Kufuma 3:9 - Amazwi Yakwe Leza 2013

⁹ Cumi natinuvwa inkuta ya antu yane, nupya natindola kukalala kuno aina Eguputo yakucita pa antu yane.

Kufuma 3:9 ပူးပေါင်းရင်းမြစ်များ

Utandiko 16:11

Nupya mungeli wilya amunena ati, “Watusenda indilwa nga ulavyala umwana umonsi, ulamutemela izina Isumeli, pamulandu wakuti Yawe watauvwa ukulilizika kwako.

Utandiko 31:12

Nga avwanga ati, ‘Silola, yasawe yonsi akulondela zyakaci a mingololozi, a matonitoni, a maalamaala. Nene natindeka kuti avino cicitike pamulandu wakuti natindola vino Labani akucita kunuli.

2 Yamwene 13:4

Lyene Yeowazi walenzile uwelelo kuli Yawe, nga Yawe nawe auvwa ukupapata kwakwe apakulola vino aina Asilya yazunya muno aina Izlaeli.

2 Yamwene 20:5

“Swilila ukamunene Hezekiya umwene wa antu yane uti, ‘Yawe, Leza wa cikolwe cako Davidi wavwanga ukuti natinuvwa ukupapata kwako, na minsozi yako natinjalola. Fwandi nemo namakupozya nu wanda uwalenga yatatu, ale wakwela kunondi, uku Ng'anda ikulu yakwe ne Yawe.

Neemiya 9:9

“Waweni intazi nu kucula kwa vikolwe vitu umu Eguputo. Wuvwile ni mpoma zyao, kuli Yemba Muyenzu.

Masamu 12:5

Pamulandu wakuzunya alanda, Yawe nawe wavwanga wati, “Namakatuka, intuule nu mulanda akufyengwa, nu mupina akuilizyanya. Namapususya yayo akapunda kunondi!”

Masamu 9:14

apakuti ningimilila inkolelo ya antu amu Yelusalemu nu kuyanena ivintu vyonsi vino nkakulumbanyizizyapo. Namazanga pano wemo wantuula.

Kufuma 1:11

Caleka umwene wilya ni nkombe zyakwe yika yakangalila akalale pa ina Izlaeli kuti yayapatikizya ukuomba imilimo ikome pakuti yayatonsye. Aina Izlaeli yakuula umusumba wa Pitomu nu musumba wa Lamesesi kuti iye imisumba yakwe Falao yakusungilamo ivyakulya.

Kufuma 1:22

Pa kusyalikizya umwene wilya apeela ilamulo ku antu yakwe yonsi ati, “Mwana wensi umonsi uwavyalwa ku Ayebulai alinzile asumbwe mu Luzi lwa Nailo. Lelo ana yao yakaci yonsi muyata sile.”

Kufuma 1:8

Lyene umwene muze wino atamanyile nanti cimwi pali Yosefu, apyana atandika kuteeka mu Eguputo.

Kufuma 2:23

Lino papita imyaka ivule, umwene wilya waku Eguputo afwa. Lelo aina Izlaeli ala yacili yakucula mu uzya, nga inkuta yao yuvwika kuli Leza.

Kufuma 2:25

Leza alola ucuzi wa ina Izlaeli, nga asakamala kuti ayazwe.

Kufuma 3:7

Lyene Yawe avwanga ati, “Natindola kukalala kuno aina Eguputo yakucita pa antu yane. Natinuvwa inkuta ya antu yane kuti njatuule ukufuma mu makasa yakwe yakangalila yao akalale. Manyile kunyunguluka kwao konsi.

Kasambilizya 4:1

Lyene ndolekesya pa lufyengo lonsi ulukacitika mu nsi ii. Antu yano yatitikiziwa yakulosya nga kusi nanti aumwi uwakuti angayazwa. Kusi nanti aumwi uwakuti ayazwe pano antu yano yakuyatitikizya yakwatisya maka.

Kasambilizya 5:8

Utazunguka lino walola ukuti uteko ukutitikizya apina nu kuyafyenga mu nsambu zyao. Cilolo wensi wacingililwa na wiyo akamwangalila, alino yaa yoili yacingililwa ni vilolo iviyalusile.

Amosi 4:1

Uvwini amazwi yaa, mwe anaci aku Samaliya, mwemuno mukulu kwina wakwe yamutusa ya ng'ombe zyaku Basyani, mwemuno mukazunya apina nu kucuzya yayo aulilwa. Mwemo mwikalila sile ukupingula yawinu ala mukuti, “Tupelini ivyakuzusya uku nsingo.”

Malango 26:7

Alino naswe itulilila Yawe, Leza wa vikolwe vitu kuti atwazwilizye. Nga nawe auvwa kunotuli alola nu kucula kwitu, intazi zitu, nu ulanda witu.

1 Samueli 9:16

“Mutondo pa kasita kwene ndi kaka kwene ndakutumila umuntu umwi uwamu mpanga yakwe Benjamini. Ali wino wemo ukasonte ukuya umwene wa antu yane aina Izlaeli. Wene alakulula antu yane ku makasa ya ina Filisti. Nemo natindola ukucula kwa antu yane, pano nuvwa mpiti inkuta yao.”