Kasambilizya 9:3 - Amazwi Yakwe Leza 2013

³ Endi, swensi kwene icikatuponela icili cimwi, nga icintu cii iciipe mu vintu vyonsi ivikacitika umu nsi ii. Lino antu yacili nu umi amelenganyo yao yakazulamo uyi nu upena, alino yakaiukila ukuti iyafwa.

Kasambilizya 9:3 ပူးပေါင်းရင်းမြစ်များ

Utandiko 6:5

Lino Yawe walola vino inkota zya antu zyavulisya na vino ukwelenganya kwao lyonsi kwaya ukwipe,

Utandiko 8:21

Lyene lino Yawe wanunsya umununko, nga umwisikulu avwanga ati, “Ntalatala ntipe insi nupya, pamulandu wa vicitwa vya muntu. Amelenganyo ya antu yaya ankota ukufuma ku civyalilwa. Ntalonona insi ni vyaumi vyonsi nupya, wakwe vino natincita.”

Yobo 15:16

Ale fwandi umuntu wene cingapela kwi! Wiyo uwa miyele iipe nupya ivulungane! Nga vino wene akacita inkota kwati avino akamwa amanzi!

Yobo 21:26

Lelo nanti cingaya vivyo imfwa yene ili yonga sile, nu kuzikwa yonsi yakazikwa icili conga umu musili. Ni ngonyo iziyalya yonsi kwene.

Yobo 9:22

Ali cico kwene cino nkulukuvwanga inti, ‘Leza akaonona antu akaele kumwi na aipe.’

Masamu 51:5

Kwene nemo navyalilwe umu luyembu. Lino mayo wanyomelile indilwa yane, nali umwipe.

Masamu 64:7

Mwalola lelo! Leza nawe wasya avwintile inceto zyakwe pano yali nu kuyapumikizya sile papa kwene pano yali.

Mapinda 14:32

Umuntu mwipe uyi wakwe uli uno ukamuwisya, lelo wiyo akacita vyaololoke wene akazina mu vicitwa vyakwe ivisuma.

Kasambilizya 1:17

Nelenginye kusambilila kuti imanye upusano pakasi ka mano nu uwelewele, na pakasi ka mano nu upena. Lelo nazanyile ukuti limwi nani kwene ningazinganya umuza.

Kasambilizya 12:7

Imili itu ilaswilila ku lukungu ku musili. Umupu ulaswilila kuli Leza wino watupile.

Kasambilizya 2:14

Antu yamano yangalola kuno yakuya, lino iviwelewele vitangalola kuno vikuya. Lelo namanya ukuti icikaponela umuntu wa mano, icikaponela iciwelewele na cipena kwene.

Kasambilizya 7:2

Cazipa ukuya ku ng'anda ya ndosya ukuluta ukuya ku ng'anda ya mateweto, pano antu apuma yalinzile kwiusya ukuti swensi kwene tulafwa.

Kasambilizya 7:25

Lelo naipezile pamulandu wa kusambilila pakuzana amano. Nalondesya ukuzana amano, alino nu kuzana amaasuko yakuzana amano, alino nu kuzana amaasuko yaku mauzyo yane. Nupya nalondanga ukusambilila vino uyi waya, vino uwelewele waya, na vino kutumpa kwaya.

Kasambilizya 8:11

Uzye pacani cino antu yakatalila imilandu uku mufulo? Aeci yakapingula ya milandu yasipingula zuwa.

Kasambilizya 9:11

Naweni icintu nacuze. Icintu cico icakuti antu yano yakwatisya ulwilo yasicimvya mu kucimvyanya, na antu aposye yasicimvya mu nkondo. Antu yamano asi lyonsi lino yakwata ivyakulya. Antu acenjele asi lyonsi lino yakaya akama. Antu asambilile asi lyonsi lino yakasyukila incito ya papela, pano isyamo likaponela umuntu ali wensi.

Kasambilizya 9:2

Pataya upusano foo. Icikaponela umuntu mololoke, icikaponela na kaifya kwene. Icikaponela umuntu musuma, icikaponela nu muntu mwipe kwene. Icikaponela kapepa, icikaponela na asipepa kwene. Icikaponela akapeela impolelwa, icikaponela na asipela kwene. Umuntu mololoke atalusile kaifya, na wino akalapa umulapo, atalusile wiyo asilapa.

Kasambilizya 9:4

Lelo umuntu wensi ali nu umi wakwata upaalilo. Simbwa mupuma wazipa ukuluta cisama umufwe.

Yelemiya 16:12

Lelo mwemo mwifya ukuluta yaso. Si lolini vino cila wenga akulondelela ulukumbwa lwa mwenzo wakwe wiipe, ukwaula nu kunguvwa foo.

Yelemiya 17:10

Nene ne Yawe nkaceceta umwenzo wakwe cila muntu, nu kwezya amano yakwe. Nkapeela na cila wenga ukulingana ni micitile yakwe, ukulingana ni milimo yakwe ino akacita.”

Yelemiya 17:9

“Uzye aweni angatezya vyamu mwenzo wa muntu? Mwene mwazula ucenjezi uwa misango yonsi, nupya uwipe wakwe cimwi.

Luka 15:17

Lyene lino amano yamuzana aelenganya mu mano yakwe ati, ‘Aomvi yakwe tata yonsi yakalya yakwikuta na vimwi vikasyala, lelo nemo kuno namafwa kunzala!

Luka 6:11

Nao yasoka cuze, yumana kapi pali cino yangacita kuli Yesu.

Milimo 12:23

Lilyo kwene mungeli wa Mwene alwalika Helodi pano atapile lulumbi kuli Leza. Helodi ingonyo zimulya, afwa.

Milimo 26:11

“Nupya maila aingi mu mang'anda ya mapepo nayazunyanga, kwezya kuti yafutatile utailo wao. Alino pano ukali wane walusya, lyene nayalondelelanga nu mu misumba yamu mpanga zyuze, ku kuyazunya.

Milimo 26:24

Lino Paulo atali kuti amale kuitaasya ndi vii, Fesito asanzika izwi ati, “Paulo, siwapena! Kusambilila kwako kukulu kumakupenya.”

Tito 3:3

Pano mpiti twali awelewele, asyayela nupya antu akaluvyanya. Twacisilwe uzya ku nsuna ni misango yonsi ya vintu vyakuizanzya. Twasumvile nsita zitu mu kucita vyalufyengo nga nu kuzuwilana. Antu yauze yatupasile nga naswe twayapasile.

2 Petulo 2:16

Lelo punda wamulungike pa ciipe cino wacisile. Wene wavwanzile kunoli mwi zwi lya muntu nu kulesyanya cicitwa cakwe ca uwelewele.