Ezekelo 7:26 - Amazwi Yakwe Leza 2013

²⁶ Isyamo lilalondela api syamo ni cimvulunganya pa cimvulunganya. Alino yaluzya cilolwa kuli kasema, lelo simapepo atalakwata ilamulo, inkombe nazyo zitalamanya vyakupanda amano.

Ezekelo 7:26 ပူးပေါင်းရင်းမြစ်များ

Masamu 74:9

Intambi zitu zyonsi izyamuzilo zyatizisila. Yakasema kusi nanti wenga asile, alino kusi nanti wenga angamanya kuno icintu cii cilapelela.

Ezaya 47:11

Ala nkukunena umupamba ulakuponela, uno wemo ulaposiwa nu kuutuka, uno ni vizimba vyako vilaposiwa ukuomba. Uzanzo ulakuponela cakuti patalaya icakukukulula. Impungo ya ononyi ilakupumikizya, ino wemo utatala welenganya umu mano yako.

Yelemiya 18:18

Lyene antu yavwanga yati, “Izini mwe, muleke tuvwane ivyakufulula Yelemiya! Pano lyonsi kwene kumayanga yasimapepo akutusambilizya, na antu yamano akutupandako amano, nga na yakasema akusema ilandwe lyakwe Leza. Izini mwe, muleke tumupele imilandu, tute nu kuuvwa kuli vyonsi vino akulanda.”

Yelemiya 21:2

“Twapapata mutuzizyeko kuli Yawe, pano lyene Nebukadineza umwene waku Babiloni ni vita vyakwe yakulwisya umusumba uu. Limwi lyene Yawe angatucitila ivizungusyo vimwi ivingapatikizya umwene Nebukadineza kuswilila.”

Yelemiya 37:17

Nga alino lyene umwene Zedekiya atuma kuti yamulete kuno wali ukwi sano. Alino amuuzya mu umfisolo ati, ‘Uzye kungaya kweneko izwi ilingafuma kuli Yawe?’ Yelemiya nawe aasuka ati, ‘Ee, akuno lili. Wemo ulapelwa mu makasa ya mwene wa ina Babiloni.’ ”

Yelemiya 4:20

Uzanzo walondela apa uzanzo uze. Ni mpanga yonsi yatiyononeka umu kasita sile akanono. Amataalu yane yatiyononeka umu kupumikizya, icifulo cane naco umu kasita kanono.

Nyimbo zya ndosya 2:9

Impongolo zyati zyononeka. Imifikilo nayo yakontoka kumwi ni mikolongelo. Umwene wamuno mpanga kumwi na makombe yakwe yasendwa uzya ku inamasi. Kusi nanti umwi uwakusambilizya amazwi yakwe Leza. Nanti sile a yakasema yakwe kwene yatiyata ukulola ivilolwa ukufuma ku Mwene.

Ezekelo 11:2

Nga alino Yawe anena ati, “We mwana wa muntu, yaa ali yantu yamwi yao yano yakupingila ukucita iviipe nu kupanda amano yaipe uku yantu umu musumba.”

Ezekelo 12:22

“We mwana wa muntu, mwalozya mwi muno mu mpanga ya Izlaeli apakutaka imuti, ‘Manda yakupita, ni vilolwa ukwaula vino vitumbwile.’?

Ezekelo 14:1

Yamwi mu ntunguluzi zya ina Izlaeli iiza kunondi nga yikala pansi uku nkolelo yane.

Ezekelo 21:7

Ndi yakuuzya umulandu uno ukutolomela, uyasuke uti, ‘Apamulandu wa vintu vino vyasya vicitike.’ Yanene ukuti kwatikwiza izwi lyakuti imyenzo yonsi ilakulukunta pamulandu ni ntete, amakasa yao yalatolompoka, amano yao yalapela, mu nteo zyao mulapomponteka. Icali nu kufikila, ala cafikila. Ivyalanda ne Yawe Simwandalali.”

Ezekelo 22:26

Yasimapepo yao yakaonona amasunde yane, nupya yasicindika ivyamuzilo vyane. Yasipusanya vyamuzilo ni visi vyamuzilo. Apa kusambizya yasipusanya ivintu ivikakowezya antu ni visikowezya, nupya yasisakamala ni Sabata kwene. Uli mulandu kwene uno aina Izlaeli yasincindikila.

Ezekelo 33:31

Antu yane yakaiza kunuli iumba likalamba, yiza yikala pa nkolelo yako apa kuvwa amazwi yako, lelo yakana ukuyalondela. Mu tunwa twao mwazula intumpu, nu mu myenzo yao mwaya ulwiswa lwa vyuma vino yakalonkela uku ukakasi.

Ezekelo 8:1

Umu mwaka walenga mutanda, uwanda walenga yasano uwa mwezi walenga mutanda, natenzi ukwane na akalamba ya Ciyuda ala yatenzi pankolelo yakwe nene. Papo kwene indola amaka yakwe Yawe Simwandalali yanjikila.

Aina Levi 26:18

“Nanti pacisila cakwe vii vyonsi, ndi mutakunjela, ndungilizya uvunuko winu maila cinimbali pamulandu wa kuntayela kwinu.

Aina Levi 26:21

“Ndi mwatwalilila kunkana nupya mwakana ukunjela, ndungilizya nupya uvunuko winu maila cinimbali.

Aina Levi 26:24

Lyene indi nu kwalukila panomuli nu kumuvunuka cuze, maila cinimbali ukuluta pa kuvunuka kwankolelo.

Aina Levi 26:28

lyene mu ukali wane ndamwalukila nu kumuvunuka cuze maila cinimbali ukuluta kuvunuka kwankolelo.

Mika 3:6

Caleka Yawe akuti, “Mwe yakasema, muliililwa na kanda kanyepe, mutalalola vilolwa nupya. Pamulandu wakuti mukapumbola antu yane, mwemo mutalakwata vilolwa navyuze, nupya mutalasapoola icintu cili consi.

Malaki 2:7

“ ‘Yasimapepo yapeelwa umulimo wakusambilizya icumi capali Leza. Antu yalinzile ukuya kunoyali ku kusambilila ivintu vino nkalonda kuti yacita, pamulandu wakuti yasimapepo ali nkombe zyakwe Yawe Wamaka yonsi.

Malaki 2:9

Acino nani, pakumuswilizizya cico, ndaleka aina Izlaeli yamusuule pamulandu wakuti mutakuyela vino nkalonda kuti mwacita, nga nupya mukafyenga antu pa kuyaputwila imilandu na kasoozi.’ ”

Malango 32:23

“‘Ndatulika impungo pano yali izisi na mpela nu kuyalasa ni nceto zyane zyonsi.

1 Samueli 3:1

Umulumendo Samueli watumikilanga Yawe ala akwangalilwa na Eli. Mu manda kwene yalya inkombe zyakwe Yawe zitavuzile, nupya ni vilolwa kwene ivyakufuma kunoli vitavuzile.