuta ya kuzanga kuluta auzo.”

1 Petulo 5:8

Mwatekela nu kupempula! Ciwa, mwanisi winu akululumba nu kung'anza wakwe cisama wino akulunga umwi uwakuti alye.

1 Yoane 2:20

Lelo Klistu wene wamupolelile pakumupongolwela Mupasi Wamuzilo. Acino mwensi kwene mwamanya icumi.

1 Yoane 3:8

Wino wensi akatwalilila kwifya wene uwakwe Ciwa. Pano Ciwa wifizye kufuma ku utandiko kwene. Mwana wakwe Leza walolike pamulandu kwene uu, kuti aonone vino Ciwa wacita.