Kufuma 10:3 - Amazwi Yakwe Leza 2013

³ Acino Mose na Aaloni yaya kuli Falao nga yamunena yati, “Yawe, Leza wa Ayebulai wavwanga wati, ‘Uzye amaila yanga yano ulatalama kunondi? Ta antu yane yapita, pakuti yangampepa.

Kufuma 10:3 ပူးပေါင်းရင်းမြစ်များ

1 Yamwene 18:21

Eliya pali pakupalamila ku antu yaya yonsi nga ayanena ati, “Uzye alilaci lino mulelenganya vino muli nu kucita? Ndi cakuti Yawe ali Leza winu, fwandi ali wino mwapepa! Lelo ndi cakuti Baali ali leza winu, fwandi ali wino mwapepa!” Lelo antu yatavwanzile nanti izwi lyonga.

1 Yamwene 21:29

“Uzye watulola vino Aabu waicefya? Pa kuicefya kuno wene waicefya pa manso yane, ntalamuletela imipamba amanda yonsi yano alikala pano nsi. Lelo ndaletela ang'anda yakwe imipamba mu manda ya umi wa mwana wakwe umonsi.”

2 Yamwene 22:19

Pano wemo wazenzuka, waicefya nu kuicefya apa manso yane. Walepola ni vyakuzwala vyako, walila nu kulila. Uvwa vino napangiile umusumba wa Yelusalemu kumwi na ikazi aikala mwenemo. Ala nemo ndaleka incende iya ice iye iyakuzungusya antu. Nupya ali ncende ino yalatipwilila antu. Ukuya kwene nemo natinuvwa ipepo lyako. Ivyalanda ne Yawe.

2 Milandu 33:12

Umu kucula kuno wacuzile asuka aya umutontela ngozi nu kuicefya apakalamba pa manso yakwe Yawe Leza wakwe. Alino amupapata nu kumulenga kuti amuyele uluse.

2 Milandu 33:19

Vino Manase wapepanga Leza na vino nawe wamwasukanga, ni vintu vyonsi iviipe vino Manase wacitanga, ni ncende zya kupepelamo utuluwi zino wakuuzile, ni vinkolanya vyonsi pamwi nu tuluwi twakwe Asyela tuno wapanzile pa kucindika Asyela, vyonsi vyalembwa mu mpapulo zyakwe yakasema.

2 Milandu 34:27

pasi pano waicefizye, wazenzuka pa manso yane. Walepozile ni vyakuzwala vyako apakulanga ulanda. Wemo uvwile vino napingwile Yelusalemu na ikazi yamwenemo. Nemo fwandi natinuvwa ipepo lyako.

2 Milandu 7:14

ndi cakuti antu yane, yano yakaamilwa ukwi zina lyane, yaicefya nu kupepa kunondi, yalondalonda ni cinso cane, nu kuzenzuka ku misango yao ya ukakasi, ale lyene nani ukwiyulu kuno nikala indayuvwa, njayelele uluse apa maifyo yao. Indaleka nu kuti umu mpanga yao muye ivyakulya nyanya.

Yobo 42:6

Ali cino fwandi nawezya umuvwango wane onsi. Naiswela ulukungu ni itwi, apakulanga ndi vino lyene nazenzuka.”

Kufuma 10:4

Ndi cakuti watwalilila kukomya umwenzo ndalenga makanta kuti aize mutondo mu mpanga yako

Kufuma 16:28

Lyene Yawe auzya Mose ati, “Uzye kufika insita cii lino mumakana kuyela malamulo yane?

Kufuma 4:23

Nakunenyile ukunena umwana wane umonsi iyeli apite pakuti angampepa, lelo wemo wakanyile. Cisuma! Ndakai namakoma umwana wako umonsi nupya iyeli.’ ”

Kufuma 5:1

Pacisila ca vintu vii, Mose na Aaloni yaya kwi sano kuli Falao nga yamunena yati, “Yawe, Leza wa ina Izlaeli, watavwanga ati, ‘Ta antu yane yapita, pakuti yangaya yakacite uzevyo wa cimulo ca kuncindika mu lwanga.’ ”

Kufuma 9:17

Nomba wemo ucili nu munyambo pa antu yane pakukana yata kuti yapite.

Mapinda 1:22

“Mwe mbulwamano mwe! Mulasya umbulamano winu ukufika lilaci? Mulata lilaci ukusuula ne malango? Uzye mulasyalilila awelewele vivyo kwene?

Mapinda 1:24

Apakuzana ukuti namwamile namwe mwakana ukuyela, namusinizyanga namwe mwansuuzile,

Mapinda 18:12

Ukuiwanzya umukasi ka mwenzo, ukukakolelela ukuponga. Ukuicefya ali kuno kukakolelela ucindami.

Ezaya 1:5

Uzye apacani cino mwala mwakomapo ukumusangukila? Uzye manye mukulonda sile kuti acizye penepo uku mufulula? Pano uku mitwe inu kuziile ivilonda vitupu. Imyenzo inu nayo yatoteka.

Ezaya 2:11

Akuno uli uwanda umwi umu pipi, uno antu avilumba yalafusiwa amanso yao, uwanda uno ivilumba vyao vilasila. Awewe wenga sile we Yawe, wemuno ulacindamikwa mu wanda ulya.

Yelemiya 13:10

Antu ya aipe, nupya yene yakakana nu kuyela amazwi yane. Yene yatalama nupya yakomela sile ukwifya. Yakapepa utuluwi, tuleza tuze tuze sile nupya atuno yakatumikila. Ali cino fwandi nayo kwene yalakolana ni nsalu kwene zizyo, zino antu yatange yazizwale nupya.

Yelemiya 13:18

Lyene Yawe avwanga kunondi ati, “Nena umwene nga unene na nyina kwene, namwene ukuti yasenke apa vilimba vyao vya wene. Pasi pano ivilongwe vyao vya wene iviyembe vyativipona ku mitwe yao.”

Yelemiya 50:29

“Amini yano yacenjela kufiika inceto yize yalwisye aina Babiloni. Mwame sile yonsi pyu yano yamanya kuzumba amalapwa. Zingulukini umusumba, mutaleka nanti wenga apuuke. Mulandule apa vicitwa vyao, ndi vino nayo yacisile. Pano kwene yacita icilumba kuli Yawe, Wamuzilo wilya wakwe Izlaeli.

Ezekelo 5:6

Lelo Yelusalemu wii, wene wakana ukulondela amasunde yane, waipisya ukuluta imitundu yuze, watalama ukuluta ni mpanga zyuze zino zyamuzinguluka. Yelusalemu wakana ukusunga vipope vyane na masunde yane.

Danieli 5:22

“Lelo wemo, we mwanakwe, utaicefya awe, nanti angala wamanyile cii.

Mpendwa 14:27

“Uzye iumba lii ilipe, lilata lilaci ukuilizyanya pali nene? Natinuvwa ukuilizyanya kwa ina Izlaeli pali nene.

Loma 2:4

Nanti uzye ukasula kuvula kwa luse lwakwe Leza na vino akatutekela mwenzo? Uzye utamanyile vino Leza ali nu luse kunuli kuti akutungulule ku kuzenzuka?

Ayebulai 12:25

Caleka tekelini, nupya mutakana kuuvwa kuli wino akuvwanga. Yao akanyile kuuvwa kuli Leza lino wavwanzile kunoyali kupitila muli Mose, yatatuuzilwe. Uzye lyene swemo tungatuulwa uli ndi twakana kuyela wino akuvwanga kunotuli kufuma kwiyulu?

Yakobo 4:10

Muicefye mweisikulu pa manso ya Mwene, nga nawe alamutumpula.

1 Petulo 5:6

Acino, lyene muicefye nkolelo ya maka yakwe Leza, nga nawe alamukatusya mu nsita ino wasonta.