Mateo 6:9 - Amazwi Yakwe Leza 2013

⁹ Acino mwemo mwapepa mukuti, ‘Tata witu uwa mwiyulu, Izina lyako licindikwe,

Mateo 6:9 ပူးပေါင်းရင်းမြစ်များ

2 Samueli 7:26

Alino lyene izina lyako lilalumbuka nga na antu yalakulumbaya amanda pee yati, ‘Yawe Wamaka yonsi ali Leza wa ina Izlaeli.’ Alino yalasininkizya ukuti ana yane ali mpyanyi zya wene wane.

1 Yamwene 8:43

uli nu kuvwa kuko ukwako kwiyulu. Upeele nu mwinamasi wensi cino akulenga, pakuti imitundu yonsi ya pano nsi ice ikamanye izina lyako nu kukoopa, ndi vino antu yako aina Izlaeli yakacita. Lyene nu kumanya ali kwene pano yalasininkizya ukuti Ng'anda ii ikulu, ino nakuula ali ncende ino tulinzile twakupepela mwenemo.

1 Milandu 17:24

Lyene alino izina lyako lilalumbuka umuyayaya. Alino na antu yalalanda yati, ‘Yawe Wamaka yonsi, ali Leza wa ina Izlaeli, aliwe kwene ali Leza wa ina Izlaeli.’ Nga ulasunga ang'anda yane, ne muomvi wako Davidi, umuyayaya.

2 Milandu 20:6

Alino avwanga ati, “We Yawe Leza wa vikolwe vitu, uzye wewe usi uli Leza wa mwiyulu? Uzye usi wewe wateekanga nu kupingula yamwene ya mitundu yonsi iya antu? Mu minwe yako mwaya amaka nu lulumbi icakuti kusi nanti wenga angacimvyanya nawe.

Neemiya 9:5

Alino aina Levi yaa, Yesyua, Kadimiyeli, Bani, Hasyabineya, Syelebiya, Hodiya, Syebaniya na Petaya iyavwanga iyati, “Katukini nu kulumbanya Yawe Leza winu. Mulumbanyini amanda pe! Kalicindikwe izina lyakwe lyamuzilo, nanti angala kusi umuntu angaulumbanya icifumaluke.”

Masamu 111:9

Umwene wapususya antu yakwe, wapangana nayo upangano wakuyelelela. Icacumi, uwamuzilo nupya uwa maka!

Masamu 115:3

Ala swemo Leza witu waya umwiyulu, akacita na vyonsi vino atemilwe.

Masamu 72:18

Mwalumbanya Yawe, Leza wakwe Izlaeli, kacita wa vintu vyonsi vii ivyakuzunguka wenga sile!

Ezaya 37:20

Ali cino fwandi we Leza witu tupususye kweneko ku ina Asilya, uleke antu yonsi apano nsi yasininkizye ukuti wewe wenga mpo, awewe Leza wacumi.”

Ezaya 57:15

Pano nemo ne Leza Wapapelapela nemuno nikala umu ncende yamuzilo, nkaamwa ukuti Wamuzilo wilya, nkuti, “Nkaikala umu ncende yapapelapela yamuzilo. Lelo nkaikala na antu aicefya nupya afuke myenzo, kuti aicefya yayo njapupuzule imyenzo.

Ezaya 6:3

Ala yakulaizya yakuti, “Wamuzilo, wamuzilo, wamuzilo Yawe Wamaka yonsi, ucindami wakwe walimba insi yonsi.”

Ezaya 63:16

Pano wewe kwene wewe uli Tata. Abulaamu atatumanya, Yakobo atatumanya. Lelo wemo we Yawe, wewe uli Tata, wewe uli Katuula witu pee. Ilili zina lyako ilyampiti na mpiti.

Ezaya 64:8

Lelo kwene we Yawe, ala wewe uli Tata. Swemo twaya sile wa mbuulo, nawe wakwe nakamata. Umucumi awewe watuumba.

Ezaya 66:1

Yawe wavwanga wati, “Iyulu ali cilimba cane, insi nayo ali cilyatilo ca ngazo zyane. Uzye ing'anda cii fwandi ino mungankuulila? Incende cii fwandi ino ningapuzilamo?

Ezekelo 36:23

Ndi cakuti nalanga antu ya mitundu yuze vino nemo naya uwamuzilo, nanti angala mwemo mwandetile insonyi kunoyali, lelo yene yalasininkizya ukuti nene indi Yawe. Ivyalanda ne Yawe Simwandalali. Nupya mwemwe kwene ndaleka mukamanyisye antu ya mitundu yuze ukuti nene ndi wamuzilo.

Ezekelo 38:23

Ali vino nemo ndalanga antu ya mitundu yuze ukuti nene mukulu, nupya nene mucindami. Ali lino antu yalasininkizya ukuti fwandi nene, indi Yawe.”

Aina Levi 10:3

Lyene Mose anena Aaloni ati, “Walola! Vii, avili vino Yawe wavwanzile lino watile, ‘Onsi yano yakuntumikila yalinzile kucindika muzilo wane. Ndasokolola ululumbi ku antu yane.’ ” Lelo Aaloni aimilila myaa!

Habakuku 2:14

Lelo insi nu kukwata umanyililo wa ucindami wakwe Yawe, ndi vino yayemba yakulu yazula amanzi.

Zakaliya 14:9

Alino lyene Yawe Leza awino alaateeka impanga yonsi, ala wenga mpo awino alaya Umwene, ni zina lyakwe lyonga mpo alino antu yalalumbula.

Malaki 1:11

Antu aikala amasi yonsi yalancindika. Konsi kwene antu yalaoca ubani nu kupeela amawila aswefiwe mwi zina lyane. Pasi pano antu amu nko zizyo yalancindika.

Mateo 10:29

Uzye utunyi twiili tusikalwa pi kowili lyonga? Lelo pasi akunyi konga kangapona pansi ukwaula kuti Leza ali So winu amanye.

Mateo 23:9

Mutaama umuntu nanti umwi pano pa nsi muti ‘Tata,’ pano mwakwata So wenga sile, wino uwa mwiyulu.

Mateo 26:29

Namunena vino, ntalamwa nupya vifenwa vya vizao vya matingi kufika ku wanda uno ndamwa ivipya pali pamwi namwe mu Wene wakwe Tata.”

Mateo 26:42

Nupya aswilila iila lyakwe ciili, apepa ati, “Tata, ndi citangaya kuti lwako luu lwa ucuzi lusisiwe kunondi suka nkamwemo, leka kulonda kwako kucitike.”

Mateo 5:16

Mu musango uli onga kwene namwe mwaengesa wa luswepo pa antu onsi, kuti yalola imilimo inu isuma, nga yalumbanye So uwa mwiyulu.

Mateo 5:48

Caleka mwemo muye afumaluke ndi vino So uwa mwiyulu waya umufumaluke.

Mateo 6:14

“Pano ndi mwemo mwelela antu lino yaifya kunomuli, So uwa mwiyulu nawe kwene alamwelela.

Mateo 6:6

Lelo mwemo, lino mukupepa, ingilini mu muputule winu uwa mukasi, nga lino mwayala cisasa, mupepe kuli So asyaloleka. Na So akalola vino mukacita mu nkama alamupeela cilambu.

Mateo 7:11

Mwe yaipe mwamanya kupeela vintu visuma ku yana yinu. Uzye So uwa mwiyulu atalalusya kupeela vintu visuma kuli yao akamulenga?

Luka 15:18

Namakatuka mpite kuli tata inkamunene inti, Tata, niifya kuli Leza uwa mwiyulu na kunuli.

Luka 15:21

Umwana nawe amunena ati, ‘Tata, Niifya kuli Leza uwa mwiyulu na kunuli. Ntaine ukwamwa umwana wako nupya.’

Luka 2:14

“Ululumbi kuli Leza mwiyulu papelapela, nu mutende pali yano Leza akuzangilamo.”

Yoane 20:17

Yesu amunena ati, “Utandemamo pano ntali nkwele inje kuli Tata. Lelo yanga ku inane ukayanene vino nkukwela inje kuli Tata, ali So, Leza wane nupya Leza winu.”

Loma 1:7

Caleka nalemba kalata kuli mwemwe mwensi mwe yakundwe yakwe Leza amu Loma, mwe muno mwaamwa kuti namwe kwene muye antu yakwe amuzilo. Leza Tata nu Mwene witu Yesu Klistu amupeele cikuku nu mutende.

Loma 8:15

Pano Mupasi wino Leza wamupeela asi mupasi wakumucita azya nu kumucita intete. Lelo Mupasi akamucita ukuya ana yakwe Leza nga nu kupitila mu maka yakwe, tukalilila Leza tuti, “Tata, Tata!”

Galatiya 1:1

Kalata kufuma kuli ne Paulo, wino kwamwa kwane kwa kuya mutumwa kutafuma ku muntu nanti kupitila mu muntu, Lelo kwafuma kuli Yesu Klistu, na Leza Tata, wino uwazyukwile Klistu kufuma ku afwe.

Galatiya 4:6

Leza watumile Mupasi wa Mwana wakwe mu myenzo itu, pakusininkizya ukuti sweswe ana yakwe, Mupasi wino akati, “Abba, Tata wane.”

1 Timoti 6:16

Aliwe wenga sile asyafwa. Wene akaikala mu luswepo luno kusi nanti umwi angapalamako. Kusi nanti umwi uwatala walola Leza. Kusi nanti umwi angamulola. Kunoli kupelwe mucinzi nu utesi wape! Ameni.

1 Petulo 1:17

Lino mukupepa mukaama Leza muti, “Tata.” Wene ataya na kasoozi. Lelo akapingula antu yonsi kulingana na vino cila muntu wacita. Acino lyene mwacindika Leza lino mucikweti umi muno nsi.

Umbwilo 4:11

“We Mwene Leza witu! Wemo wazipilwa kupelwa lulumbi, mucinzi na maka, pano wewe waumvile vintu vyonsi. Ku kulonda kwako walenzile vyonsi kuti viyeko, nupya wewe waviumvile.”

Umbwilo 5:12

Nupya imvile lwimbo ni zwi likulu yati, “Mwana wa mfwele wino uwakomilwe wene wazipilwa ukupelwa maka, icuma, mano, ulamba, mucinzi, lulumbi nu kulumbanyiziwa!”