Kasambilizya 3:2 - Amazwi Yakwe Leza 2013

² Kwaya insita ya kuvyalwa ni nsita ya kufwa, kwaya insita ya kulema ni nsita ya kwipula vilemwa vivyo,

Kasambilizya 3:2 ပူးပေါင်းရင်းမြစ်များ

Utandiko 17:21

Lelo ndafikilizya upangano wane na Isaki wino Sala alakuvyalila mu nsita kwene ii, umwaka ukwiza.”

Utandiko 47:29

Lino Yakobo walola insita ya mfwa yakwe yapalama atuma uwakuya ama Yosefu umwana wakwe umonsi. Nga lino Yosefu wafika kunoli, Yakobo amunena ati, “Ndi wantemwa, pisya makasa yako mu mpamba zyane alino ulape mulapo ukuti ndi naca nafwa utalanzika muno mu Eguputo.

1 Yamwene 13:2

Alino apundilila kavuwa pa kusema amazwi yakwe Yawe, ati, “We kavuwa we, we kavuwa we! Yawe wavwanga wati, ‘Umwana umonsi uwi zina lyakwe Yosiya alavyalwa ku amu mupanda wakwe Davidi. Ali wino alakoma pali wewe yasimapepo yano yaya mu ncende zino yakapepela mwenemo utuluwi, yao yonsi yano yakapeela impolelwa pali wewe. Aloca na mafupa ya antu pali wewe.’”

2 Yamwene 4:16

Alino Elisya amunena ati, “Mwacizo, pa nsita ndi ikwene, ulafukatila umwana umonsi mu makasa yako.” Umwanaci wilya nawe avwanga ati, “Iye, musambazi! Wewe kasema wakwe Leza. Ala utantumpoka ne muomvi wako!”

Yobo 14:14

Uzye umuntu ndi wafwa, angaya nu umi nupya? Ndi cakuti ali vino cingaya nemo fwandi apa manda yonsi yano ningakuombela ningalolela ukufika napa nsita ino amalanda yane yangansilila.

Yobo 14:5

Amanda ya muntu pano nsi yapendwa mpiti. Nupya wewe umanyile impendwa ya myezi yakwe. Pano awewe kwene wamupimila insita. Uzye lyene wene angacila penepo?

Yobo 7:1

“Ala umi wa muntu pano nsi waya wa mulimo wakupatikizya sile. Na manda yakwe yaya wa manda ya muntu uwalembwa incito ya cibaluwa.

Masamu 113:9

Aliwe sile awino akacindamika ing'umba apa ng'anda nu kuisansamusya apa kuipeela umwana. Lumbanyini fwandi Yawe!

Masamu 52:5

Endi mwandi, Leza alakufyatila alakufyambata, amanda yalakuzana, uluulilwa nu mwakwikala. Wene alakutenula nu kukufumya muno nsi ya umi.

Mapinda 24:27

Tala kuula ing'anda yako, alino ulime ni calo cako, nga nu kutwala alino utwale umwanaci.

Ezaya 28:24

Kutaya umulimi nanti wenga akapelela sile ku kulima ivyalo vyakwe, mu kuvisankaula sile nu kulinganya umusili.

Ezaya 38:1

Umu manda yalya umwene Hezekiya walwile uwakufwa. Alino kasema Ezaya umwana umonsi wakwe Amozi waile uku kumupempula. Aya amunenelapo na mazwi akuti, “Yawe akukunena ati, ungatantika vyonsi ningo, pano kwene wemo usikupusuka foo, umafwa.”

Ezaya 38:5

“Yanga ukanene Hezekiya ndi vino Yawe, Leza wakwe so Davidi akuti, ‘Natinuvwa ukupapata kwako nupya nindola na minsozi yako. Cisuma fwandi nemo namakupozya. Apa manda yatatu, ale waya uku kumpepa umu ng'anda yane. Nakulundilako imyaka ikumi na isano iyakuti ungikala pano nsi.

Ezaya 54:1

Umila kapundu nu luzango we ng'umba wemuno usivyala ana. Pongomoka impooma ya luzango nu kusansamuka! Pano wemo ulakwatisya ana ukuluta na pa mwanaci wino iya atatala wasya.

Yelemiya 1:10

Ilelo nakupeela amaka pa mitundu na pali yamwene yayo, amaka ya kutukulula nu kuongolola, amaka akonona nu kulovya, akukuula nu kulema.”

Yelemiya 45:4

Yawe nawe wavwanga wati, “Cino nakuuzile namaciongolola, nacino naalemile naco namacitukula. Ala namafulula impanga yonsi pyu.

Mateo 13:41

Mwana wa Muntu alatuma angeli yakwe mu wene wakwe, nao yalakonganika nu kufumyamo antu yonsi akalenga auze kwifya nga na antu yonsi akacita viipe.

Mateo 15:13

Ayanena ati, “Muti onsi uno Tata wa mwiyulu atalemile ulipulwa kumwi ni misisi.

Luka 1:13

Lelo mungeli amunena ati, “Utoopa Zakaliya, pano ipepo lyako lyati lyuvwika. Muci wako Elizabeti alakuvyalila umwana umonsi, alino naawe ulamutemela izina uti a Yoane.

Luka 1:20

Lyene ndakai umaya ciulu, nupya utalavwanga kufika nu wanda uno vintu vii vilayako, pano utataile mazwi yane yano alafikiliziwa mu kasita kakweyo.”

Luka 1:36

Lola umunyonko Elizabeti. Nawe kwene watasenda indilwa nanti angala mukoloci. Camanyikwe vino atangavyala ana, lelo ndakai ali ni myezi mutanda kufuma pano wasendile indilwa.

Yoane 16:21

Lino umwanaci ali pipi nu kuvyala, akaya nu ulanda pano kasita kakwe ka ucuzi ala kati kiiza. Lelo lino mwana wavyalwa, umwanaci asyaiusya kucula kwakwe, pano ali ni nsansa pamulandu wa kuvyalwa kwa mwana mu nsi.

Yoane 7:30

Lyene yalonda kuti yamuleme, lelo patali umuntu uwakuti amuleme, pano kasita kakwe kalanga katali kafike.

Milimo 7:17

“Lino insita yapalime iyakuti Leza afikilizye ulayo uno wacisile kuli Abulaamu, impendwa ya antu itu ali mu Eguputo ikulilako cuze.

Milimo 7:20

“Yali ili nsita ino Mose wavilwe, mwana muyembe cuze. Nyina wamulezile ukwakwe pa myezi itatu sile.

Galatiya 4:4

Lelo lino nsita yafisile Leza watumile Mwana wakwe, uwizile avyalwa ku mwanaci. Mwana kwene wii wayelanga Masunde yakwe Mose

Malango 34:5

Acino Mose umuomvi wakwe Yawe ali pa kufwila mumu kwene mu mpanga yaku Moabu, wakwe muno Yawe wavwanzile.

Ayebulai 9:27

Muntu wensi alinzile ukufwa lyonga nga pacisila apingulwe na Leza.

1 Samueli 2:5

Yao aikutanga ali yano yakupula ivyakulya, lelo yao ali ni nzala ndakai yakwikuta. Umwanaci uwali ng'umba ndakai akweti ana cinimbali, nu mwanaci uwakweti ana aonsi avule, ndakai atakweti nanti wenga.