Ezekelo 8:18 - Amazwi Yakwe Leza 2013

¹⁸ Caleka yalalola apapelela icipyu cane. Ntalayapanya foo, nupya citalambaya foo. Yalezya uku mpapata wakwe cimwi, lelo nemo ntalayuvwa foo.”

Ezekelo 8:18 ပူးပေါင်းရင်းမြစ်များ

Mapinda 1:28

Ali lino mulangama lelo ntalamwasuka. Mulandondelezya lelo mutalanzana.

Ezaya 1:15

Nanti mungakatusya amakasa umupela apakumpepa, nemo lyene ntakusumbanga kweneko amano. Nanti mumpepe uli nemo namapupuzyanga sile, pano iminwe inu ikowele ku uyi.

Ezaya 59:1

Ikasa lyakwe Yawe litipimpala cakuti liposiwe ukupususya, nanti amatwi yakwe yatapuulama cakuti yakane ukuuvwa.

Ezaya 59:2

Lelo uyi winu ali uno wiimba polowe pakasi kinu na Leza winu. Amaifyo inu ali yano yaleka ukuti ivinso vinu vifisame kunondi. Ali lovyo kwene.

Yelemiya 11:11

Caleka lyene ne Yawe nkuyasoka ukuti namayaletela uononyi, nupya yene yatalutuka awe. Yamatangi ndi yalaizya tutulwe, nemo nsikwikangako amano.

Yelemiya 14:12

Pasi pano nanti yangata ukulya, nemo ntange nuvwe inkuuta zyao. Nupya nanti yangandetela amawila yakoca na mawila ya mbezu, nemo ntalazangila munoyali awe. Lelo ndayakomola ku lupanga, ku cipowe nu ku ndwala.”

Yelemiya 23:39

ndiza njanyenyemule wa civiya cinyome nu kuyazukuzila ukutali nakunondi, alio kwene kumwi nu musumba uno napiile ku vikolwe vyao.

Yelemiya 44:3

Apamulandu nu uyi uno yacisile, wakunsosya umwenzo lino yaile kuli tuleza utwenyi tuno yatamanyile aeneco kwene nanti ivikolwe vyao cakuti yatocela ubani nu kututumikila.

Yelemiya 44:6

Fwandi lyene nani icipyu cane cayaponile nu koca imisumba yamu Yuda ni miseo ya musumba wa Yelusalemu yasanguka amatongwa na antu apakuilola yakakunta sile imitwe ukufika na pilelo.

Nyimbo zya ndosya 1:5

Anisi yano yapokolola umusumba lyene asangwike aeneco ya musumba. Umwene uwatamuletela ucuzi uwo pamulandu wa maifyo yakwe avule. Ana yakwe yalemwa nu kusendwa uku uzya.

Nyimbo zya ndosya 2:17

Umwene lyene wasuka wacita vino walanga wapanga ukucita. Wene watatulovya ukwaula nu luse, ndi mumu kwene muno watunenyile mpiti. Wataleka ukuti anisi itu yatucimvye. Acino lyene nu kuyuvwa yakuyuvwa wakwe cimwi.

Ezekelo 16:42

Avino ndamyalalika icipyu cino nakukwatila. Alino uzuwa wane ulakutaluka, umwenzo wane ulamyalala, nu ukali wane ulasila.

Ezekelo 23:25

Ndaleka yakutakanye cipyu cipyu, pano nemo ninkusokela. Yalakuputula impuno na matwi, yalakoma na ana yako. Yalakupoka ana yako aonsi na anaci, yakayoce nu mu moto.

Ezekelo 24:13

We Yelusalemu, ala imisango yako ya ukulukusi yakukowezya. Nanti nemo ningezya uku kuzifya, awe cumi wemo ukasyala mumu kwene muno wakowela. Ulazifiziwa sile lino uluvwa apapela icipyu cane.

Ezekelo 9:10

Caleka nani ne Leza insikusya nanti wenga, nsikutezela umuntu foo. Nemo namayacita sile ukulingana na vino yene yacita auze.”

Ezekelo 9:5

Nga nupya inuvwa kuno Leza akunena asyala yonsi ati, “Mulondelini, pitangini mu musumba, mukomemo antu. Cisi cakwezya ukusya nanti wenga, kusi kwezya kutezela umuntu foo.

Mika 3:4

“Ala insita iliza lino mulakuuta kuli Yawe kuti amwazwe, lelo wene atalamwasuka. Pa nsita kwene iyo wene ataluvwa inkuuta inu pamulandu wa nkota zinu.”

Naumi 1:2

Yawe a Leza wa uzuwa nupya akacita icilanduzi. Yawe akacita cilanduzi nupya wakalipa. Yawe akavunuka yao amusangukila, nupya akacita cilanduzi pa anisi yakwe.

Zakaliya 1:2

Yawe Wamaka yonsi avwanga kuli Zakaliya kuti anene antu ati, “Nene ne Yawe nasokile ivikolwe vinu,

Zakaliya 7:13

Yawe Pali pakuvwanga ukuti antu yakwe ndi yasikuvwa vino akulanda, awe cumi nawe atalauvwa vino yalamupapata.

Luka 13:25

Mwine wa ng'anda alakatuka nu kuyali cisasa. Lyene mulimilila panzi nu kutandika kukonkonsya ku cisasa nu kuti, ‘Mwene, tuyulileko!’ Nawe alaasuka ati, ‘Ntamanyile kuno mufumile.’

1 Samueli 8:18

Lino uwanda ulya uliza, mulalilila ku mwene wino mwasolola kuti amwazwe, nga Yawe nawe atalamwasuka.”