Malango 14:29 - Amazwi Yakwe Leza 2013

²⁹ Ivyakulya vivyo vilaya ivya ina Levi, yao atakwata impanga wakwe mwemuno mwasyala, na inamasi, na ana asyale, na yamukamfwilwa, yano yakaikala mu misumba inu. Yene yalinzile kwiza tola vyonsi vino yuulilwa. Muce mwacita vivyo pakuti Yawe Leza winu ace amupolelele mu milimo inu yonsi.”

Malango 14:29 ပူးပေါင်းရင်းမြစ်များ

Masamu 41:1

Walongo umuntu wiyo akasakamala mupina nu mulanda, Yawe nawe alamukulula uwanda wa ntazi.

Masamu 41:2

Yawe akamucingilila nu kumusunga, akamulenga aye nu luzango muno nsi, asimusunkilizya nu mu minwe ya anisi yakwe foo.

Masamu 94:6

Yakakoma yamukamfwilwa na ayenyi, nu kutala akatwe ku ana asyale.

Mapinda 11:24

Umwi angatwalilila ukupeela ivintu vyakwe luse luse uku yauze, lyene ala akalukulunduluka umu ukankala wakwe. Lelo umwi nawe ndi wati atale aezye, ala wama sile upina utupu.

Mapinda 19:17

Wiyo akasakamala umulanda ala wakongwesya Yawe, nga nawe alamulipa ivisuma pali vino wacisile.

Ezaya 1:17

Tiini ukwifya. Sumbini amano ku kuzifya. Sumbini amano inu ku kucita ivya ulungi. Mwaazwilizya antu akafyengwa. Mwapingula ningo ana asyale. Mwaazwilizyako yamukamfwilwa.”

Aina Levi 19:34

Mwayasunga ndi vino mukasunga aina Izlaeli yauzo. Nupya mwayatemwa ndi vino mwaitemwa mweisikulu. Mwaiusya vino mwali ainamasi mu mpanga ya Eguputo. Nene indi Yawe Leza winu.

Mpendwa 18:20

Alino Yawe anena Aaloni ati, “Utalakwata icaupyanyi mu mpanga yao. Nupya utalakwata isala mu mpanga yao. Nene ne Yawe indaya isala alino ni caupyanyi cako pakasi ka ina Izlaeli.”

Luka 11:41

Lelo pelini vino vili mu mbale ku apina, alino myenzo inu imasanguluka.

Luka 6:35

Lelo temwini anisi inu nu kuyacitila visuma. Nupya mwakongwesya kwaula kupaalila kupokelela cimwi kunoyali. Lyene mulakwata icilambu cikulu, nupya mulaya ana yakwe Leza uwa papelapela. Pano wene akacita visuma kuli yano asitaizya na aipe kwene.

Malango 10:9

Ali cino aina Levi yatakwatila icipande ca mpanga. Yawe umwisikulu ali cuma cao ndi muno wene wavwanzile kunoyali.

Malango 12:12

Lyene mulasansamuka pa manso yakwe Yawe Leza winu apali pamwi na ana inu, na aomvi inu, na ina Levi akaikala mu misumba inu. Mwaiusya ukuti aina Levi Yene yatapiilwe impanga ingaya impanga yao iyaupyanyi.

Malango 14:27

“Mutakezye ukutazyela aina Levi yano yakaikala mu misumba inu. Yene yatakwata impanga pali vino vyankanyiziwe.

Malango 15:10

Mulinzile ukuya antu ya wila kunoli ukwaula ulusoko, nga Yawe alamupolelela mu milimo inu yonsi.

Malango 16:11

Muce mwasansamuka pa manso yakwe Yawe Leza winu, mwemwe pali pamwi na ana inu, na aomvi inu, na ina Levi, na inamasi, na ana asyale, alino na yamukamfwilwa yano mukaikala nayo. Muce mucite cii pa ncende yonga iyakupepela penepo.

Malango 16:14

Muce mwasansamuka pamwi na ana inu, na aomvi inu, na ina Levi, na inamasi, na ana asyale, alino na yamukamfwilwa yano yakaikala mu misumba inu.

Malango 23:21

“Lino walaya kuli Yawe Leza wako, utakezye ukufutokela pa kucita cino walavile, pamulandu wakuti Yawe Leza wako alakupeelelapo umulandu pa ulayo wako nga nawe ulaya nu mulandu wa kwifya.

Malango 28:8

“Yawe Leza winu alapolelela imilimo inu, alazuzya ivyakulya mu nkoma zinu. Wene alamupolelela mu mpanga ino akumupeela.

Malango 6:11

Amang'anda yayo mwazula ivintu visuma, vino mwemo mutatutilemo, muno mwaya ni vifula vino mwemo mutimvile, ni vyalo vya matingi vino mwemo mutalimile nga ni miolivi ino mwemo mutalemile. Lino Yawe alamuleta mu mpanga ii, ndi mwaca mwalya mwikuta,

Ayebulai 13:2

Mwaiusya kuzengela aenyi mu mang'anda inu. Kwali antu yamwi yano acisile vikwene nu kuzengela angeli kwaula kumanya.

Yakobo 1:27

Upefi uno Leza Tata akalola ukuti uwa mpomvu aewu: ukwazwa ana asyale na yamukamfwilwa mu macuzi yao nga nu kuisunga ku ukakasi uwaya mu nsi.